នាព្រឹកថ្ងៃចន្ទ ទី០៥ ខែសីហា ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញចូលរួមក្នុងពិធីប្រគល់សញ្ញាបត្រ ថ្នាក់បរិញ្ញាបត្រជាន់ខ្ពស់ ថ្នាក់បរិញ្ញាបត្រ និងវិញ្ញាបនបត្រ ដល់និស្សិតនាយនគរបាលបន្តវេន និងសិក្ខាកាមជ័យលាភី ១,៤៦៥នាក់ នៅបណ្ឌិត្យសភានគរបាលកម្ពុជា។
សូមបញ្ជាក់ដែរថា និស្សិត និងសិក្ខាកាមជាមន្ត្រីនគរបាលដែលនឹងទទួលបានសញ្ញាបត្រ និងវិញ្ញាបនបត្រនៅថ្ងៃនេះរួមមាន៖ ថ្នាក់បរិញ្ញាបត្រជាន់ខ្ពស់ ចំនួន ១៨០នាក់ នារី ០៧នាក់, បរិញ្ញាបត្រ ចំនួន ៣១៩នាក់ នារី ៤០នាក់, សិក្ខាកាមថ្នាក់វិញ្ញាបនបត្រ ចំនួន ៩៦៦នាក់ នារី ៥៥នាក់។
បណ្ឌិត្យសភានរគបាលកម្ពុជា គឺជាស្ថាប័នចំណុះឱ្យក្រសួងមហាផ្ទៃដែលបានធ្វើសកម្មភាពយ៉ាងសកម្មក្នុងការបណ្តុះបណ្តាលមន្ត្រីនគរបាល និងមន្ត្រីពន្ធនាគារ ដើម្បីលើកកម្ពស់គុណភាព និងសមត្ថភាពវិជ្ជាជីវៈមន្ត្រីនគរបាលជាតិ និងមន្ត្រីពន្ធនាគារទូទាំងប្រទេសស្របតាមតម្រូវការរបស់សង្គមជាតិ និងស្តង់ដារគុណភាពដែលបានកំណត់ ដែលក្នុងនោះរួមមាន៖
១.ថ្នាក់បរិញ្ញាបត្រជាន់ខ្ពស់ និងថ្នាក់បរិញ្ញាបត្រលើជំនាញនគរបាលយុត្តិធម៌ ជំនាញសណ្ដាប់ធ្នាប់សាធារណៈ ជំនាញសន្តិសុខ ជំនាញនគរបាលព្រំដែន ជំនាញអន្តោប្រវេសន៍ ជំនាញអត្តសញ្ញាណកម្ម ជំនាញគ្រប់គ្រងដឹកនាំបញ្ជាជំនាញគ្រប់គ្រងពន្ធនាគារ និងជំនាញព័ត៌មានវិទ្យា និងភាសាបរទេស ចាប់ពីឆ្នាំ ២០០៧ រហូតដល់ឆ្នាំ២០១៩ ឆមាសទី១ក្នុងរយៈពេល១២ឆ្នាំចំនួននិស្សិតនាយនគរបាលបន្តវេនជ័យលាភីចំនួនសរុប ២៣៩៧នាក់ ក្នុងនោះនិស្សិតជ័យលាភីដែលត្រូវទទួលសញ្ញាបត្រថ្ងៃនេះមានចំនួន៤៩៥៤ នាក់ ដែលមានថ្នាក់បរិញ្ញាបត្រជាន់ខ្ពស់ជំនាន់ទី ៥-៦ សរុបចំនួន១៨០នាក់ថ្នាក់បរិញ្ញាបត្រជំនាន់ទី៥-៦-៧-៨ និង ថ្នាក់បរិញ្ញាបត្រភាសាអង់គ្លេសជំនាន់ទី១ សរុបចំនួន៣១៩នាក់។
២.វគ្គបណ្ដុះបណ្ដាលបំប៉នជំនាញឯកទេសខ្លីៗសម្រាប់សិក្ខាកាម និងសិស្សនាយនគរបាល និងនាយនគរបាលរងចាប់ពីឆ្នាំ២០០៧រហូតដល់ឆ្នាំ២០១៩ឆមាសទី១ក្នុងរយៈពេល១២ឆ្នាំ ចំនួនសរុប ៤២.៥២៣នាក់ ក្នុងនោះសិក្ខាកាមជ័យលាភីដែលត្រូវទទួលវិញ្ញាបនបត្រនាពេលនេះចំនួន៩៦៦នាក់។ ដោយឡែកក្នុងឆមាសទី២ ឆ្នាំ២០១៩នេះ មាននិស្សិតចំនួន ៦១២នាក់ សិក្ខាកាមចំនួន៥០៦នាក់ និងសិស្សនាយនគរបាល និងនាយនគរបាលរងកំពុងសិក្សានៅតាមសាលានគរបាលជាតិភូមិភាគទាំង៦ ចំនួន៨៩៥នាក់៕ គឹមអាន
ដោយ៖នាយកដ្ឋានព័ត៌មានវិទ្យា
