រសៀលថ្ងៃពុធ ១១រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៩ ខែឧសភា ឆ្នាំ២០១៩ ក្រោមកិច្ចសហការរវាងក្រសួងទេសចរណ៍ជាមួយអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ក្នុងពិធីផ្សព្វផ្សាយបញ្រ្ជាបការយល់ដឹងពីបញ្ហា គ្រឿងញៀនដល់ប្រតិបត្តិករទេសចរណ៍ និងបុគ្គលិកបម្រើការនៅតាមមូលដ្ឋានអាជីវកម្ម សេវាកម្ម ទេសចរណ៍ បានបើកកិច្ចប្រជុំផ្សព្វផ្សាយស្តីពីការបញ្រ្ជាបការយល់ដឹង និងការប្រយុទ្ធប្រឆាំងគ្រឿងញៀនក្នុងវិស័យទេសចរណ៍ នៅសាលប្រជុំសាលាខេត្តកែប ក្រោមអធិបតីភាព លោកជំទាវ អ៊ុល ភីរុណអភិបាលរង តំណាងប្រធានគណៈកម្មាធិការត្រួតពិនិត្យគ្រឿងញៀនខេត្តកែប និងឯកឧត្តម ចិន សាម៉ុន ទីប្រឹក្សាតំណាងឯកឧត្តមបណ្ឌិត ថោង ខុន រដ្ឋមន្ត្រី ក្រសួងទេសចរណ៍ ដោយមានការចូលរួមពីមន្ទីរអង្គភាពជាសមាជិកគណកម្មាធិការត្រួតពិនិត្យគ្រឿងញៀនខេត្ត ក្រុង និងម្ចាស់ អ្នកគ្រប់គ្រង អាជីវកម្ម សេវាទេសចរណ៍ ។
លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងយកបទពិសោធន៍ពីបញ្ហា និងផលវិបាកផ្សេងៗដែលនឹងអាចកើតឡើងក្នុងទីតាំងអាជីវកម្មសេវាទេសចរណ៍របស់លោកអ្នក ប្រសិនបើលោកអ្នកមិនបានស្វែងយល់ឬមិនបានទទួលព័ត៌មានគ្រប់គ្រាន់ទូលំទូលាយពីបញ្ហាគ្រឿងញៀន។
លោកជំទាវ អ៊ុល ភិរុណ អភិបាលរង តំណាងប្រធានគណកម្មាធិការត្រួតពិនិត្យគ្រឿងញៀនខេត្ត បានប្រសាសន៍ថា ខេត្តកែប មិនមែនជាទីតាំងផលិតគ្រឿងញៀនទេ ហើយគ្រប់គោលដៅទេសចរណ៍ និងសេវាករទេសចរណ៍ទាំងអស់ត្រូវសហការផ្តល់ព័ត៌មាននានាពាក់ព័ន្ធនឹងការចែកចាយការប្រើប្រាស់គ្រឿងញៀងខុសច្បាប់នៅតាមមូលដ្ឋានរបស់ខ្លួនទៅដល់សមត្ថកិច្ចពាក់ព័ន្ធ ដើម្បីធ្វើការបង្រ្កាប និងទប់ស្កាត់ឲ្យបាន ទាន់ពេលវេលា ធានាបាននូវភាពសុខដុមរមនាជូនដល់ប្រជាពលរដ្ឋយើង។
ក្នុងឱកាសនោះដែរ ឯកឧត្ដម ចិន សាម៉ន ទីប្រឹក្សាក្រសួងទេសចរណ៍ បានថ្លែងលើកឡើងសាទរកោតសសើរដល់កិច្ចខិតខំប្រឹងប្រែងរបស់គណកម្មាធិការត្រួតពិនិត្យគ្រឿងញៀនខេត្តនាពេលកន្លងមក ហើយបញ្ហាគ្រឿងញៀនអាចដោះស្រាយបានលុះត្រាតែមានការចូលរួមទាំងអស់គ្នា ហើយប្រតិបត្តិករទេសចរណ៍មានតួនាទីសំខាន់ណាស់ក្នុងការបង្ការទប់ស្កាត់បញ្ហាគ្រឿងញៀនក្នុងទីតាំងរបស់ខ្លួនតាមរយះការសិក្សាស្វែងយល់ពីគោលនយោបាយ ច្បាប់ និងសហការឲ្យបានជិតស្និតជាមួយសមត្ថកិច្ចមូលដ្ឋានដោយហ៊ានរាយការណ៍ រាល់ការសង្ស័យនានាដែលអាចពាក់ព័ន្ធនឹងបញ្ហាគ្រឿងញៀន។ ឯកឧត្ដមបានសំណូមពរដល់សមត្ថកិច្ច និងអ្នកពាក់ព័ន្ធបង្កើតការផ្សព្វផ្សាយអប់រំពីបញ្ហាគ្រឿងញៀនឲ្យប្រជាពលរដ្ឋបានដឹងកាន់តែច្បាស់និងចូលរួមកាន់តែសកម្មបន្ថែមទៀត៕ គឹមអាន
ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន
