បន្ទាយមានជ័យ:វគ្គបណ្តុះបណ្តាលស្តីពី ’’ការពង្រឹងសមត្ថភាពមន្ត្រីអនុវត្តន៍ច្បាប់ជួរមុខ’’ សម្រាប់មន្ត្រីអនុវត្តច្បាប់ជួរមុខខេត្តបន្ទាយមានជ័យ និងខេត្តឧត្តរមានជ័យ បានបិទបញ្ចប់ហេីយនៅថ្ងៃទី២៥ ខែវិច្ឆិកា ឆ្នាំ២០២០ ក្រោមអធិបតីភាពឯកឧត្ដម អ៊ុំ រាត្រី អភិបាល និងជាប្រធានគណ:កម្មាធិការត្រួតពិនិត្យគ្រឿងញៀនខេត្តបន្ទាយមានជ័យ និងឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន។
លោក ឆាវ៉ាលុត ថុងជាវ ទីប្រឹក្សាអមស្ថានទូតថៃទទួលបន្ទុកគ្រឿងញៀន មានប្រសាសន៍ថា "គ្មានសារធាតុគីមីផ្សំ គ្មានគ្រឿងញៀន " ហេីយការផ្លាស់ប្ដូរព័ត៌មានគ្នាក្រោមកិច្ចសហការរួមគ្នាពីបណ្តាប្រទេសជិតខាងជាកត្តានាំឲ្យយេីងអាចកាត់បន្ថយ និងគ្រប់គ្រងបាននូវការលួចបង្វែរសារធាតុគីមីផ្សំទៅកែឆ្នៃជាគ្រឿងញៀនខុសច្បាប់។
ថ្លែងក្នុងនាមឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ក្នុងឱកាសនោះ ឯកឧត្ដម ឧត្តមសេនីយ៍ឯក នាក់ យុទ្ធា អគ្គលេខាធិការរង បានថ្លែងថា ដោយបានក្រើនរំលឹកដល់មន្ត្រីអនុវត្តច្បាប់ពាក់ព័ន្ធទាំងអស់ត្រូវបន្តខិតខំបំពេញភារកិច្ចរបស់ខ្លួនប្រកបដោយឆន្ទះ ម៉ឺងម៉ាត់ វៃឆ្លាត មានមនសិកាវិជ្ជាជីវៈនិងការទទួលខុសត្រូវហើយត្រូវបន្តសិក្សាស្វែងយល់បន្ថែមចំណេះដឹង និងបទពិសោធន៍ ពិសេសកលល្បិចរបស់ឧក្រិដ្ឋជន និងវិធីសាស្ត្ររបស់សមត្ថកិច្ចក្នុងការបង្ក្រាបបទល្មេីសគ្រឿងញៀន ហើយត្រូវចាំថា ទន្ទឹមនឹងបេសកកម្មជោគជ័យត្រូវតែធានាថាមន្រ្តីរបស់យេីងមានសុវត្ថិភាពទាំងអស់គ្នា។ ជាមួយនេះរាល់ការបេសកកម្មត្រូវតែពង្រឹងកិច្ចសហការជាមួយអង្គភាព រដ្ឋបាលដែនដីពាក់ព័ន្ធក្នុងភូមិសាស្រ្តដែលខ្លួនឈរជើងសំដៅបង្កើនប្រសិទ្ធភាពការងារ ហេីយត្រូវពង្រឹងយន្តការនិងប្រសិទ្ធភាពការងារ ការិយាល័យទំនាក់ទំនងព្រំដែន BLO ទំនាក់ទំនងផ្លាស់ប្តូរព័ត៌មានជាប្រចាំ ទាន់ពេលវេលានិងច្បាស់លាស់ពីផ្លូវចរាចរនិងមុខសញ្ញាជនសង្ស័យ ជាមួយBLOដៃគូរបស់ប្រទេសជិតខាង។
ក្នុងឱកាសនោះដែរ ឯកឧត្តម អ៊ុំ រាត្រី អភិបាលខេត្ត បានថ្លែងដោយបានអរគុណដល់អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀននិងក្រុមប្រឹក្សាត្រួតពិនិត្យគ្រឿងញៀនថៃ ONCB ដែលបានបង្កេីតវគ្គបណ្តុះបណ្តាលដ៏មានសារ:សំខាន់នេះ និងបានផ្តាំផ្ញើដល់សិក្ខាកាមទាំងអស់ត្រូវនាំយកនូវរាល់ចំណេះដឹងថ្មីៗ បទពិសោធន៍ល្អពីវគ្គបណ្តុះបណ្តាលនេះទៅអនុវត្តបង្កេីនប្រសិទ្ធភាពការងារ និងចែករំលែក ផ្សព្វផ្សាយបន្តជូនដល់សហការីរបស់ខ្លួនក្នុងស្មារតីរួម គោលដៅតែមួយរួមគ្នាប្រយុទ្ធប្រឆាំងគ្រឿងញៀននៅក្នុងមូលដ្ឋានបង្កេីនទំនុកចិត្តនិងភាពសុខសាន្តជូនដល់ប្រជាពលរដ្ឋយេីង។
សូមបញ្ជាក់ថា បណ្តុះបណ្តាលខាងលេី រៀបចំឡេីងមានរយ:ពេល០៣ថ្ងៃ ចាប់ពីថ្ងៃទី២៣-២៥ ខែវិច្ឆិកា ឆ្នាំ២០២០)៕
ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន
