ខេត្តកែប ៖ នៅថ្ងៃអង្គារ ទី៦ ខែមករា ឆ្នាំ២០២៦ ឯកឧត្តម អ៊ុក ថា ប្រធានក្រុមប្រឹក្សាខេត្ត និងឯកឧត្ដមបណ្ឌិត សោម ពិសិដ្ឋ អភិបាល នៃគណៈអភិបាលខេត្តកែប បាននាំយកអំណោយជាគ្រឿងឧបភោគ បរិភោគ រួមជាមួយថវិកាមួយចំនួន អញ្ជើញជួបសំណេះសំណាលសួរសុខទុក្ខវីរកងទ័ព ដែលកំពុងសម្រាកព្យាបាលនៅមន្ទីរពេទ្យបង្អែកខេត្តកែប ។ បន្ទាប់មក ឯកឧត្ដម ក៏បាន បន្តអញ្ជើញចុះជួបសួរសុខទុក្ខវីរអាវុធហត្ថតាមខ្នងផ្ទះ ស្ថិតនៅឃុំពងទឹក ស្រុកដំណាក់ចង្អើរ ខេត្តកែប។

ក្នុងដំណើរនៃការអញ្ជើញជួបសួរសុខទុក្ខដក់វីរជនកងទ័ព និងវីរកងរាជអាវុធហត្ថទាំងពីររូបខាងលើ ឯកឧត្តម អភិបាលខេត្តកែប ក៏បានពាំនាំនូវប្រសាសន៍ផ្ដាំផ្ញើសួរសុខទុក្ខដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ 

បន្ថែមពីនេះ ឯកឧត្តមបណ្ឌិត បានសង្កាត់ធ្ងន់បន្ថែមទៀតថា «ក្នុងនាមយើងខ្ញុំទាំងអស់គ្នាជាសមរភូមិក្រោយ គឺនៅតែបន្តចូលរួមចំណែកឧបត្ថម្ភគាំទ្រដល់សមរភូមិជួរមុខជានិច្ច និងសូមគោរពដឹងគុណយ៉ាងជ្រាលជ្រៅចំពោះគំរូវីរភាពរបស់វីរកងទ័ពកម្ពុជា ក្នុងការការពារបូរណភាពទឹកដី និងសេចក្ដីសុខក្សេមក្សាន្តរបស់ប្រជាជនកម្ពុជាទាំងមូល»៕

ប្រភព ៖ រដ្ឋបាលខេត្តកែប