នារសៀលថ្ងៃព្រហស្បតិ៍ ២កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៧ ខែមីនា ឆ្នាំ២០១៩ ក្រសួងមហាផ្ទៃ បានប្រារព្ធពិធីអបអរសាទរទិវានារីអន្តរជាតិ ៨ មីនា ក្រោមប្រធានបទ “ លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍន៍ធនធានមនុស្ស ” នៅទីស្តីការក្រសួង ក្រោមអធិបតីដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តី ក្រសួងមហាផ្ទៃ ព្រមទាំងលោកជំទាវ ដោយមានការចូលរួមពីថា្នក់ដឹកនាំក្រសួងនានា និងថ្នាក់ដឹកនាំក្រសួងមហាផ្ទៃ ព្រមទាំងមន្រ្តីនគរបាលជាន់ខ្ពស់ជាស្រ្តីជាច្រើនផងដែរ។
លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាប្រធានក្រុមការងារយេនឌ័រ ក្រសួងមហាផ្ទៃ បានមានប្រសាសន៍ថា ក្រោមការដឹកនាំរបស់សម្តេចក្រឡាហោម ឧបនាយករដ្ឋមន្រ្តី បានផ្តល់ឱកាសដល់ស្រ្តីដែលជាមន្រ្តីនៅក្នុងក្រសួងមហាផ្ទៃ ដើម្បីទទួលបានឱកាសការងារសំខាន់ៗជាច្រើន និងតួនាទីភារកិច្ចជាថ្នាក់ដឹកនាំនៅតាមបណ្តាអគ្គនាយកដ្ឋានដូចបុរសដែរ។ លោកជំទាវបន្តថា ជាក់ស្តែងថ្នាក់ដឹកនាំជាច្រើនដែលជាស្រ្តីនៅតាមអគ្គនាយកដ្ឋានទាំងអស់ចំណុះអោយក្រសួង ដែលបានបញ្ជាក់អោយឃើញថាសកម្មភាពការលើកកម្ពស់យេនឌ័រត្រូវបានអនុវត្តប្រកបដោយជោគជ័យ។ លោកជំទាវ លើកឡើងថា ស្ថានភាពក្របខណ្ឌមន្ត្រីរាជការស៊ីវិល និងមន្ត្រីពន្ធនាគារ មានចំនួនសរុប១៣,២៤១រូប ស្ត្រី៣,៣០០រូប ដែលក្នុងនោះរួមមាន មន្ត្រីរាជការស៊ីវិល ថ្នាក់ជាតិ មាន៩៩១រូប ស្តី២២៧រូប ស្មើនឹង២២.៩%, ថ្នាក់ក្រោមជាតិ មាន៩,៣៣៥រូប ស្តី២,៦៨២រូប ស្មើនឹង២៨.៧% (ប្រៀបធៀបនឹងឆ្នាំ២០១៧ មានការកើនឡើងមន្ត្រីជាស្ពី ០.៦%)។ មន្ត្រីពន្ធនាគារ៖ ថ្នាក់ជាតិ មាន១,១៨៣រូប ស្រ្តី១៨៥រូប ស្មើនឹង១៥.៦៤% ក្នុងនោះ ថ្នាក់ក្រោមជាតិ មាន១,៧៣២រូប ស្រ្តី២០៦រូប ស្មើនឹង១១.៩០% (ប្រៀបធៀបនឹងឆ្នាំ២០១៧ មានការកើនឡើងមន្ត្រីជាស្ត្រី២៧%)។ ការបញ្ចូលក្របខណ្ឌថ្មី (ទាំងមន្ត្រីរាជការស៊ីវិល និងពន្ធនាគារ) សរុបចំនួន៤៩៧រូប ស្ដី១១៦រូប និងសម្រេចតែងតាំងប្រគល់ភារកិច្ច ផ្ទេរភារកិច្ច ទាំងថ្នាក់ជាតិ និងថ្នាក់ក្រោមជាតិសរុប១,៥២រូប ស្រ្តី២៧៣រូបក្នុងនោះ ថ្នាក់ជាតិ មាន២៥៦រូប ស្ត្រី៦៤រូប។ លោកជំទាវបានបន្ដថា ស្ថានភាពក្របខណ្ឌមន្ត្រីនគរបាលជាតិ មានចំនួនសរុប៥៨,១៨៣រូប ស្រ្តីមាន៤,៣២៩រូប ស្មើនឹង ៧.៤% ក្នុងនោះមន្ត្រីនគរបាលជាតិ ថ្នាក់ជាតិ ស្ដ្រី១,៥០២រូប លើ១៨,៤៩៩ ស្មើនឹង៨.១១% និងថ្នាក់ក្រោមជាតិ ស្ដ្រី២.៨២៧រូប លើ៣៩,៦៨៤រូបស្មើនឹង៧.១២% (ប្រៀបធៀបនឹងឆ្នាំ២០១៧ មានការកើនឡើងមន្ត្រីជាស្ត្រី ១០.០៧%)៕ គឹមអាន
ដោយ៖ នាយកដ្ឋានព័ត៌មានវិទ្យា