បាត់ដំបង ៖ នារសៀលថ្ងៃទី២៣ ខែតុលា ឆ្នាំ២០២៦នេះ គណៈកម្មការសាខាសមាគនារីក្រសួងមហាផ្ទៃ ចុះសួរសុខទុក្ខសំណេះសំណាល មន្រ្តី នៃអធិការដ្ឋាននគរបាល ស្រុកកំរៀង ក្រោមអធិបតីភាព លោកជំទាវ ទៀត តារ៉ាសាត អនុរដ្ឋលេខាធិការ និងជាអនុប្រធានគណៈកម្មការសាខាសមាគមនារីក្រសួងមហាផ្ទៃ តំណាងដ៏ខ្ពង់ខ្ពស់ លោកជំទាវ កែ សួនសុភី ស សុខា ប្រធានកិត្តិយស គណៈកម្មការសាខាសមាគមនារីក្រសួងមហាផ្ទៃ និងលោកជំទាវ ជូ ប៊ុនអេង រដ្ឋលេខាធិការ និងជាប្រធានប្រតិបត្តិ ។

ថ្លែងក្នុងពិធី លោកជំទាវ ក៏បាននាំនូវការផ្តាំផ្ញើសួរសុខទុក្ខពីសំណាក់ លោកជំទាវ ប្រធានកិត្តិយស និងលោកជំទាវ រដ្ឋលេខាធិការ និងជាប្រធានប្រតិបត្តិគណៈកម្មការសាខាសមាគមនារីក្រសួងមហាផ្ទៃ បានធ្វើការថ្លែងអំណរគុណ និងសម្តែងនូវការគោរពកោតសរសើរជូនចំពោះមន្រ្តីនគរបាលទាំងអស់ដែលកំពុងបំពេញភារកិច្ច ក្នុងការការពារ និងឈរជើងការពារទឹកដី និងប្រជាជននៅតាមខ្សែបន្ទាត់ព្រំដែន នៅក្នុងភូមិសាស្រ្តស្រុកកំរៀង ខេត្តបាត់ដំបង។

ជាមួយគ្នានោះ លោកជំទាវ បានផ្តាំផ្ញើនូវសារលើកទឹកចិត្ត និងពាក្យពេចន៍ជូនពរពីសមរភូមិក្រោយជូនដល់មន្រ្តីនគរបាល ដែលកំពុងឈរជើងការពាសន្តិសុខ សុវត្ថិភាព សណ្តាប់ធ្នាប់សង្គម ការពារបូរណភាពទឹករបស់កម្ពុជា និងត្រូវរួបរួមសាមគ្គីភាព ឯកភាពរឹងមាំ ទាំងទស្សនៈ និងគោលជំហរ ដើម្បីការពារផលប្រយោជន៍ជាតិ មិនថាក្នុងកាលៈទេសៈណាក៏ដោយ។

សូមជម្រាបជូនថា ពិធីនេះមានការអញ្ជើញចូលរួមពីសំណាក់ ថ្នាក់ដឹកនាំជាស្ត្រីក្រសួងមហាផ្ទៃ និងជាអនុប្រធាន សមាជិក សមាជិកាគណៈកម្មការសាខាសមាគមនារីក្រសួងមហាផ្ទៃ តំណាងស្នងការ នៃស្នងការដ្ឋាននគរបាលខេត្ត តំណាងក្រុមហ៊ុន ព្រមទាំង អាជ្ញាធរមូលដ្ឋាន ចូលរួមជាច្រើនរូប៕