ក្រោមបញ្ចប់ពិធីចុះហត្ថលេខាលើកំណត់ហេតុ ស្ដីពីកិច្ចសហប្រតិបត្តិការ ឆ្នាំ២០១៩ រវាងក្រសួងមហាផ្ទៃ នៃព្រះរាជាណាចក្រកម្ពុជា ជាមួយក្រសួងសន្តិសុខសាធារណៈនៃសាធារណរដ្ឋប្រជាធិបតេយ្យប្រជាមានិតឡាវ ឯកឧត្តម ឧត្តមសេនីយ៍ឯក ផាត សុផានិត អ្នកនាំពាក្យរងក្រសួងមហាផ្ទៃ បានមានប្រសាសាន៍ថា កម្ពុជា-ឡាវ បេ្តជ្ញាបន្តពង្រឹងកិច្ចសហប្រតិបត្តិការរួមគ្នាឲ្យកាន់តែរឹងមាំបន្ថែមទៀត លើវិស័យជាច្រើន ពិសេសលើវិស័យសន្តិសុខសាធារណៈ ដើម្បីជាប្រយោជន៍រួមសម្រាប់ភាគីទាំងពីរ និងបង្កភាពងាយស្រួលក្នុងការធ្វើដំណើរ ផ្លាស់ប្ដូរគណៈប្រតិភូ ការផ្លាស់ប្ដូរពាណិជ្ជកម្ម ដែលស្របតាមកិច្ចព្រមព្រៀងក្នុងកំណត់ហេតុដែលបានចុះហត្ថលេខានេះ។ ឯកឧត្តមបន្តថា ភាគីទាំងពីរបន្តពង្រឹងការផ្លាស់ប្តូរព័ត៌មានទៅវិញទៅមក កិច្ចសហប្រតិបត្តិការលើវិស័យសន្តិសុខ កិច្ចសហប្រតិបត្តិការលើការងារបណ្តុះបណ្តាលធនធានមនុស្ស និងបន្តជំរុញបណ្តាខេត្តជាប់ព្រំដែននៃប្រទេសទាំងពីរអោយកាន់តែជិតស្និតបន្ថែមទៀត។ ឯកឧត្តមបន្ថែមថា ចំពោះបញ្ហាគ្រឿងញៀន ភាគីទាំងពីរបានធ្វើការប្ដេជ្ញាចិត្តរួមគ្នាផងដែរ លើការបង្ការ បង្ក្រាប និងទប់ស្កាត់ ដោយធ្វើយ៉ាងណា មិនឲ្យបញ្ហាគ្រឿងញៀនមកគ្រប់ដណ្ដប់លើប្រជាជនប្រទេសទាំងពីរនោះឡើយ ដោយសម្តេចក្រឡាហោមបានមានប្រសាសន៍ថា មិនត្រូវអោយគ្រឿងញៀនមកត្រួតត្រាយើងទេ គឺយើងជាអាជ្ញាធរមានសមត្ថកិច្ចត្រូវតែត្រួតត្រាគ្រឿងញៀនវិញ។ ឯកឧត្តមបញ្ជាក់បន្ថែមថា ភាគីទាំងពីរនៅតែបន្ដរួមគ្នា ខិតខំបង្ក្រាប និងទប់ស្កាត់រាល់បទល្មើសផ្សេងៗ ដែលកើតឡើងនៅតាមព្រំដែនប្រទេសទាំងពីរ ដើម្បីរក្សាសន្ដិសុខ សណ្ដាប់ធ្នាប់ ជូនជាតិ និងប្រជាជនផងដែរ។ ឯកឧត្តម ឧត្តមសេនីយ៍ឯក បានបន្តទៀតថា ភាគីទាំងពីរឯកភាពពិនិត្យលទ្ធភាពសិក្សាបង្កេីតច្រកទ្វារព្រំដែនអន្ដរជាតិបន្ថែមទៀត ដើម្បីសម្រួលដល់ការធ្វើដំណើររបស់ប្រជាពលរដ្ឋ ដែលបច្ចុប្បន្ន ច្រកអន្ដរជាតិរួមគ្នារវាងកម្ពុជា-ឡាវ មានតែច្រកត្រពាំងគ្រៀល-ណងណុងឃៀន ដែលស្ថិតនៅក្នុងខេត្តស្ទឹងត្រែងតែប៉ុណ្ណោះ៕ គឹមអាន
ដោយ៖ នាយកដ្ឋានព័ត៌មានវិទ្យា