ព្រឹកថ្ងៃសៅរ៍ទី០៦ ខែមិថុនា ឆ្នាំ២០២០ ឯកឧត្តម គួច ចំរើន ប្រធានគណៈកម្មាធិការសាខាកាកបាទក្រហមកម្ពុជា ខេត្តព្រះសីហនុ អញ្ជើញទទួលអំណោយមនុុស្សធម៌ពីសប្បុរសជន មន្ត្រីរាជការក្នុងខេត្តព្រះសីហនុ មានម៉ាស់ និងថវិកា ក្នុងឱកាសខួបទី១៥៧ ទិវាកាកបាទក្រហម អឌ្ឍចន្ទក្រហម ៨ឧសភាឆ្នាំ២០២០ នៅទីស្នាក់ការសាខាកាកបាទក្រហមកម្ពុជាខេត្ត ដែលមានទីតាំងស្ថិតនៅសង្កាត់លេខ៣ ក្រុងព្រះសីហនុ ខេត្តព្រះសីហនុ។
ឯកឧត្តម គួច ចំរើន ប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ សូមថ្លែងអំណរគុណ អគុណចំពោះសប្បុរសជន មន្ត្រីរាជការ បាននាំយកម៉ាស់ និងថវិកាឧបត្ថម្ភដល់សាខាកាកបាទក្រហមកម្ពុជាខេត្តព្រះសីហនុ តាងនាមឱ្យសាខាកាកបាទក្រហមខេត្ត និងប្រជាពលរដ្ឋខេត្តព្រះសីហនុ ចំពោះទឹកចិត្តដ៍ល្អប្រពៃរបស់បងប្អូនសប្បុរសជន មន្ត្រីរាជការ អាជីវករ ពាណិជ្ជករក្នុងខេត្តព្រះសីហនុ ដែលបានចូលរួមបរិច្ចាកធនធានជាសម្ភារៈនិងថវិកាដល់សាខាកាកបាទក្រហមខេត្តជាបន្តបន្ទាប់ដើម្បីឱ្យសាខាមានលទ្ធភាពក្នុងការជួយសង្គ្រោះប្រជាពលរដ្ឋរងគ្រោះ ជនងាយរងគ្រោះ ជនចាស់ជរាគ្នានទីពឹង ស្ត្រីមេមាយមានកូនច្រើន ក្មេងកំព្រារ ដោយមិនប្រកាន់វណ្ណៈ ពណ៌សម្បុរ ជាតិសាសន៍ ឬនិន្នាកានយោបាយ។
ឯកឧត្តម ប្រធានបន្តថា ថវិកានិងសម្ភារ:ដែលសាខាទទួលបានពីសប្បុរសជន ពាណិជ្ជករ អាជីវក មន្ត្រីរាជការ និងប្រជាពលរដ្ឋក្នុងទិវាកាកបាទក្រហម អឌ្ឍចន្ទក្រហម ៨ឧសភា ឆ្នាំ២០២០នេះ ធ្វើឱ្យសាខាមានធនធានសម្រាប់ធ្វើប្រតិបត្តិការការងារមនុស្សធម៌ ជួយសង្គ្រោះជនរងគ្រោះដោយពុំមានការរើសអើង លើកកម្ពស់គោលការណ៍គ្រឹ: តម្លៃមនុស្សធម៌ និងសេចក្តីថ្លៃថ្នូររបស់មនុស្សជាតិ ក្នុងការជួយសង្គ្រោះជនរងគ្រោះដោយគ្រោះធម្មជាតិនានាបានទាន់ពេលវេលា៕
ប្រភព៖ រដ្ឋបាលខេត្តព្រះសីហនុ