កំពង់ស្ពឺ ៖ នាថ្ងៃទី១២ ខែឧសភា ឆ្នាំ២០២៦ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានអញ្ជើញជាអធិបតីក្នុងកម្មវិធីបឋកថាចែករំលែកបទពិសោធន៍ការងារ ជូនដល់សិស្សនគរបាល ដែលកំពុងសិក្សាវគ្គបណ្ដុះបណ្ដាលកម្រិតបឋមវិជ្ជាជីវៈនគរបាល ជំនាន់ទី២០ លើកទី១ នៅសាលានគរបាលជាតិភូមិភាគទី៣ (ត្រែងត្រយឹង) ស្ថិតក្នុងស្រុកភ្នំស្រួច ខេត្តកំពង់ស្ពឺ ។

គោលបំណងសំខាន់នៃបឋកថានេះ គឺដើម្បីពង្រឹងសមត្ថភាព និងការយល់ដឹងដល់សិស្សនគរបាលជ័យលាភី លើការងារដឹកនាំ និងការអនុវត្តផ្ទាល់នូវគោលនយោបាយ “ភូមិ ឃុំ សង្កាត់ មានសុវត្ថិភាព”របស់រាជរដ្ឋាភិបាលកម្ពុជា ឱ្យមានប្រសិទ្ធភាពខ្ពស់នៅតាមមូលដ្ឋាន។

ក្នុងឱកាសនោះ ឯកឧត្តម វ៉ី សំណាង អភិបាលខេត្ត បានចែករំលែកនូវចំណេះដឹង និងបទពិសោធន៍ដ៏សម្បូរបែប ដែលឯកឧត្តម បានអនុវត្តជោគជ័យកន្លងមក ក្នុងនាមជាថ្នាក់ដឹកនាំរដ្ឋបាលខេត្ត។ ឯកឧត្តមបានគូសបញ្ជាក់ថា កងកម្លាំងនគរបាលគឺជាបង្អែកដ៏រឹងមាំរបស់បងប្អូនប្រជាពលរដ្ឋ ដូច្នេះត្រូវតែមានសីលធម៌ល្អ វិជ្ជាជីវៈច្បាស់លាស់ និងស្មារតីទទួលខុសត្រូវខ្ពស់ក្នុងការបម្រើរាស្ត្រ។

ឯកឧត្តម វ៉ី សំណាង ក៏បានផ្ដាំផ្ញើដល់សិស្សនគរ បាលទាំងអស់ ត្រូវយកចិត្តទុកដាក់លើចំណុចគន្លឹះមួយចំនួន ក្នុងរួមមាន៖ ការបង្ក្រាបបទល្មើសគ្រឿង ញៀន និងល្បែងស៊ីសងគ្រប់ប្រភេទ ការពង្រឹងសន្តិសុខ សណ្ដាប់ធ្នាប់ និងសុវត្ថិភាពចរាចរណ៍ ការផ្ដល់សេវាសាធារណៈជូនប្រជាពលរដ្ឋឱ្យបានរហ័ស និងប្រកបដោយភាពស្និទ្ធស្នាល និងការបង្កើនកិច្ចសហការជិតស្និទ្ធជាមួយអាជ្ញាធរដែនដី និងប្រជាការពារ ដើម្បីបង្កើនជំនឿទុកចិត្តពីមហា ជនដែលខ្លួនគ្រប់គ្រង ។

ជាទីបញ្ចប់ ឯកឧត្តមអភិបាលខេត្ត បានសម្តែងនូវការកោតសរសើរចំពោះថ្នាក់ដឹកនាំសាលានគរ បាលជាតិភូមិភាគទី៣ ដែលបានខិតខំបណ្តុះ បណ្តាលធនធានកងកម្លាំង ប្រកបដោយគុណភាព ដើម្បីចូលរួមចំណែកការពារសុខសន្តិភាព និងការអភិវឌ្ឍសង្គមជាតិទាំងមូល៕

ប្រភព៖ រដ្ឋបាលខេត្តតាកែវ