(បាត់ដំបង)៖ នាព្រឹកថ្ងៃសៅរ៍ ទី៣ ខែតុលា ឆ្នាំ២០២៦ ឯកឧត្តម ផាន់ ចាន់ធុល រដ្ឋលេខាធិការក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំព្រៃខ្ពស់ ស្រុកបវេល ខេត្តបាត់ដំបង អមដោយលោក បួន ហេង អគ្គនាយករង នៃអគ្គនាយកដ្ឋានរដ្ឋបាល និងជាអនុប្រធានក្រុមការងារ រួមជាមួយក្រុមការងារ បានចូលរួមក្នុងពិធីបុណ្យកាន់បិណ្ឌ និងភ្ជុំបិណ្ឌ នៅបណ្តាវត្តក្នុងភូមិសាស្ត្រខេត្តបាត់ដំបង។

ទេយ្យទាន ដែលបានប្រគល់ជូនបណ្តាវត្តចំនួន ៥ និងសាលាឆទាន ចំនួន ១ នៅក្នុងឃុំព្រៃខ្ពស់ ក្នុងមួយវត្តទទួលបានរួមមាន អង្ករ ៥០គីឡូក្រាម ស្លាដក់ ១ ទឹកសុទ្ធ ១កេស ទឹកក្រូច ១កេស ទឹកផ្លែឈើ ១កេស មី ២កេស ត្រីខ ១យួរ ទឹកត្រី ២យួរ ទឹកស៊ីអ៉ីវ ២យួរ ថ្នាំពេទ្យ ១ឈុត រួមទាំងបច័្ចយកសាងវត្ត ៦០ម៉ឺនរៀល/វត្ត ថវិកាប្រគេនព្រះសង្ឃ ៥ម៉ឺនរៀល/អង្គ អាចារ្យ ៣ម៉ឺនរៀល/ម្នាក់ និងយាយជី តាជី ១ម៉ឺនរៀល/ម្នាក់ និងទេយ្យទាន បច្ច័យសម្រាប់បណ្តាវត្តផ្សេងទៀតក្នុងខេត្តបាត់ដំបង សរុបថវិកាចំណាយចំនួន ១៦,៦៧៤,០០០លានរៀល។

ឆ្លៀតឱកាសនេះដែរ ក្រុមការងារបានចុះទៅសួរសុខទុក្ខប្រជាពលរដ្ឋដែលរងផលប៉ះពាល់ដោយសារទឹកជំនន់ និងបាននាំយកអំណោយមួយចំនួនឧបត្ថម្ភដល់គ្រួសារដែលបានជម្លៀសចំនួន ១៥គ្រួសារ ព្រមទាំងបានប្រជុំការងារមួយចំនួន អំពីការរៀបចំក្រុមប្រឹក្សាឃុំសម្រាប់ការបោះឆ្នោតឃុំ ឆ្នាំ២០២៧ ខាងមុខនេះផងដែរ។