នៅរសៀលថ្ងៃសុក្រ ទី១៥ ខែមីនា ឆ្នាំ២០២៤នេះ ឯកឧត្តម នាយឧត្តមសេនីយ៍ ប៉ោ ភក្តិ រដ្ឋលេខាធិការ ក្រសួងមហាផ្ទៃ អញ្ជើញជាអធិបតីដឹកនាំកិច្ចប្រជុំពិនិត្យវឌ្ឍនភាពការងារអភិវឌ្ឍន៍ប្រព័ន្ធបច្ចេកវិទ្យាព័ត៌មាន និងការងារបណ្តុះបណ្តាលរបស់អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ដោយមានការអញ្ជើញចូលរួមពី ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ឯកឧត្តម អគ្គនាយករង ថ្នាក់ដឹកនាំ និងមន្ត្រីជំនាញពាក់ព័ន្ធមួយចំនួន។
ក្នុងកិច្ចប្រជុំនោះ ឯកឧត្តម ឧត្តមសេនីយ៍ឯក ហោ សំអាត បានលើកឡើងថា បើទោះបីជាការអនុវត្តប្រព័ន្ធមួយចំនួននៅមានភាពយឺតយ៉ាវ ប៉ុន្តែ ក្រុមការងារពាក់ព័ន្ធបានប្រឹងប្រែង ដោះស្រាយនូវបញ្ហាប្រឈមនានា ដើម្បីធ្វើយ៉ាងឱ្យកិច្ចការងារអភិវឌ្ឍប្រព័ន្ធបច្ចេកវិទ្យាព័ត៌មានអាចដំណើរការបានទាន់ពេលវេលា។
ឯកឧត្តម ឧត្តមសេនីយ៍ទោ អ៊ីវ វាសនា អគ្គនាយករង បានធ្វើសេចក្ដីរាយការណ៍ស្ដីពីវឌ្ឍនភាពការងាររបស់ក្រុមការងារសិក្សា កសាង និងអភិវឌ្ឍប្រព័ន្ធបច្ចេកវិទ្យាព័ត៌មានរបស់អគ្គនាយកដ្ឋានរដ្ឋបាល នៃក្រសួងមហាផ្ទៃ ដោយលើកឡើងថា មន្ត្រីបច្ចេកទេស នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានជួបពិភាក្សាជាមួយមន្ត្រីបច្ចេកទេស នៃអគ្គនាយកដ្ឋានរដ្ឋបាល ដើម្បីកំណត់នូវប្រព័ន្ធអាទិភាព សិក្សាអំពីស្ថានភាពប្រព័ន្ធ តម្រូវការមុខងារ លំហូរការងារ រួចរាល់មួយចំនួនធំដេីម្បីលេីកគម្រោងអភិវឌ្ឍន៍។
បន្ថែមពីនេះ ឯកឧត្តម ឧត្តមសេនីយ៍ទោ គឹម សិរីវុឌ្ឍ អគ្គនាយករង ក៏បានរាយការណ៍ពីវឌ្ឍនភាពនៃការអភិវឌ្ឍប្រព័ន្ធបច្ចេកវិទ្យាព័ត៌មាន សំខាន់ៗរបស់ក្រសួងមហាផ្ទៃ និងការងារបណ្ដុះបណ្ដាលដែលត្រៀមនឹងដាក់ឱ្យអនុវត្ត នាពេលខាងមុខ។
បន្ទាប់ពីស្ដាប់នូវសេចក្ដីរាយការណ៍របស់ថ្នាក់ដឹកនាំអគ្គនាយកដ្ឋាន ឯកឧត្តម នាយឧត្តមសេនីយ៍ រដ្ឋលេខាធិការ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារកន្លងមក ហើយឯកឧត្តម បានណែនាំឱ្យក្រុមការងារបន្តអនុវត្តការងារពាក់ព័ន្ធឱ្យកាន់តែមានប្រសិទ្ធភាពបន្ថែមទៀត ដើម្បីមានមូលដ្ឋានច្បាស់លាស់ក្នុងការគោរពស្នើសុំប្រជុំ ពិភាក្សា និងរាយការណ៍ពីវឌ្ឍនភាព និងលទ្ធផលការងារជូនថ្នាក់ដឹកនាំក្រសួង និងគោរពស្នើសុំអនុសាសន៍ណែនាំបន្តទៀត៕
ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ
