ក្រោយជំនួបរវាងសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ជាមួយលោកជំទាវ Carmen Moreno ឯកអគ្គរដ្ឋទូតទើបតែងតាំងថ្មី នៃសហភាពអឺរ៉ុប នារសៀលថ្ងៃព្រហស្បតិ៍ ទី១៩ ខែធ្នូ ឆ្នាំ២០១៩ នៅទីស្តីការក្រសួងមហាផ្ទៃ ឯកឧត្តម ផាត សុផានិត អ្នកនាំពាក្យរង ក្រសួងមហាផ្ទៃ បានមានប្រសាសន៍ថា សហភាពអឺរ៉ុបបានកោតសរសើរចំពោះវឌ្ឍនភាពនៃការរីកចម្រើនរបស់កម្ពុជា ទាំងលើវិស័យសេដ្ឋកិច្ច និងសង្គម ។ ទន្ទឹមនេះ លោកជំទាវក៏បានថ្លែងនូវការកោតសរសើរកិច្ចខិតខំប្រឹងប្រែងក្នុងការលើកកម្ពស់ភាពជាដៃគូររវាងរាជរដ្ឋាភិបាល ជាមួយអង្គការសង្គមស៊ីវិល។ ឯកឧត្តមបន្តថា សហភាពអឺរ៉ុប ពិតជារីករាយ និងគាំទ្រចំពោះការចូលរួមចំណែកនៅក្នុងការងារនេះឲ្យបានកាន់តែល្អប្រសើរឡើងថែមទៀត។ ឯកឧត្តមបានគូសបញ្ជាក់បន្ថែមដែរថា រាជរដ្ឋាភិបាល តែងតែចាត់ទុកអង្គការសង្គមស៊ីវិល គឺជាដៃគូមួយដ៏សំខាន់របស់រាជរដ្ឋាភិបាល ក្នុងការចូលរួមចំណែកអភិវឌ្ឍសង្គមជាតិ។ ជាក់ស្តែងក្រសួងមហាផ្ទៃ បានរៀបចំវេទិការភាពជាដៃគូរវាងរាជរដ្ឋាភិបាល ជាមួយអង្គការសង្គមស៊ីវិល ចំនួន០៣លើករួចមកហើយ ដែលនេះបង្ហាញអោយឃើញការខិតខំក្នុងការលើកកម្ពស់ភាពជាដៃគូរជាមួយគ្នា៕ គឹមអាន
ដោយ៖ នាយកដ្ឋានព័ត៌មានវិទ្យា