សម្តេចក្រឡាហោម ស ខេង នាយករដ្ឋមន្ត្រីស្តីទី បានស្នើដល់ធនាគារពិភពលោក ជួយគាំទ្រភ្ជាប់ការងារគ្រប់គ្រងកាក់សំណល់រឹងនេះ ទៅនឹងកំណែទម្រង់រដ្ឋបាលថ្នាក់ក្រោមជាតិ ដើម្បីផ្ទេរអំណាច និងសិទ្ធក្នុងការគ្រប់គ្រងកាក់សំណល់នេះទៅដល់រដ្ឋបាលថ្នាក់ក្រោមជាតិ និងផ្សារភ្ជាប់ការផ្ទេរធនធានហិរញ្ញវត្ថុ និងធនធានមនុស្សទៅដល់រដ្ឋបាលថ្នាក់ក្រោមជាតិផងដែរ។ សម្តេចក្រឡាហោម បានមានប្រសាសន៍ដូច្នេះក្នុងឱកាស សម្តេចអនុញ្ញាតអោយលោក Chritophe Crepin នាយកប្រតិបត្តិផ្នែកបរិស្ថាន និងធនធានធម្មជាតិ នៃធនាគារពិភពលោក ចូលជួបសម្ដែងគួរសម និងពិភាក្សាការងារនាព្រឹកថ្ងៃចន្ទ ទី០៤ ខែវិចិ្ឆការ ឆ្នាំ២០១៩ នៅទីស្ដីការក្រសួងមហាផ្ទៃ។
សម្តេចក្រឡាហោមបានបន្តថា ក្រសួងមហាផ្ទៃ ការងារពាក់ព័ន្ធធំៗចំនួនពីរ៖ ដែលទីមួយគឺកិច្ចគាំទ្រដល់ស្ថាប័នថ្នាក់ក្រោមជាតិ និងទីពីរគឺក្រសួងមហាផ្ទៃក៏ជាស្ថាប័ននាំមុខក្នុងការកំណែទម្រង់វិមជ្ឈការ និងវិសហមជ្ឈការផងដែរ។ សម្តេចបន្ថែមថា ក្នុងនាមសម្តេចជាអ្នកដឹកនាំក្នុងការងារកំណែទម្រង់នេះ សម្តេចពិតជាចង់ឃើញរដ្ឋបាលថ្នាក់ក្រោមជាតិមានសមត្ថភាព និងលទ្ធភាពគ្រប់គ្រាន់ក្នុងការដោះស្រាយ ការគ្រប់គ្រងកាក់សំណល់នៅរដ្ឋបាលថ្នាក់ក្រោមជាតិនេះ។ លើសពីនេះ សម្តេចក្រឡាហោម នឹងជំរុញអោយខេត្តក្រុងមួយចំនួនឲ្យដាក់ពាក្យចូលរួម ក្នុងគម្រោងការគ្រប់គ្រងកាក់សំណល់រឹងនេះ ជាងនេះទៅទៀតសម្តេចក្រឡាហោមក៏បានស្នើដល់ធនាគារពិភពលោក ធ្វើការជាមួយគណៈកម្មការគ្រប់គ្រងតំបន់ឆ្នេររបស់កម្ពុជាដែលជាយន្តការមានស្រាប់ ដើម្បីគ្រប់គ្រងបញ្ហាកាក់សំណល់ និងបរិស្ថានដើម្បីធានាដល់ការអភិវឌ្ឍប្រកបដោយចីរភាពរបស់កម្ពុជាផងដែរ។
សូមបញ្ជាក់ដែរថា នៅឆ្នាំ២០២០ខាងមុខនេះគឺជាឆ្នាំចុងក្រោយនៃការអនុវត្តផែនការ១០ឆ្នាំនៃកំណែទម្រង់រដ្ឋបាលថា្នក់ក្រោមជាតិរបស់កម្ពុជា ដែលកន្លងមកនេះរាជរដ្ឋាភិបាលក៏បានសម្រេចផ្ទេរសិទ្ធិអំណាចមួយចំនួនទៅដល់រដ្ឋបាលថ្នាក់ក្រោមជាតិ ដូចជា ការគ្រប់គ្រងសាលារៀនកម្រិតបឋមសិក្សា ការគ្រប់គ្រងមន្ទីរពេទ្របង្អែក ប៉ុស្តិ៍សុខភាពមួយចំនួនទៅឲ្យរដ្ឋបាលថ្នាក់ក្រោមជាតិ ដោយមានខេត្តបាត់ដំបង គឺជាខេត្តសាកល្បង៕ គឹមអាន
ដោយ៖ នាយកដ្ឋានព័ត៌មានវិទ្យា