ភ្នំពេញ ៖ នៅព្រឹកថ្ងៃទី១៧ ខែមិថុនាឆ្នាំ២០២០នេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអញ្ជើញដឹកនាំកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំឆមាសទី១ និងដាក់ចេញទិសដៅការងារប្រចាំឆមាសទី២ ឆ្នាំ២០២០។ កិច្ចប្រជុំប្រារព្ធធ្វើឡើងនៅសាលប្រជុំអគ្គស្នងការដ្ឋាននគរបាលជាតិ ដោយមានការចូលរួមពី ឯកឧត្តម លោកជំទាវ អគ្គស្នងការរង ប្រធាននាយកដ្ឋាន-អង្គភាព និងស្នងការទាំង២៥រាជធានី-ខេត្ត។

      ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានលើកឡើងក្នុងអង្គប្រជុំថា ដើម្បីពង្រឹងបន្ថែមសុវត្ថិភាព សន្តិសុខ និងសណ្តាប់ធ្នាប់ សម្រាប់ឆមាសទី២នេះ នាយកដ្ឋាន-អង្គភាព និងស្នងការរាជធានី-ខេត្តទាំងអស់ ត្រូវផ្តោតសំខាន់លើការងារមួយចំនួនដូចជា៖ 
ទី១-ពង្រឹងភារកិច្ចរួមដោយប្តេជ្ញាការពារ ជាតិ សាសនា ព្រះមហាក្សត្រ ការពាររដ្ឋធម្មនុញ្ញ និងការពាររាជរដ្ឋាភិបាលស្របច្បាប់។
ទី២-ការពារបូរណភាពទឹកដី និងអធិបតេយ្យភាពជាតិ ជាពិសេសប្តេជ្ញាចិត្តទប់ស្តាត់មិនឲ្យកើតមានឡើងវិញនូវសកម្មភាពរឺឧបាលកលបដិវត្តន៍ពណ៌កើតមាននៅក្នុងប្រទេសកម្ពុជា។
ទី៣-ជម្រុញ និងអនុវត្តន៍ទៅតាមគោលនោបាយរបស់រាជរដ្ឋាភិបាល ជាពិសេសគោលនយោបាយភូមិ-ឃុំមានសុវត្ថិភាព ដែលជាសសរស្តមនៃខឿនសន្តិសុខជាតិ។
ទី៤-ជម្រុញអនុវត្តន៍ផែនការសកម្មភាពដែលបានដាក់ចេញសប្រាប់ឆ្នាំ២០២០ របស់អគ្គស្នងការដ្ឋាននគរបាលជាតិ។ 

      ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន បានផ្តោត និងស្នើឲ្យពង្រឹងបន្ថែមលើការងារ៤ សម្រាប់ផែនជំនាញសន្តិសុខ ជាពិសេសបង្ក្រាបឲ្យបាននូវគ្រប់សភាពការណ៍ បញ្ចៀសឲ្យបាននូវអំពើភេរវកម្ម ទប់ស្តាត់ឲ្យបាននូវគ្រប់ឧបាយកលបង្កវិទ្ធង្សនា រឺ វិច្ឆេទកម្មប្រឆាំង រឺ ប៉ុនប៉ងផ្តួលរំលំរាជរដ្ឋាភិបាល ដោយពង្រឹងការងារឲ្យបានច្បាស់លាស់តាំងពីថ្នាក់លើរហូតដល់ថ្នាក់មូលដ្ឋាន។ ចំណុចសំខាន់ពាក់ព័ន្ធនិងការងារសន្តិសុខនេះដែរ ឯកឧត្តម ក៏បានសង្កត់ធ្ងន់អំពីការងារប្រយុទ្ធប្រឆាំងការសម្អាតប្រាក់ និងហិរញ្ញទានភេរវកម្ម ដោយជម្រុញឡើងវិញនូវយន្តការដើម្បីប្រតិបត្តិ សំដៅរកឲ្យឃើញនូវផលសំអាងនៃបទល្មើស ពាក់ព័ន្ធករណីគ្រឿងញៀន បទល្មើសសេដ្ឋកិច្ច និងបទឧក្រិដ្ឋនានាបន្ថែមទៀត។

      ពាក់ព័ន្ធនិងការងារប្រឆាំងបទល្មើស ឯកឧត្តមអគ្គស្នងការនគរបាលជាតិ បានណែនាំត្រូវរួមគ្នាប្តេជ្ញាចិត្តកាត់បន្ថយឲ្យបានទាំងបទល្មើសព្រហ្មទណ្ឌគ្រប់ប្រភេទ និងបទល្មើស លួច ឆក់ប្លន់ និងបទល្មើសផ្សេងៗទៀត ដែលប៉ះពាល់ដល់ចិត្តសាស្ត្រសង្គមធ្វើឲ្យប្រជាពលរដ្ឋមានការភ័យខ្លាច ក្នុងនោះត្រូវខិតខំពង្រឹងការងាររបស់នគរបាលបច្ចេកទេស ដែលជាមូលដ្ឋាននៃការបំពេញសំណុំបែបបទ សំណុំរឿង ដែលជាមូលដ្ឋានសម្រាប់ដាក់បន្ទុកជនល្មើស ជាពិសេសការគ្រប់គ្រងលើមុខសញ្ញា ដែលត្រូវដោះលែងចេញពីពន្ធនាគារ មុខសញ្ញាដែលត្រូវបានព្យួរទោស និងមុខសញ្ញាក្មេងទំនើង។ ដោយឡែកបញ្ហាគ្រឿងញៀនត្រូវខិតខំអនុវត្តន៍ឲ្យបានគោលការណ៍របស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងការទប់ស្តាត់ច្រកនាំចូល ការកែច្នៃ និងទប់ស្កាត់ការរើឡើងវិញនូវការប្រើប្រាស់ ការជួញដូរ នៅក្នុងទីសប្បាយដ្ឋាន។ 

      ពាក់ព័ន្ធការងារចរាចរណ៍ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន បានពង្រឹងការដកបទពិសោធន៍របៀបរបបការងាររបស់កងកម្លាំងទាំងការកំណត់គោលដៅត្រួតពិនិត្យឲ្យបានសមរម្យ ជៀសវាងការធ្វេសប្រហែសធ្វើឲ្យមានការថ្នាំងថ្នាក់ដល់ប្រជាពលរដ្ឋ និងត្រូវការពារសុវត្ថិភាពដល់មន្ត្រីដែលកំពុងបំពេញការងារនៅតាមដងផ្លូវ។ បន្ថែមពីនេះពាក់ព័ន្ធការងារប្រចាំបញ្ជា និងការងារអន្តរាគម៍ត្រូវត្រៀមសង្គ្រោះប្រជាពលរដ្ឋនៅពេលមានហេតុការណ៍ចៃដន្យកើតឡើង។

      ចុងក្រោយពាក់ព័ន្ធការងាររបស់សមាគមមិត្តនគរបាលជាតិ ឯកឧត្តមអគ្គស្នងការ បានជម្រុញសកម្មភាពសាកសួរសុខទូក្ខបងប្អូនមន្ត្រីនគរបាល ដែលមានការឈឺស្កាត់ ជរាពិការ ដើម្បីជួយសម្រាលការលំបាកបងប្អូននគរបាលជាតិដែលជាសមាជិកសមាគម។ ទន្ទឹមនោះក៏ត្រូវមានការជម្រុញលើកទឹកចិត្ត ជូនរង្វាន់ដល់កងកម្លាំងដែលមានសមត្ថភាព និងមានស្នាដៃក្នុងការបំពេញភារកិច្ច ត្រូវខិតខំបង្ហាញការទទួលខុសត្រូវ បកស្រាយ ការពារកិត្តិយសនគរបាលជាតិ នៅចំពោះមុខមហាជន។ ជម្រុញវិធានការក្នុងការការពារកិត្តិយសនគរបាលជាតិ ដែលថ្មីៗនេះ អគ្គលេខាធិការសមាគមមិត្តនគរបាលបានផ្ញើលិខិតទៅក្រសួងព័ត៌មានពាក់ព័ន្ធបងប្អូនសិល្បៈក កំប្លែងដែលតែងតែនិពន្ធរឿងពាក់ព័ន្ធនិងសកម្មភាពនគរបាល ដែលខ្លឹមសារខ្លះបានធ្វើឲ្យប៉ះពាល់ដល់ស្ថាប័ននគរបាល ទាំងការគ្រងឯកសណ្ឋាន សក្តិ និងសក់វែងជាដើម៕

ប្រភព៖ អគ្គស្នងការដ្ឋាននគរបាលជាតិ