រសៀលថ្ងៃអាទិត្យ ០៦រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ខែកញ្ញាឆ្នាំ ៣០១៨ ប្រជាពលរដ្ឋក្រីក្រចំនួន៤០០គ្រួសារ មកពីឃុំស្ទឹងឆាយចំនួន ១១៣គ្រួសារ និងមកពីឃុំកំពង់សីលាចំនួន ២៨៧គ្រួសារ ទទួលបានមុងជ្រលក់ថ្នាំការពារមូសដើម្បីយកទៅប្រើប្រាស់។ មន្រ្តីសាខាកាកបាទក្រហមខេត្តព្រះសីហនុ បានឲ្យដឹងថា ការចែកលើកនេះមិនមែនចែកស្បៀងអាហារទេគឺយើងចែកមុងជ្រលក់ថ្នាំការពារម៉ូស និងសត្វល្អិតចង្រៃផ្សេងៗ ដើម្បីការពារជំងឺដែលចម្លងដោយម៉ូសឬសត្វល្អិត។ ក្រៅពីមុងជ្រលក់ថ្នាំ ក៏មានចែកជូនអាវផងដែរ ដែលអំណោយទាំងនោះជាការឧបត្ថម្ភពីកាកបាទក្រហមខេត្តក្វាងស៊ី ប្រទេសចិន។
ជាមួយគ្នានេះ កាកបាទក្រហមខេត្តនិងសាលាខេត្តព្រះសីហនុ បានរួមគ្នាឧបត្ថមថវិកាម្នាក់៤០០០០៛ ផងដែរ។ ឯកឧត្តម យន្ត មីន អភិបាលខេត្តព្រះសីហនុ និងជាប្រធានកិតិ្តយសសាខាកាកបាទក្រហមខេត្ត បានប្រសាសន៍ផ្តាំផ្ញើសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានអំពាវនាវអោយពលរដ្ឋចេះថែរក្សាសុខភាព ពេលគេងត្រូវដាក់មុងអោយបានត្រឹមត្រូវដើម្បីកុំអោយម៉ូសខាំ នាំឲ្យកើតជំងឺ។
ទន្ទឹមនោះឯកឧត្តម បានក្រើនរំលឹកអោយមន្ត្រីតាមមូលដ្ឋានត្រូវយកចិត្តទុកដាក់ថែទាំសុខទុក្ខប្រជាជន និងជួយពួកគាត់អោយបានទាន់ពេលវេលាក្នុងគ្រាមានអាសន្ន៕
