ភ្នំពេញ៖សមាជិកក្រុមប្រឹក្សារាជធានីភ្នំពេញ បានលើកឡើងថា៖ បញ្ហាបរិស្ថាន ការដឹកជញ្ជូនសំរាម ការប្រមូលសំរាមនៅក្នុងរាជធានីភ្នំពេញឃើញថា មានលក្ខណៈល្អប្រសើរហើយ។ ប៉ុន្តែក្នុងចំណោមក្រុមហ៊ុនដឹកជញ្ជូនសំរាមទាំង៣ (ក្រុមហ៊ុន 800Super​ ក្រុមហ៊ុន Mizuda និង ក្រុមហ៊ុន ស៊ីនទ្រី (Cintri) ) មានក្រុមហ៊ុន 800Superមួយ ធ្វើសកម្មភាពប្រមូលសំរាមនៅក្នុងរាជធានីភ្នំពេញ មានភាពអសកម្ម ហើយត្រូវបានប្រជាពលរដ្ឋ ប្តឹងមកអាជ្ញាធររាជធានីភ្នំពេញជាច្រើនលើកច្រើនសារ ដើម្បីធ្វើយ៉ាងណាឱ្យក្រុមហ៊ុនដឹកជញ្ជូនសំរាមមួយនេះ ដឹកជញ្ជូនសំរាមឱ្យបានល្អប្រសើរជាងមុន និងដឹកជញ្ជូនសំរាមចេញពីមូលដ្ឋានពួកគាត់ឱ្យបានល្អដូចក្រុមហ៊ុនប្រមូលសំរាម២ទៀត។

  នេះជាការលើកឡើងក្នុងកិច្ចប្រជុំសាមញ្ញលើកទី១៩ របស់សមាជិកក្រុមប្រឹក្សារាជធានីភ្នំពេញ អាណត្តិទី៤ ក្រោមវត្តមានឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ និងឯកឧត្ដម ហួត ហៃ អភិបាលរង តំណាងឯកឧត្ដមឃួង ស្រេង អភិបាលរាជធានីភ្នំពេញ នាព្រឹកថ្ងៃទី១១ធ្នូ២០២៥នេះ នៅសាលារាជធានីភ្នំពេញ។

 ឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ បានមានប្រសាសន៍លើកឡើងថា៖ ក្រុមហ៊ុន 800Super ប្រជាពលរដ្ឋតែងមានសំណូមពរឱ្យមានវិធានការ ដោយសារតែក្រុមហ៊ុន ប្រមូលសំរាមមិនអស់និងមានភាពយឺតយ៉ាវ ។ ការនិយាយបែបនេះមិនមែនមានន័យថា ចង់ឱ្យលុបបំបាត់ក្រុមហ៊ុន 800Super នោះទេ តែមានប្រជាពលរដ្ឋជាច្រើនបានប្តឹងនិងលើកឡើងក្នុងវេទិកាសាធារណៈពីភាពអសកម្មភាពរបស់ក្រុមហ៊ុនមួយនេះ។ សង្ឃឹមថា ក្រោយពីមានចំណាត់ការលើរឿងនេះ បញ្ហាសំរាមដែលក្រុមហ៊ុន 800Super ទទួលខុសត្រូវនឹងលុបបំបាត់ការប្តឹងពីប្រជាពលរដ្ឋតទៀត។

ឯកឧត្ដម ហួត ហៃ អភិបាលរងរាជធានីភ្នំពេញ បានលើកឡើងថា៖ នៅរាជធានីភ្នំពេញ មានក្រុមហ៊ុន៣ ទទួលបានសិទ្ធិពីរាជរដ្ឋាភិបាលក្នុងការដឹកជញ្ជូនសំរាមនៅក្នុងភូមិសាស្ត្ររាជធានីភ្នំពេញ នោះគឺ ក្រុមហ៊ុន 800Super​ ក្រុមហ៊ុន Mizuda និង ក្រុមហ៊ុន ស៊ីនទ្រី (Cintri) ហើយក្នុងចំណោមក្រុមហ៊ុនទាំង៣នេះ ក្រុមហ៊ុនដែលដឹកជញ្ជូន ប្រមូលសំរាមអន់ថយជាងគេ គឺក្រុមហ៊ុន 800Super ដោយសារតែក្រុមហ៊ុននេះ ដេញថ្លៃបានទាបជាងគេ រហូតស្ទើតែពាក់កណ្តាលបើធៀបនឹងក្រុមហ៊ុន២ទៀត ពោលគឺ ក្រុមហ៊ុន Mizuda ដេញថ្លៃបានក្នុងតម្លៃ២៣ដុល្លារក្នុង១តោន​ ក្រុមហ៊ុន ស៊ីនទ្រី (Cintri) ដេញថ្លៃបានក្នុងតម្លៃ២២ដុល្លារក្នុង១តោន ចំណែកក្រុមហ៊ុន 800Superវិញ ដេញថ្លៃបានក្នុងតម្លៃ១២ដុល្លារប៉ុណ្ណោះក្នុង១តោន និងម្យ៉ាងទៀតរថយន្តមានចំនួនតិចថែមទៀតនោះ ទើបការដឹកជញ្ជូនសំរាម នៅក្នុងមូលដ្ឋានដែលក្រុមហ៊ុនទទួលខុសត្រូវ មានភាពយឺតយ៉ាវនិងដឹកជញ្ជូនមិនអស់។ឯកឧត្ដមបន្តថាប៉ុន្តែទោះបីជាយ៉ាងណាក្តីរដ្ឋបាលរាជធានីភ្នំពេញក៏បានណែនាំនិងសូមឱ្យក្រុមហ៊ុន Mizuda និង ក្រុមហ៊ុន ស៊ីនទ្រី (Cintri) ជួយប្រមូល សំដៅធ្វើយ៉ាងណាឱ្យអស់សំរាមពីរាជធានីភ្នំពេញរាល់ថ្ងៃ កាត់បន្ថយការថ្នាំងថ្នាក់ពីប្រជាពលរដ្ឋ៕

ប្រភព៖ រដ្ឋបាលរាជធានីភ្នំពេញ