រាជធានីភ្នំពេញ៖ ថ្ងៃទី២៩ ខែវិច្ឆិកា ឆ្នាំ២០១៩ កិច្ចប្រជុំបូកសរុបលទ្ធផលការអនុវត្តគម្រោងសុវត្ថិភាពទន្លេមេគង្គដែលកម្ពុជាធ្វេីជាម្ចាស់ផ្ទះនៃមជ្ឈមណ្ឌលសម្របសម្រួលសុវត្ថិភាពទន្លេមេគង្គរយៈពេល៣ខែកន្លងមក ក្រោមទិសស្លោក "បេសកកម្មតែមួយ គោលដៅតែមួយ គ្រួសារតែមួយ "ក្រោមអធិបតីភាពដឹកនាំកិច្ចប្រជុំដោយឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន ដោយមានការអញ្ជេីញចូលរួមពីតំណាងស្ថាប័នត្រួតពិនិត្យគ្រឿងញៀនពីបណ្តាប្រទេសទាំង៦មាន៖ កម្ពុជា ចិន មីយ៉ាន់ម៉ា ឡាវ ថៃ និងវៀតណាម។
ឧត្តមសេនីយ៍ត្រី អ៊ុយ រ៉ាត់ ប្រធាននាយកដ្ឋានស្រាវជ្រាវនិងត្រួតពិនិត្យ បានរាយការណ៍ជូនអង្គប្រជុំថា រយៈពេល៣ខែនេះ ប្រទេសយេីងទាំង៦បានធ្វេីការបង្រ្កាបបានបទល្មេីសគ្រឿងញៀនរហូតដល់ជាង៣០០០ករណី (រាប់តែករណីមានវត្ថុតាងជាគ្រឿងញៀន១គីឡូក្រាមឡេីង)។
ក្នុងឱកាសនោះ ឧត្តមសេនីយ៍ឯក នាក់ យុទ្ធា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ថា ប្រធានប្រតិភូតំណាងស្ថាប័នត្រួតពិនិត្យគ្រឿងញៀនទាំងអស់បានវាយតម្លៃខ្ពស់ចំពោះលទ្ធផល និងកិច្ចខំរបស់កម្ពុជាសម្រេចបានក្នុងនាមម្ចាស់ផ្ទះនៃមជ្ឈមណ្ឌលសម្របសម្រួលសុវត្ថិភាពទន្លេមេគង្គរយៈពេលបីខែកន្លងមកនេះ។
លោកឧត្តមសេនីយ៍ឯក បានមានប្រសាសន៍បន្តថា ប្រទេសទាំងអស់បានវាយតម្លៃនូវស្ថានភាពគ្រឿងញៀនខុសច្បាប់នាពេលបច្ចុប្បន្នកាន់តែគំរាមកំហែងធ្ងន់ធ្ងរឡេីងៗទោះបីយេីងខិតខំនាពេលកន្លងយ៉ាងណាក៏ដោយពិសេសការផលិត ការចរាចរគ្រឿងញៀនសំយោគកាន់តែគំរាមកំហែងដល់សុខមាលភាព សុវត្ថិភាព សន្តិសុខ សណ្តាប់ធ្នាប់របស់ប្រជាពលរដ្ឋទាំងក្នុងតំបន់ និងពិភពលោក និងបានឲ្យតម្លៃលេីកិច្ចសហប្រតិបត្តិសកម្មភាពគួរត្រូវបានពង្រឹងពង្រីកបន្ថែមទៀត។
ជាមួយគ្នានេះ ឧត្តមសេនីយ៍ឯក នាក់ យុទ្ធាក៏បានប្រាប់ឲ្យដឹងបន្ថែមទៀតថា ប្រទេសទាំង៦តាមបណ្តោយទន្លេមេគង្គរួមគ្នាបង្ការទប់ស្កាត់បង្រ្កាបការនាំចេញគ្រឿងញៀនពីត្រីកោណមាសនិងការនាំចូលសារធាតុគីមីផ្សំទៅកាន់ត្រីកោណមាសដេីម្បីចូលរួមចំណែកកាត់បន្ថយនូវហានិភ័យ រក្សាសុខមាលភាព សន្តិសុខ សណ្តាប់ធ្នាប់ប្រជាពលរដ្ឋក្នុងតំបន់ក៏ដូចជាពិភពលោកស្របតាមផែនការសកម្មភាពមេ យុទ្ធសាស្រ្តទាំង៧ នៃគម្រោងសុវត្ថិភាពទន្លេមេគង្គឆ្នាំ២០១៩-២០២២។
ទន្ទឹមនឹងការទទួលលទ្ធផលល្អ ឧត្តមសេនីយ៍ឯក នាក់ យុទ្ធា ក៏បានថ្លែងអំណរគុណចំពោះការចូលរួមជួយជាជំនួយបច្ចេកទេស មធ្យោបាយ សម្ភារពីប្រទេសជាសមាជិកទន្លេមេគង្គ ពិសេសការគាំទ្រពីសំណាក់ថ្នាក់ដឹកនាំ គ្រប់ក្រសួង ស្ថាប័នគ្រប់ជាន់ថ្នាក់របស់អាជ្ញាធរជាតិប្រយុទ្ធប្រឆាំងគ្រឿងញៀន៕
ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន