នៅរសៀលថ្ងៃចន្ទ ១៣រោច ខែមាឃ ឆ្នាំច សំរឹទ្ធិស័ក ព.ស ២៥៦២ត្រូវនឹងថ្ងៃទី៤ ខែមីនា ឆ្នាំ២០១៩ នាទីស្តីការក្រសួង សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតឲ្យ ឯកឧត្តម Hoong Wee Tech អគ្គស្នងការនៃកងកម្លាំងនគរបាលសឹង្ហបុរី ចូលជួបសម្តែងការគួរសម និងពិភាក្សាការងារ។
ឯកឧត្តម ឧត្តមសេនីយ៍ឯក ផាត សុផានិត អ្នកនាំពាក្យរងក្រសួងមហាផ្ទៃ បានមានប្រសាសន៍ក្រោមបញ្ចប់ជំនួបឲ្យដឹងថា សម្តេចក្រឡាហោម ស ខេងកោតសរសើរដល់កងកម្លាំងនគរបាលសឹង្ហបុរីដែលបានខិតខំបំពេញភារកិច្ចយ៉ាងល្អប្រសើរជូនសង្គមជាតិ ដែលជាកត្តារួមចំណែកយ៉ាងសំខាន់មួយក្នុងការអភិវឌ្ឍសេដ្ឋកិច្ចរបស់ប្រទេសសឹង្ហបុរី។ សម្តេចក្រឡាហោមបានថ្លែងអំណរគុណចំពោះរដ្ឋាភិបាល និងនគរបាលសឹង្ហបុរី ដែលបានបន្តជួយគាំទ្រដល់ការបណ្តុះបណ្តាលធនធានមនុស្សកម្ពុជា ពិសេសគឺកងកម្លាំងនគរបាលជាតិកម្ពុជា។
ឯកឧត្តម ឧត្តមសេនីយ៍ឯក ផាត សុផានិត បន្តបញ្ជាក់ឲ្យដឹងថា គោលបំណងក្នុងដំណើរទស្សនកិច្ចក្នុងឱកាសនេះរបស់ ឯកឧត្តម Hoong Wee Tech អគ្គស្នងការនៃកងកម្លាំងនគរបាលសឹង្ហបុរី គឺដើម្បីជួបពិភាក្សាការងារ ជាមួយអគ្គស្នងការដ្ឋាននគរបាលលជាតិនៅលើបញ្ហាសំខាន់ៗមួយចំនួន ក្នុងនោះរួមមាន ការផ្លាស់ប្តូរគណៈប្រតិភូគ្នាទៅវិញទៅមក ហើយការបន្តពង្រឹកនិងពង្រីកការងារបណ្តុះបណ្តាលមន្រ្តីនៅប្រទេសសឹង្ហបុរី ក៏ដូចនៅប្រទេសកម្ពុជា។ ឯកឧត្តម Hoong Wee Tech បានបន្ថែមទៀតថា តាមរយៈលទ្ធផលនៃជំនួបពិភាក្សាជាមួយអគ្គស្នងការដ្ឋាននគរបាលជាតិគឺទទួលបានលទ្ធផលប្រសើរ។ ឯកឧត្តម អគ្គស្នងការនៃកងកម្លាំងនគរបាលសឹង្ហបុរី សូមកោតសរសើដល់នគរបាលជាតិកម្ពុជាដែលបានទទួលការបណ្តុះបណ្តាលនៅប្រទេសសឹង្ហបុរី ដែលពួកគេមានការប្តេជ្ញាចិត្តខ្ពស់ក្នុងការសិក្សារៀនសូត្រ ហើយក្រោយការបញ្ចប់ការសិក្សាពួកគេបានចូលរួមបំពេញការងារប្រកបដោយប្រសិទ្ធភាពនៅក្នុងស្ថាប័នដែលបញ្ជូនពួកគេទៅធ្វើការបណ្តុះបណ្តាលនោះ។
ជាចុងបញ្ចប់ សម្តេចក្រឡាហោម បានស្នើដល់ភាគីសឹង្ហបុរីបន្តពិនិត្យលទ្ធភាពពង្រីកវិសាលភាពនៃកិច្ចសហប្រតិបត្តិការនេះបន្ថែមទៀតរវាងកងកម្លាំងអនុវត្តច្បាប់នៃប្រទេសទាំងពីរ ប្រសិនមានអ្វីដែលភាគីសឹង្ហបុរីយល់ឃើញថាមានសារប្រយោជន៍ដល់ប្រទេសទាំងពីរគឺយើងអាចពិនិត្យលទ្ធភាពជជែក ដើម្បីធ្វើការបន្ថែមនៅលើអ្វីដែលយើងមានស្រាប់៕ គឹមអាន
ដោយ៖ នាយកដ្ឋានព័ត៌មានវិទ្យា
