នៅព្រឹកថ្ងៃទី០៩ ខែវិច្ឆិកា ឆ្នាំ២០១៧ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអញ្ជើញចូលរួមអមព្រះរាជដំណើរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ស្តេចយាងប្រទានកម្រងផ្កាគោរពវិញ្ញាណក្ខន្ធ និងប្រទានភ្លើងជ័យ និងដឹកនាំគណៈប្រតិភូក្រសួងមហាផ្ទៃ ទាំងកងកម្លាំងនិងមន្ត្រីរដ្ឋបាលស៊ីវិលចំនួន ៥០រូប ដើម្បីចូលរួមដង្ហែអមដំណើរព្រះមហាក្សត្រក្នុងពិធីប្រទានភ្លើងជ័យនៅវិមានឯករាជ្យ នៃខួបអនុស្សាវរីយ៍លើកទី៦៤ នៃទិវាបុណ្យឯករាជ្យជាតិ ៩ វិច្ឆិកា ឆ្នាំ២០១៧ និងថ្វាយកម្រងផ្កាគោរពព្រះវិញ្ញាណក្ខន្ធព្រះករុណា ព្រះបាទសម្ដេច ព្រះនរោត្ដម សីហនុ "ព្រះបរមរតនកោដ្ឋ" ជាអតីតព្រះមហាក្សត្រនៃព្រះរាជាណាចក្រកម្ពុជា ដែលបានទាមទារឯករាជ្យពីអាណានិគមបារាំងនៅឆ្នាំ១៩៥៣ ។ ក្នុងពិធីបុណ្យទិវាឯករាជ្យជាតិ ៩ វិច្ឆិកា ឆ្នាំ២០១៧នេះ មានការចូលរួមពីថ្នាក់ដឹកនាំកំពូលនៃប្រទេសកម្ពុជា និងបណ្តាស្ថាប័នរដ្ឋទាំងអស់ ស្ថានទូតនានា អាជ្ញាធរ កងកម្លាំង មន្ត្រីស៊ីវិលគ្រប់លំដាប់ថ្នាក់ សិស្សានុសិស្ស ប្រជាពលរដ្ឋ និងស្ថាប័នព័ត៌មានជាតិ អន្តរជាតិ ចំនួនសរុបប្រមាណជាង ៣៥៣០០នាក់៕
