នៅរសៀលថ្ងៃសុក្រ ទី១ ខែធ្នូ ឆ្នាំ២០២៣ ឯកឧត្តម នាយឧត្តមសេនីយ៍ ប៉ោ ភក្ដិ រដ្ឋលេខាធិការ និងជាប្រធានគណៈកម្មការរៀបចំចាត់ចែងការបណ្តែតប្រទីបរបស់ក្រសួងមហាផ្ទៃ បានអញ្ជើញជាអធិបតីក្នុងកិច្ចប្រជុំស្ដីពីការដកស្រង់បទពិសោធន៍ការងារប្រទីបក្រសួងមហាផ្ទៃ ដោយមានការអញ្ជើញចូលរួមពី ឯកឧត្ដម ឧត្តមសេនីយ៍ឯក អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ អគ្គនាយករង ប្រធាន-អនុប្រធាននាយកដ្ឋាន ព្រមទាំងមន្ត្រីជំនាញពាក់ព័ន្ធផងដែរ។
ឯកឧត្តម នាយឧត្តមសេនីយ៍ ប៉ោ ភក្ដិ រដ្ឋលេខាធិការ និងជាប្រធានគណៈកម្មការរៀបចំចាត់ចែងការបណ្តែតប្រទីបរបស់ក្រសួងមហាផ្ទៃ បានមានប្រសាសន៍ដោយក្តីសោមនស្សរីករាយបំផុត ដែលក្រុមការងារនៃគណៈកម្មការរៀបចំចាត់ចែងការបណ្តែតប្រទីបទាំងអស់ សហការគ្នាបានយ៉ាងល្អ និងទទួលបានជោគជ័យ ដោយទាំងអស់នេះ គឺកើតចេញពីការទទួលខុសត្រូវតួនាទីភារកិច្ចរបស់ខ្លួនបានល្អ មិនតែប៉ុណ្ណោះទទួលបានការកោតសរសើរពីសំណាក់ថ្នាក់ដឹកនាំក្រសួងមហាផ្ទៃ ទោះបីអាក់ខានរយ:ពេលបីឆ្នាំយ៉ាងណាក្តី។
ជាមួយគ្នានោះដែរ ឯកឧត្តម នាយឧត្តមសេនីយ៍ សាន លុច អគ្គនាយករង នៃអគ្គនាយកដ្ឋានភស្ដុភារ និងហិរញ្ញវត្ថុ និងជាអនុប្រធានគណៈកម្មការរៀបចំចាត់ចែងការបណ្តែតប្រទីប បានធ្វើសេចក្ដីរាយការណ៍ពីស្ថានភាពការរៀបចំប្រទីប និងថ្លែងអំណរគុណចំពោះក្រុមការងារទាំងអស់ដែលបានលះបង់ពេលវេលា និងកម្លាំងកាយមកធ្វើការងារនេះឱ្យទទួលបានជោគជ័យ និងមានការកោតសរសើរផងដែរ។
នាឱកាសនោះដែរ ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ និងជាអនុប្រធានគណៈកម្មការរៀបចំចាត់ចែងការបណ្តែតប្រទីប បានមានមតិយោបល់លើកឡើងថា ឯកឧត្តម មានមោទកភាពណាស់ចំពោះក្រុមការងារធ្វើប្រទីបរបស់ក្រសួងមហាផ្ទៃ ដែលបំពេញតួនាទីជូបថ្នាក់ដឹកនាំប្រកបដោយជោគជ័យ។ ឯកឧត្តម ឧត្តមសេនីយ៍ឯក បានលើកឡើងបន្ថែមដែរថា ជាក់ស្តែងប្រទីបរបស់ក្រសួងមហាផ្ទៃដែលដាក់បង្ហាញជូនសាធារណជនទស្សនាក្នុងព្រះរាជពិធីបុណ្យអុំទូកកន្លងទៅនេះ គឺពិតជាស្រស់ស្អាត និងលេចធ្លោក្នុងចំណោមបណ្តាប្រទីបជាច្រើន ប៉ុន្តែប្រសិនបើមានការរចនា និងបញ្ចូលនូវបច្ចេកវិទ្យាទំនើបថ្មីបន្ថែមឱ្យស្របតាមបរិបទនៃយុគសម័យឌីជីថលនោះ ប្រទីបរបស់ក្រសួងមហាផ្ទៃនឹងកាន់តែស្រស់ស្អាត និងកាន់តែទាក់ទាញផងដែរ។
ជាថ្មីម្តងទៀត ឯកឧត្តម នាយឧត្តមសេនីយ៍ ប៉ោ ភក្ដិ រដ្ឋលេខាធិការ និងជាប្រធានគណៈកម្មការរៀបចំចាត់ចែងការបណ្ដែតប្រទីបរបស់ក្រសួងមហាផ្ទៃ បានថ្លែងអំណរគុណដល់សមាជិកគណៈកម្មការទាំងអស់ដែលបានយកចិត្តទុកដាក់ និងផ្ដល់យោបល់ដែលជាធាតុចូលសំខាន់ៗលើការកែលម្អ រចនាប្រទីបសម្រាប់ចូលរួមដាក់បង្ហាញជូនប្រជាពលរដ្ឋទស្សនានាឆ្នាំក្រោយផងដែរ។
សូមជម្រាបជូនដែរថា ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅរាជធានីភ្នំពេញ ពីថ្ងៃទី២៦-២៨ ខែវិច្ឆិកា ឆ្នាំ២០២៣ មានទូកចូលរួមប្រកួតចំនួន៣៣៨ទូក និងប្រទីបរបស់បណ្តាក្រសួងស្ថាប័ននានាមានចំនួន៣០ប្រទីប។ បន្ទាប់ពីខកខានដោយជំងឺកូវីដអស់រយៈពេល៣ឆ្នាំមកនេះ សម្រាប់ឆ្នាំ២០២៣នេះពិតជាមានភាពអធិកអធមនិងសប្បាយរីករាយយ៉ាងក្រៃលែង ព្រោះមានទាំងភ្ញៀវជាតិ និងអន្ដរជាតិដើរកំសាន្ដមានចំនួនរហូតរាប់លាននាក់។
ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ