ព្រឹកថ្ងៃពុធ ទី១៣ ខែកក្កដា ឆ្នាំ២០២២ ក្រុមប្រឹក្សាខេត្តក្រចេះបើកកិច្ចប្រជុំសាមញ្ញលើកទី៣៨ អនុម័តនូវរបៀបវារៈសំខាន់ៗចំនួន៣ និងដោះស្រាយនូវបញ្ហាផ្សេងៗក្រោមអធិបតីភាព ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត និងឯកឧត្តម ទុយ ប៊ុនសេរីរត្ន័មុនី អភិបាលខេត្តស្តីទី ។
របៀបវារៈសំខាន់ទាំង៣ រួមមានស្ដីពីការផ្លាស់ប្ដូរ និងទទួលស្គាល់សមាជិកក្រុមប្រឹក្សាខេត្តក្រចេះ និង ពិនិត្យ និងអនុម័ត លើសេចក្តីព្រាងកំណត់ហេតុកិច្ចប្រជុំសាមញ្ញលើកទី៣៧ របស់ក្រុមប្រឹក្សាខេត្ត។ ព្រមទាំងពិនិត្យនិងអនុម័តលើសេចក្តីព្រាងរបាយការណ៍ប្រចាំឆមាសទី១ ស្តីពីការអនុវត្តការងាររបស់រដ្ឋបាលខេត្តក្រចេះ ជាមួយគ្នានោះកិច្ចប្រជុំពិនិត្យ និងអនុម័តសេចក្តីព្រាងស្ដីពីការរៀបចំគម្រោងចំណូល ចំណាយថវិការដ្ឋបាលខេត្ត សម្រាប់ការគ្រប់គ្រងឆ្នាំ ២០២៣។
សូមបញ្ជាក់ថា ក្រុមប្រឹក្សាខេត្តក្រចេះប្រការទទួលស្គាល់ឯកឧត្តម ប៊ី ជា ជាសមាជិកក្រុមប្រឹក្សាខេត្តក្រចេះ ជំនួសឯកឧត្តម ឌួ សួស្ដី ដោយមូលហេតុទទួលមរណៈភាព។
យោងតាមរបាយការណ៍សង្ខេបលទ្ធផលការងារប្រចាំឆមាសទី១ឆ្នាំ ២០២២ របស់រដ្ឋបាលខេត្ត ចំពោះវិស័យសុខាភិបាល អ្នកដែលបានយកវត្ថុវិភាគសំណាករកមេរោគកូវីដ១៩ចំនួន ១៣២៦៧នាក់ ជាលទ្ធផលអវិជ្ជមានចំនួន ១២៧៤៧នាក់ និងអវិជ្ជមានចំនួន ៥២០នាក់ ដោយឡែកចំពោះការងារកសិកម្ម -សម្រេចការភ្ជួររាស់ដីស្រែវស្សាចំនួន ១៣៩៧១ ហិតា ស្មើនឹង៣៤,៩២% នៃផែនការ៤០.០០០ហ.ត ច្រើនជាងឆ្នាំមុនចំនួន ១៨២ហ.ត សម្រេចការភ្ជួររាស់ដីដាំដំណាំសាក់វប្បកម្មរដូវវស្សាចំនួន ២១១២ហ.ត ស្មើនឹង១០៤,៦០% នៃផែនការ ២០០០ហ.ត ច្រើនជាងឆ្នាំមុនចំនួន ១៣២ហ.ត។
ឯកឧត្ដម ហឿ ស៊ីយ៉ែម ប្រធានក្រុមប្រឹក្សាខេត្តបានក្រើនរំលឹក ណែនាំដល់រដ្ឋបាលក្រុង រួមនិងមន្ទីរវិស័យពាក់ព័ន្ធ សូមចូលរួមសំអាតថែរក្សាអនាម័យ បរិស្ថាន តាមដងផ្លូវជាពិសេសការវេចខ្ចប់ទុកដាក់សំរាមឲ្យបានត្រឹមត្រូវ៕
ប្រភព៖ រដ្ឋបាលខេត្តក្រចេះ