ខេត្តកណ្ដាល៖ អភិបាលខេត្តកណ្ដាល ឯកឧត្តម គង់ សោភ័ណ្ឌ បានលើកឡើងថា បញ្ហារថយន្តដឹកដី ដឹកខ្សាច់ ធ្វើឱ្យហុយ និងស្ទះចរាចរជាញឹកញាប់នៅក្នុងក្រុងតាខ្មៅ មិនមែនជាបញ្ហាធំដុំនោះទេ ប៉ុន្តែបណ្ដាលមកពីមន្ត្រី អនុវត្តនៅស្ទើរ ដោយមើលគ្នាទៅមើលគ្នាមក និងមានការច្រណែនគ្នា ទើបបណ្ដាលឱ្យរថយន្តដឹកដី ដឹកខ្សាច់ បង្ករភាពអាណាធិបតេយ្យ ធ្វើឲ្យស្ទះចរាចរណ៍ នឹងបណ្ដាលឱ្យមានខ្សាច់ជ្រុះពេញផ្លូវ ធ្វើឱ្យហុយដី ខូចសុខភាពរបស់ប្រជាពលរដ្ឋ និងបណ្ដាលឱ្យមានគ្រោះថ្នាក់ចរាចរណ៍ជាយថាហេតុផ្សេងៗផងដែរ។

ឯកឧត្តម គង់ សោភ័ណ្ឌ អភិបាលខេត្តកណ្ដាល បានលើកឡើងបែបនេះ ក្នុងកិច្ចប្រជុំពិនិត្យការរៀបចំសោភ័ណភាព សណ្ដាប់ធ្នាប់ ពាក់ព័ន្ធនឹងការដឹកដី ដឹកខ្សាច់ ក្នុងក្រុងតាខ្មៅ ខេត្តកណ្ដាល កាលពីរសៀលថ្ងៃទី១២ ខែមករាឆ្នាំ២០២១ នៅសាលាខេត្តកណ្ដាល ដោយមានការអញ្ជើញចូលរួម មន្ទីរអង្គភាពជុំវិញខេត្ត កម្លាំងទាំងបី អាជ្ញាធរក្រុង និងម្ចាស់ដេប៉ូទាំងអស់នៅក្នុងក្រុងតាខ្មៅ។

ឯកឧត្តមបន្ដថា បើមន្ត្រីទាំងអស់ អនុវត្តទៅតាមតួនាទីភារកិច្ចរបស់ខ្លួន ដោយធ្វើការចាប់រថយន្តដែលខុសលក្ខណៈបច្ចេកទេស ដឹកលើសទម្ងន់ ដឹកខុសបទដ្ឋានបច្ចេកទេស និងមិនគោរពច្បាប់ចរាចរណ៍ មកធ្វើការពិន័យ និងផ្ដន្ទាទោសទៅតាមច្បាប់ផ្លូវថ្នល់ដែលបានកំណត់ និងអនុវត្តតាមសារាចរ លេខ០៣១០ របស់ក្រសួងរ៉ែ និងថាមពល ស្ដីពីវិធានការចំពោះការដឹកជញ្ជូនរ៉ែសំណង់គ្រប់ប្រភេទ ឱ្យបានខ្ជាប់ខ្ជួន ផ្លូវរបស់យើងនៅក្នុងក្រុងតាខ្មៅ នឹងមិនបណ្ដាលឱ្យមានខ្សាច់ជ្រុះពេញផ្លូវច្រើនទេ ព្រមទាំងកាត់បន្ថយនូវការកកស្ទះចរាចរណ៍ និងគ្រោះថ្នាក់ផ្សេងៗផងដែរ។

ឯកឧត្តមអភិបាលខេត្ត ក៏បានស្នើឱ្យបង្កើតគណៈកម្មការមួយ ដែលមានអភិបាលក្រុងជាប្រធាន និងមានមន្ទីរសាធារណការ និងដឹកជញ្ជូនខេត្តជាអនុប្រធាន ដើម្បីធ្វើការអនុវត្តនូវលើកិច្ចការងារនេះ។ ហើយក្នុងករណីដែលការអនុវត្តនេះមិនមានភាពល្អប្រសើរទេ ឯកឧត្តមបានព្រមានថានឹងដកប្រធាននោះចេញ ដោយត្រូវប្ដូរប្រធានថ្មីដើម្បីអនុវត្តទៅលើកិច្ចការងារនេះផងដែរ។

ក្នុងឱកាសនោះដែរឯកឧត្តមអភិបាលខេត្ត ក៏បានសំណូមពរដល់ម្ចាស់ដេប៉ូទាំងអស់ សូមចូលរួមគោរពច្បាប់ឱ្យបានគ្រប់គ្នាៗ បើមិនដូចនោះទេ អាជ្ញាធរខេត្ត ក៏ដូចជាអ្នកពាក់ព័ន្ធទាំងអស់ នឹងត្រូវអនុវត្តទៅតាមច្បាប់ដោយគ្មានការយិគយល់ឡើង៕

ប្រភព៖ រដ្ឋបាលខេត្តកណ្តាល