ព្រឹកថ្ងៃព្រហស្បតិ៍ ១២កើត ខែបុស្ស ឆ្នាំច សំរិទ្ធិស័ក ព.ស២៥៦២ ត្រូវនឹងថ្ងៃទី១៧ ខែមករា ឆ្នាំ២០១៩ នៅសាលប្រជុំរដ្ឋបាលខេត្តសៀមរាប បើកកិច្ចប្រជុំពិភាក្សា ស្តីពីការងារគ្រប់គ្រងគ្រោះមហន្តរាយក្នុងខេត្តសៀមរាបដែលដឹកនាំដោយ លោក ង៉ាន់ ភិរុណ អភិបាលរងខេត្ត និងជាតំណាង ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប។
មានការចូលរួមពីនាយករងរដ្ឋបាល នាយក នាយករងទីចាត់ការចំណុះរដ្ឋបាលខេត្ត អាជ្ញាធរជាតិអប្សរា មន្ទីរ-អង្គភាព ពាក់ព័ន្ធ ស្នងការនគរបាលខេត្ត កងរាជអាវុធហត្ថខេត្ត សាខាកាកបាទក្រហមកម្ពុជាខេត្តសៀមរាប និងលោក លោកស្រី អភិបាលក្រុង-ស្រុក ទាំងអស់។
ក្នុងកិច្ចប្រជុំនេះ គឺបានជម្រុញដល់លោក លោកស្រីអភិបាលក្រុង ស្រុកទាំងអស់ត្រៀមបង្កាគ្រប់ពេលក្នុងការជួយសង្គ្រោះដល់ជនងាយរងគ្រោះដែលនៅនឹងមូលដ្ឋានរបស់ខ្លួន ជាពិសេសក្នុងរដូវនេះដែលអាចនឹងមានគ្រោះរាំងស្ងួតនៅតាមតំបន់មួយចំនួនដែលបងប្អូនប្រជាពលរដ្ឋបាននិងកំពុងបង្កបង្កើនផល៕ រតនា
ប្រភព៖ រដ្ឋបាលខេត្តសៀមរាប