នាព្រឹកថ្ងៃព្រហស្បតិ៍ ទី១១ ខែធ្នូ ឆ្នាំ២០២៥ ឯកឧត្តម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ បានអញ្ជើញជាអធិបតីក្នុងពិធីប្រកាសសមាសភាព ក្រុមការងារគណៈកម្មការ និងអនុគណៈកម្មការរៀបចំ កិច្ចប្រជុំប្រចាំឆ្នាំរបស់អគ្គនាយកដ្ឋានអន្តោប្រវេសន៍ និងប្រធានកុងស៊ុលអាស៊ាន លើកទី២៩ (29th DGICM) នៅអគ្គនាយកដ្ឋានអន្តោប្រវេសន៍។

ក្នុងពិធីនេះដែរ ក៏មានការអញ្ជើញចូលរួមពីឯកឧត្តម អគ្គនាយករង លោក លោកស្រី ប្រធាននាយកដ្ឋាន អនុប្រធាននាយកដ្ឋាន លោក លោកស្រីនាយ-នាយរងការិយាល័យ និងមន្ត្រីជំនាញដែលពាក់ព័ន្ធ ដើម្បីត្រៀមខ្លួនក្នុងការធ្វើជាម្ចាស់ផ្ទះ ក្នុងកិច្ចប្រជុំប្រចាំឆ្នាំរបស់អគ្គនាយកដ្ឋានអន្តោប្រវេសន៍ និងប្រធានកុងស៊ុលអាស៊ាន លើកទី២៩ (29th DGICM) ដែលនឹងត្រៀមប្រព្រឹត្តនៅព្រះរាជាណាចក្រកម្ពុជា ឆ្នាំ២០២៦ ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវសេន៍ បានបង្តើតក្រុមការងារគណៈកម្មការ អនុគណៈកម្មការ ដើម្បីរៀបចំកិច្ចប្រជុំនេះឱ្យកាន់មានប្រសិទ្ធភាព។

ឯកឧត្តម ឧត្តមសេនីយ៍ឯក សុខ វាសនា បានណែនាំឱ្យក្រុមការងារគណៈកម្មការ និងអនុគណៈកម្មការ បែងចែកការងារឱ្យបានច្បាស់លាស់ទៅតាមជំនាញ ទីតាំងសម្រាប់រៀបចំកម្មវិធី កិច្ចប្រជុំនានាដែលពាក់ព័ន្ធ។

ក្នុងនោះដែរឯកឧត្តម អគ្គនាយក បានណែនាំឱ្យចាត់ចែងក្រុមការងារដែលត្រូវតាមប្រធានគណៈប្រតិភូ ភរិយារបស់គណៈប្រតិភូ និងប្រតិភូអមដំណើរ។

ជាមួយគ្នានេះដែរឯកឧត្តមឧត្តមសេនីយ៍ឯក សុខ វាសនា អគ្គនាយក បានឱ្យក្រុមការងារទាំងអស់ចាប់ផ្ដើមត្រៀមរៀបចំ គ្រប់ការងារដែលបានដាក់ជូនក្នុងតួនាទីភារកិច្ច ក្នុងសេចក្តីសម្រេច ជាពិសេសត្រូវបត់បែនទៅសភាពការណ៍ ដើម្បីឱ្យការរៀបចំ កិច្ចប្រជុំប្រចាំឆ្នាំរបស់អគ្គនាយកដ្ឋានអន្តោប្រវេសន៍ និងប្រធានកុងស៊ុលអាស៊ាន លើកទី២៩ (29th DGICM) នៅព្រះរាជាណាចក្រកម្ពុជា ប្រព្រឹត្តទៅប្រកបដោយជោគជ័យ។

ប្រភព៖ អគ្គនាយកដ្ឋានអន្តោប្រវេសន៍