រសៀលថ្ងៃអង្គារ ទី១៣ ខែកញ្ញា ឆ្នាំ២០២២ នៅសាលមហោស្រពខេត្ត ឯកឧត្តម វ៉ា ថន អភិបាលខេត្ត អញ្ជើញជួបសំណេះសំណាលជាមួយមន្រ្តីរាជការ និងមន្រ្តីកិច្ចសន្យា នៃសាលាខេត្តក្រចេះ ។
ឯកឧត្តម វ៉ា ថន អភិបាលខេត្ត បានថ្លែងនូវការកោតសរសើរ និងវាយតម្លៃខ្ពស់ ចំពោះរាល់កិច្ចខិតខំប្រឹងប្រែង របស់មន្រី្ដរាជការសាលាខេត្តទាំងអស់ ដែលបានខិតខំបំពេញការងារ ទទួលបានលទ្ធផលល្អ និងបន្តជម្រុញ និងលើកកម្ពស់ប្រសិទ្ធភាពការងារបន្ថែមទៀត ជាពិសេសការយកចិត្តទុកដាក់ លើការផ្តល់សេវាសារធារណៈទៅតាមកម្មវិធីនយោបាយ របស់រាជរដ្ឋាភិបាល ក្នុងអណត្តិទី៦ ក្រោមការដឹកនាំ របស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ។
ឯកឧត្តម វ៉ា ថន អភិបាលខេត្ត បានជម្រុញដល់មន្រ្តីក្រោមឱវាទទាំងអស់ ត្រូវរួមសហការគ្នាក្នុងការផ្តល់សេវាសាធារណៈជូនប្រជាពលរដ្ឋ ព្រោះមន្ត្រី គឺជាទូក ឬជាស្ពាន សម្រាប់ចម្លងប្រជាពលរដ្ឋឲ្យទទួលបានភាពសុខសុវត្ថិភាព ហើយក្នុងឱកាសបុណ្យភ្ជុំបិណ្ឌ យើងត្រូវបង្ករលក្ខណៈងាយស្រួលដល់បងប្អូនប្រជាពលរដ្ឋ ដើម្បីបានបំពេញបុណ្យកុសល ប្រកបដោយសុខសុវត្ថិភាពនិងសណ្តាប់ធ្នាប់ ។
ឯកឧត្ដម បន្តថា ៖ ដោយផ្អែកទៅតាមស្ថានភាពវិវឌ្ឍនៃប្រទេសជាតិ ក្នុងដំណាក់កាលចុងក្រោយ មន្ត្រីរាជការ ត្រូវប្រែឥរិយាបទពីអ្នកគ្រប់គ្រង ទៅជាអ្នកបំរើសេវាសាធារណៈ ដូច្នេះមកដល់វេលានេះ យើងជាមន្ត្រីរាជការ ដែលកំពុងបំពេញភារកិច្ច នៅក្នុងតួនាទីភារកិច្ចរបស់រដ្ឋបាលខេត្ត ត្រូវមានការយល់ដឹង និងដើរឲ្យស្របទៅតាមគោលនយោបាយនេះ ដើម្បីឆ្លើយតបទៅនឹងសេចក្ដីត្រូវការរបស់ប្រជាពលរដ្ឋឲ្យបានស្មើៗគ្នាដូចៗគ្នា និងកាន់តែល្អប្រសើរថែមទៀត ។ ដូច្នេះក្នុងនាមជាមន្ត្រីរាជការ ត្រូវរួមសហការគ្នាបម្រើសេវាសាធារណៈ ជូនប្រជាពលរដ្ឋឱ្យបានគាប់ប្រសើរ ដោយឈរលើគោលការណ៍ធ្វើឱ្យបាន ធ្វើឱ្យលឿន និងមានតម្លាភាព ។
ឯកឧត្តម វ៉ា ថន អភិបាលខេត្តក្រចេះ ក៏បានផ្តាំផ្ញើដល់មន្ត្រីរាជការ ត្រូវបន្តខិតខំបំពេញនូវភារកិច្ចស្នូលរបស់ខ្លួន និងមានការសាមគ្គីភាពក្នុងឲ្យបានល្អព្រមទាំងបម្រើនូវសេវាសាធារណៈជូនប្រជាជនឲ្យបានទាន់ពេលវេលា និងធ្វើគំរូល្អដល់មន្ត្រីក្រោមឱវាទ នៃទីចាត់ការទាំងអស់ ត្រូវមានទំនាក់ទំនងល្អជាមួយបណ្តាមន្ទីរ អង្គភាព និងភ្ញៀវជាតិ អន្តរជាតិ ដើម្បីភាពរីកចំរើនដល់ខេត្ត ។ និងបានជូនពរនៅក្នុងឱកាសបុណ្យភ្ជុំបិណ្ឌសូមមានសុខសុវត្ថិភាពរាល់ពេលធ្វើដំណើរ ត្រូវគោរពច្បាប់ចរាចរ ដោយពាក់មួក និងដាក់ខ្សែក្រវ៉ាត់សុវត្ថិភាព ដើម្បីបញ្ជៀសនូវបញ្ហាគ្រោះថ្នាក់ដល់អាយុជីវិត និងបានឧបត្ថម្ភនូវថវិការមួយចំនួនដល់អភិបាលរងខេត្ត និងមន្រ្តីរដ្ឋបាលផងដែរ ៕
ប្រភព៖ រដ្ឋបាលខេត្តក្រចេះ