នារសៀលថ្ងៃទី ២៦ ខែធ្នូ ឆ្នាំ ២០១៩ វគ្គបណ្តុះបណ្តាលស្តីពីការគ្រប់គ្រង ត្រួតពិនិត្យ និងទប់ស្កាត់ បង្ក្រាបការបង្វែរសារធាតុគីមីផ្សំយកទៅលួចលាក់សំយោគកែច្នៃផលិតគ្រឿងញៀនខុសច្បាប់ ត្រូវបានបិទបញ្ចប់ក្រោម អធិបតី ឯកឧត្តម ឧត្តមសេនីយ៍ឯក ឡាយ គឹមលី នាយកខុទ្ទកាល័យឯកឧត្តម ឧបនាយករដ្ឋមន្រ្តី កែ គីមយ៉ាន និងជាអគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន និងលោក គង់វីតាណ: អភិបាលរង ប្រធានលេខាធិការដ្ឋានគណ:កម្មាធិការត្រួតពិនិត្យគ្រឿងញៀនខេត្តព្រះសីហនុ ដោយមានការចែកវិញ្ញាបនបត្របញ្ជាក់ការសិក្សាជូនដល់សិក្ខាកាមជាមន្ត្រីអនុវត្តច្បាប់ពាក់ព័ន្ធ រួមមានមន្រ្តីនគរបាល កងរាជអាវុធហត្ថ គយ ប្រចាំការនៅតាមបណ្តាកំពង់ផែ ច្រកព្រំដែនគោក និងវរការពារព្រំដែនទឹក នៃខេត្តនាទិសនិរតីចំនួន៥ មាន: ខេត្តព្រះសីហនុ កោះកុង កំពត កែប និងតាកែវ។
ថ្លែងក្នុងនាមគណ:កម្មាធិការត្រួតពិនិត្យគ្រឿងញៀនខេត្តព្រះសីហនុ លោក គង់ វីតាណ: បានថ្លែងអំណរគុណដល់អាជ្ញាធរជាតិប្រយុទ្ធប្រឆាំងគ្រឿងញៀនដែលបានបង្កេីតវគ្គបណ្តុះបណ្តាលនេះឡេីង និងបានថ្លែងសាទរចំពោះសិក្ខាកាមទាំងអស់ដែលបានខិតខំរៀនសូត្រដកស្រង់បទពិសោធន៍ពង្រឹងសមត្ថភាពសម្រាប់បំពេញការងារប្រយុទ្ធប្រឆាំងគ្រឿងញៀនឲ្យមានប្រសិទ្ធភាព ហេីយការកសាងសមត្ថភាពមន្ត្រីអនុវត្តច្បាប់ គឺជាតម្រូវការចាំបាច់ ដែលទាមទារឲ្យមានការបំពាក់បំប៉ន និងបណ្តុះបណ្តាលជាប្រចាំដើម្បីវិវត្តន៍ខ្លួនឲ្យទាន់សភាពការណ៍ និងនិន្នាការប្រែប្រួលរបស់ក្រុមឧក្រិដ្ឋកម្មគ្រឿងញៀន។
ក្នុងឱកាសនោះ ផងដែរ ឯកឧត្តម ឧត្តមសេនីយ៍ឯក ឡាយ គឹមលី បានមានប្រសាសន៍ថា ប្រទេសកម្ពុជាមិនមែនជាប្រទេសផលិតគ្រឿងញៀនទេ តែជាប្រទេសទទួលរងឥទ្ធិពលនៃការចរាចរ ការផលិតគ្រឿងញៀនពីតំបន់ត្រីកោណមាស និងអឌ្ឍច័ន្ទមាសដែលតម្រូវឲ្យមានកិច្ចសហប្រតិបត្តិការអន្តរជាតិដេីម្បីត្រួតពិនិត្យ ទប់ស្កាត់ ការបង្វែរសារធាតុគីមីផ្សំខុសច្បាប់យកទៅកែច្នៃផលិតគ្រឿងញៀនខុសច្បាប់។
ជាមួយគ្នានេះ ឯកឧត្ដម ឧត្តមសេនីយ៍ឯក ឡាយ គឹមលី បានថ្លែងដោយសង្កត់ធ្ងន់ថា ការត្រួតពិនិត្យសារធាតុគីមីផ្សំមានប្រសិទ្ធភាពគឺទប់ស្កាត់បានការផលិតគ្រឿងញៀនខុសច្បាប់នៅក្នុងប្រទេស ព្រោះបើគ្មានសារធាតុគីមីផ្សំខុសច្បាប់ គឺគ្មានគ្រឿងញៀន ជាពិសេសបើយើងត្រួតពិនិត្យបានហ្មត់ចត់គឺឈ្មួញគ្រឿងញៀនគ្មានឱកាសនឹងបង្វែរយកទៅផលិតគ្រឿងញៀនខុសច្បាប់បំផ្លាញសង្គមបានឡើយ។
ទន្ទឹមនេះ ឯកឧត្តម ឧត្តមសេនីយ៍ឯក ឡាយ គឹមលី បានថ្លែងនូវការកោតសសេីរដល់ជ័យលាភីដែលបានបញ្ចប់វគ្គបណ្តុះបណ្តាលដោយជោគជ័យសូមយកចំណេះដឹងបទពិសោធន៍ដែលទទួលបាននេះទៅអនុវត្តការងាររបស់ខ្លួនឲ្យមានប្រសិទ្ធភាពខ្ពស់៕
ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន