នាព្រឹកថ្ងៃសុក្រ ១៣រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៣១ ខែឧសភា ឆ្នាំ២០១៩នេះ នាទីស្តីការក្រសួងមហាផ្ទៃ ឯកឧត្តម ចាន់ អ៊ាន រដ្ឋលេខាធិការក្រសួងមហាផ្ទៃ បានអញ្ជើញជាអធិបតីដឹកនាំកិច្ចប្រជុំ ស្តីពីផែនការវគ្គបណ្តុះបណ្តាលប្រចាំឆ្នាំ ក្នុងក្របខណ្ឌកិច្ចសហប្រតិបត្តិការរវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន។ កិច្ចប្រជុំនេះមានការអញ្ជើញចូលរួមពីថ្នាក់ដឹកនាំ រដ្ឋលេខាធិការ អគ្គលេខាធិការដ្ឋាន និងបណ្តាអគ្គនាយកទាំងអស់ដែលជាសេនាធិការក្រសួងមហាផ្ទៃ។
ឯកឧត្តម នាយឧត្តមសេនីយ៏ ប៉ោ ភក្តិ អគ្គលេខាធិការ នៃអគ្គលេខាធិការដ្ឋាន បានធ្វើសេចក្តីរាយការណ៍សង្ខេបជូនអង្គប្រជុំ ស្តីពីការបណ្តុះបណ្តាលរយៈពេលវែង មធ្យម និងរយៈពេលខ្លីដល់មន្រ្តីនគរបាល និងមន្រ្តីស៊ីវិលកម្ពុជា ក្នុងឆ្នាំកន្លងទៅ។
ឯកឧត្តម នាយឧត្តមសេនីយ៏ ប៉ោ ភក្តិ មានប្រសាសន៍បន្តថា យោងតាមដំណើរទស្សនៈកិច្ចរបស់ថ្នាក់ដឹកនាំក្រសួងមហាផ្ទៃ ដែលដឹកនាំដោយសម្តេច ក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅសាធារណរដ្ឋប្រជាមានិតចិន ក្នុងឆ្នាំ២០១៩កន្លងទៅនេះ ហើយជាឆ្នាំអនុវត្តកិច្ចសហប្រតិបត្តិការច្បាប់រវាងក្រសួងមហាផ្ទៃ នៃព្រះរាជាណាចក្រកម្ពុជា និងក្រសួងសន្តិសុខសាធារណៈចិន។ ដែលក្នុងនោះ គឺបាននិយាយអំពីការកសាងសមត្ថភាពមន្រ្តី ដែលក្រសួងសន្តិសុខសាធារណៈចិន នឹងជួយលើកកម្ពស់កសាងសមត្ថភាពកងកម្លាំងនគរបាលជាតិកម្ពុជា តាមរយៈការផ្តល់ការបណ្តុះបណ្តាលលើជំនាញ ប្រឆាំងបទល្មើសបច្ចេកវិទ្យា ប្រឆាំងអំពើភេរវកម្ម អំពើឆបោកតាមប្រព័ន្ធទូរគមនាគម និងល្បែងស៊ីសងតាមប្រព័ន្ធអីនធើណែត។
សូមបញ្ជាក់ផងដែរថា ក្នុងក្របខណ្ឌនៃការបណ្តុះបណ្តាលរវាងក្រសួងមហាផ្ទៃ នៃព្រះរាជាណាចក្រកម្ពុជា និងក្រសួងសន្តិសុខសាធារណៈចិន ក្នុងរយៈពេលប្រាំឆ្នាំកន្លងទៅ គឺមានចំនួន ១០៥នាក់ ក្នុងមួយឆ្នាំ៕ រតនា
ដោយ៖ នាយកដ្នានព័ត៌មានវិទ្យា