នៅទីស្តីការក្រសួងមហាផ្ទៃ នារសៀលថ្ងៃទី២៧ ខែមិថុនា ឆ្នាំ២០១៩នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអនុញ្ញាតឱ្យឯកឧត្តមបណ្ឌិត Ingo Karsten ឯកអគ្គរដ្ឋទូតអាល្លឺម៉ង់ ព្រមទាំងសហការី ចូលជួបជម្រាបលា បន្ទាប់ពីឯកឧត្តមបានចប់អណត្តិបេសកកម្មការងារនៅកម្ពុជា។
សម្ដេចក្រឡាហោម ស ខេង បានវាយតម្លៃខ្ពស់ ចំពោះស្នាដៃជាច្រើនដែលឯកឧត្តមបណ្ឌិតឯកអគ្គរដ្ឋទូតអាល្លឺម៉ង់នាពេលកន្លងមក បានពង្រឹង និងពង្រីកកិច្ចសហប្រតិបត្តិការ ទំនាក់ទំនងរវាងប្រទេសទាំងពីរជាបន្តបន្ទាប់។ សម្ដេចក្រឡាហោម ក៏បានថ្លែងអំណរគុណ ចំពោះអាល្លឺម៉ង់ដែលបានជួយកសាង និងអភិវឌ្ឍន៍កម្ពុជានាពេលកន្លងមកផងដែរ។ សម្ដេចក្រឡាហោមក៏បានមានប្រសាសន៍ពាក់ព័ន្ធនឹងវិស័យកំណែទម្រង់វិមជ្ឈការ និងវិសហមជ្ឈការនៅកម្ពុជា ដែលមិត្តអាល្លឺម៉ង់បានជួយដល់កម្ពុជាយ៉ាងច្រើនលើកិច្ចការនេះជាច្រើន។ សម្ដេចបានគូសបញ្ជាក់ថា នាពេលឆាប់ៗខាងមុខនេះ ពោលគឺក្នុងរយៈពេលមួយឆ្នាំកន្លះទៀតនេះ គឺកម្ពុជានឹងបញ្ចប់ការអនុវត្តផែនការជាតិកំណែទម្រង់វិមជ្ឈការ រយៈពេលកំណត់១០ឆ្នាំ ដែលនេះ គឺជាកិច្ចការមួយដ៏សំខាន់ក្នុងការផ្ទេរធនធានទៅឲ្យរដ្ឋបាលថ្នាក់ក្រោមជាតិ ដើម្បីអនុវត្តកិច្ចការងារឲ្យបានជោគជ័យនៅក្នុងការងារកំណែទម្រង់វិមជ្ឈការ។
ឯកឧត្តមបណ្ឌិត Ingo Karsten ឯកអគ្គរដ្ឋទូតអាល្លឺម៉ង់ បានសម្ដែងក្ដីរីករាយចំពោះប្រសាសន៍លើកឡើងរបស់សម្ដេច ហើយឯកឧត្តមបានជំរាបជូនសម្ដេចថាក្នុងរយៈពេល៣ឆ្នាំ នៃអាណត្តិការទូត ឯកឧត្តមពិតជារីករាយចំពោះការមើលឃើញនូវវឌ្ឍនភាពរបស់កម្ពុជា ហើយជាពិសេសអាល្លឺម៉ង់រីករាយនឹងការជួយកម្ពុជាក្នុងផ្នែកវិមជ្ឈការ និងវិសហមជ្ឈការ តាមរយៈមូលនិធិខុនរ៉ាត់ ដែលផ្ដោតលើវិស័យសុខាភិបាល អភិវឌ្ឍន៍ជនបទ និងកំណែទម្រង់ថ្នាក់ក្រោមជាតិ។ ឯកឧត្តមបណ្ឌិតក៏បានសម្ដែងក្ដីរីករាយចំពោះគម្រោងដំណើរទស្សនកិច្ចរបស់សម្ដេចក្រឡាហោម ស ខេង រួមជាមួយគណៈប្រតិភូជាន់ខ្ពស់មួយចំនួនទៀត ទៅកាន់សាធារណរដ្ឋសហព័ន្ធអាល្លឺម៉ង់នាពេលខាងមុខ ទៅកាន់ប្រទេសអាល្លឺម៉ង់នៅក្នុងឆ្នាំនេះ។ ឯកឧត្តមក៏បានសម្ដែងក្ដីរីករាយចំពោះកិច្ចសហប្រតិបត្តិការយ៉ាងល្អជាមួយនគរបាលជាតិកម្ពុជា នៅក្នុងការជួយសម្រួលការងារពាក់ព័ន្ធនៅក្នុងអាណត្តិការងាររបស់ឯកឧត្តមផងដែរ។
សមម្តេចក្រឡាហោម ស ខេង បានមានប្រសាសន៍បន្ថែមថា ពាក់ព័ន្ធនឹងគម្រោងដំណើរទស្សនកិច្ចទៅកាន់ប្រទេសអាល្លឺម៉ង់នាពេលខាងមុខ នឹងមានសមាសភាព នៃគណៈប្រតិភូមន្រ្តីជាន់ខ្ពស់មកពីស្ថានប័នពាក់ព័ន្ធមួយចំនួន ហើយសម្ដេចបញ្ជាក់ថា តាមរយៈដំណើរទស្សនកិច្ចនេះ កម្ពុជានឹងទទួលបានបទពិសោធន៍ថ្មីៗបន្ថែមទៀត ដើម្បីយកមកបន្តអនុវត្តការងារកំណែទម្រង់វិមជ្ឈការ និងវិសហមជ្ឈការ ដើម្បីបន្តទទួលការគាំទ្រពីប្រជាពលរដ្ឋ ព្រោះតែការផ្ដល់សេវាបានឆាប់រហ័ស និងតម្លាភាព ដែលជាគោលដៅរបស់រាជរដ្ឋាភិបាលផងដែរ។
នៅក្នុងជំនួបនោះដែរ ឯកឧត្តម Ingo Karsten ក៏បានសម្ដែងការអបអរសាទរចំពោះ សម្ដេចក្រឡាហោម ស ខេង បន្ទាប់ពីក្រសួងមហាផ្ទៃ បានរៀបចំឲ្យមានវេទិការជជែកពិភាក្សារវាងអង្គការសង្គមស៊ីវិលជាមួយរាជរដ្ឋាភិបាល។ បន្ថែមលើសពីនេះឯកឧត្តមក៏សូមលើកទឹកចិត្ត និងជឿជាក់ថាតាមរយៈយន្តការនេះ នឹងធ្វើឲ្យក្រុមអង្គការសង្គមស៊ីវិលបំពេញភារកិច្ចកាន់តែងាយស្រួល និងស្របតាមបេសកម្មរបស់ខ្លួន។
ជាចុងបញ្ចប់ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានជំរាបជូនឯកឧត្តមឯកអគ្គរដ្ឋទូតអាល្លឺម៉ង់ដែរថា ក្រសួងមហាផ្ទៃ ក៏ដូចជារាជរដ្ឋាភិបាល តែងតែចាត់ទុកក្រុមអង្គការសង្គមស៊ីវិលជាដៃគូក្នុងកិច្ចសហការ និងធ្វើការរួមគ្នាក្នុងការអភិវឌ្ឈផងដែរ។ ជាងនេះទៅទៀត សម្ដេចក្រឡាហោមបានគូសបញ្ជាក់ថាតាមរយៈការរៀបចំឲ្យមានយន្តការវេទិការជួបជុំរវាងរាជរដ្ឋាភិបាល និងអង្គការសង្គមស៊ីវិលកន្លងមកនេះ គឺបានជួយរួមចំណែកពង្រឹងភាពជាដៃគូរវាងរាជរដ្ឋាភិបាល និងក្រុមអង្គការសង្គមស៊ីវិលនៅកម្ពុជាឲ្យកាន់តែល្អប្រសើរផងដែរ៕ គឹមអាន
ដោយ៖ នាយកដ្ឋានព័ត៌មានវិទ្យា
