នៅទីស្តីការក្រសួងមហាផ្ទៃ នាព្រឹកថ្ងៃព្រហស្បត្តិ៍ ទី៣០ ខែវិច្ឆិកា ឆ្នាំ២០២៣ ឯកឧត្តម ឈុន ប៊ុនណារ៉ា ប្រធានអង្គភាពគ្រប់គ្រង និង គាំទ្រកម្មវិធីនៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានអញ្ជើញដឹកនាំកិច្ចប្រជុំពិភាក្សាអំពីការរៀ បចំកម្មវិធីរយៈពេល៥ឆ្នាំ ស្តីពីការប្រែប្រួលអាកាសធាតុដំណាក់កាលទី២ (២០២៤-២០២៨) ដោយ មានការអញ្ជើញចូលរួមពី តំណាងក្រសួងស្ថាប័នពាក់ព័ន្ធ តំណាងដៃគូអភិវឌ្ឍន៍ អង្គការសង្គមស៊ីវិល និង ភាគីពាក់ព័ន្ធជាច្រើនរូបទៀត ។
ជាកិច្ចចាប់ផ្តើម ឯកឧត្តម ឈុន ប៊ុនណារ៉ា ប្រធានអង្គភាពគ្រប់គ្រង និងគាំទ្រកម្មវិធីនៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិ (គ.ជ.អ.ប) បានមានមតិបើកអង្គប្រជុំ និង បង្ហាញពីគោលបំណងនៃការរៀបចំកម្មវិធីរយៈពេល៥ឆ្នាំ ស្តីពីការប្រែប្រួលអាកាសធាតុដំណាក់កាលទី២ (២០២៤-២០២៨)នេះឡើង។
ឯកឧត្តម មានប្រសាសន៍ឱ្យដឹងថា កិច្ចប្រជុំនេះគឺដើម្បីពិនិត្យលទ្ធផលនៃការអនុវត្តកម្មវិធី រយៈពេល៥ឆ្នាំ(២០២១-២០២៥) ដែលបានអនុវត្តនាពេលកន្លងទៅ និងពិគ្រោះយោបល់ ប្រមូលធាតុចូលសម្រាប់រៀបចំកម្មវធីរយៈពេល៥ឆ្នាំ ពីការប្រែប្រួលអាកាសធាតុ ដំណាក់កាលទី២ ឱ្យទទួលបានលទ្ធផលកាន់តែល្អប្រសើរ។
នាឱកាសនោះដែរ លោក ឆេង វឌ្ឍនៈ អនុប្រធានអង្គភាពគ្រប់គ្រង និងគាំទ្រកម្មវិធីបានធ្វើបទបង្ហាញជូនអង្គប្រជុំទាំងមូលអំពីលទ្ធផលនៃការអនុវត្តកម្មវិធីរយៈពេល៥ឆ្នាំ ស្តីពីការប្រែប្រួលអាកាសធាតុដំណាក់កាលទី១(២០២១-២០២៥) ព្រមទាំងបង្ហាញអំពីដំណោះស្រាយ និងសេចក្តីណែនាំសម្រាប់ការរៀបចំកម្មវិធីរយៈពេល៥ ឆ្នាំ្តពីការប្រែប្រួលអាកាសធាតុ (២០២៤-២០២៨)។ ក្នុងនោះ លោក ឆេង វឌ្ឍនៈ បានធ្វើការពន្យល់ពីគោលបំណងរបស់គម្រោងនេះ ក្នុងន័យដើម្បីកាត់បន្ថយ ឬបន្សាំទៅនឹងអាកាសធាតុ រួមបញ្ចូលទាំងការបន្ស៊ីគម្រោងនេះជាមួយកម្មវិធីប្រទេសក្នុងក្របខណ្ឌមូលនិធីពីមូលនិធីអាកាសធាតុបៃតង(GCF)។
បន្ទាប់ពីការធ្វើបទបង្ហាញពីសំណាក់ លោកអនុប្រធានអង្គភាពគ្រប់គ្រង និង គាំទ្រកម្មវិធី ព្រមទាំងកិច្ចពិភាក្សា ពិគ្រោះយោបល់ និងផ្តល់ធាតុចូលរបស់អង្គប្រជុំទាំងមូលរួចហើយនោះ ឯកឧត្តម ឈុន ប៊ុនណារ៉ាមានប្រសាសន៍ បង្ហាញនូវក្តីសង្ឃឹម ក៏ដូចជាការរំពឹងទុកខ្ពស់ថា ក្រសួង-ស្ថាប័ន ដៃគូអភិវឌ្ឍន៍ និង អង្គការសង្គមស៊ីវិលពាក់ព័ន្ធយល់ច្បាស់អំពីដំណើការ និងនីតិវិធីសម្រាប់រៀបចំកម្មវិធីរយៈពេល៥ ឆ្នាំស្តីពីការប្រែប្រួលអាកាសធាតុ ដំណាក់កាលទី២ (២០២៤-២០២៨) ព្រមទាំងរួមគ្នាអនុវត្តគម្រោង នេះដើម្បីដោះស្រាយបញ្ហាប្រឈម ស្របតាមការបំរែបំរួលអាកាសធាតុដែលកម្ពុជាកំពុងជួបប្រទះ៕
ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ