នៅព្រឹកថ្ងៃព្រហស្បតិ៍ ១០ រោច ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ១១ ខែមករា ឆ្នាំ២០១៨ នេះ ឯកឧត្តម ញ៉ែម សំអឿន អភិបាលរងខេត្តរតនគិរី តំណាងឯកឧត្តមអភិបាលខេត្ត បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រកាសផ្ទេរភារកិច្ច និងតែងតាំងមុខតំណែងអភិបាលរង នៃគណៈអភិបាលស្រុកអូរយ៉ាដាវ ដែលពិធីនេះត្រូវបានធ្វើឡើងនៅសាលប្រជុំសាលាស្រុកអូរយ៉ាដាវ ។ យោងប្រកាសរបស់ក្រសួងមហាផ្ទៃ ត្រូវបានតែងតាំងលោក ហ្វង់ រិទ្ធ ជាអភិបាលរងស្រុកអូរយ៉ាដាវសម្រាប់អាណត្តិទី២ នៅក្នុងដែនសមត្ថកិច្ចដដែល តែងតាំងលោកស្រី កុយ កុសល ជាអភិបាលរងស្រុកអូរយាដាវ ជំនួសលោកស្រី ឡាំ ប៉ាប៉ាក់ ដែលត្រូវបានផ្ទេរភារកិច្ចទៅកាន់មុខតំណែងជាអភិបាលរងស្រុកបរកែវវិញ ។ មានប្រសាសន៍ណែនាំដល់អភិបាលរងស្រុកថ្មី ដែលទើបតែចូលកាន់តំណែង ក៏ដូចជាគណៈអភិបាលស្រុក គណៈបញ្ជាការឯកភាពស្រុក ឯកឧត្តម ញ៉ែម សំអឿន បានជំរុញឲ្យរដ្ឋបាលស្រុកជំរុញយន្តការច្រកចេញចូលតែមួយ ដើម្បីធានាការផ្តល់សេវាបានឆាប់រហ័ស ងាយស្រួល និងប្រកបដោយតម្លាភាព ជូនប្រជាពលរដ្ឋ ពង្រឹងកិច្ចសហប្រតិបត្តិការ និងទំនាក់ទំនងជាមួយស្ថាប័ន មន្ទីរ អង្គភាពនានា ជាពិសេសស្រុកជាប់ព្រំដែន នៃប្រទេសជិតខាង ។ ទន្ទឹមនឹងនោះគណៈអភិបាលស្រុកត្រូវ ពង្រឹងលើរបៀបរបបការងាររបស់មន្ត្រីរាជការ និងការរៀបចំសណ្តាប់ធ្នាប់សាធារណៈ អនាម័យបរិស្ថាន ទាំងនៅក្នុងកន្លែងការងារ និងទីសាធារណៈនៅក្នុងស្រុក ។ ប្រភពព័ត៌មាន: រដ្ឋបាលខេត្តរតនគិរី (ថ្ងៃទី១១ ខែមករា ឆ្នាំ២០១៨)
