ថ្លែងក្នុងឱកាសអញ្ជើញជាអធិបតី ក្នុងកិច្ចប្រជុំពិនិត្យ និងពិភាក្សាលើសេចក្ដីពង្រាងកែសម្រួលតម្លៃអចលនទ្រព្យ សម្រាប់ជាមូលដ្ឋានគិតពន្ធប្រថាប់ត្រា ក្នុងខេត្តកំពង់ចាម ដែលរៀបចំដោយសាខាពន្ធដារខេត្ត កាលពីរសៀលថ្ងៃទី២២ ខែតុលា ឆ្នាំ២០១៨ ឯកឧត្ដម គួច ចំរើន អភិបាលខេត្តកំពង់ចាម បានជម្រុញដល់ស្ថាប័នជំនាញ និងអាជ្ញាធរមូលដ្ឋាន យក ចិត្តទុកដាក់ក្នុងការបំរើសេវាជូនប្រជាពលរដ្ឋនៅក្នុងមូលដ្ឋានឲ្យកាន់តែល្អប្រសើរថែមទៀត។ ឯកឧត្ដមបន្ថែមថា ក្នុងកម្មវិធីនយោបាយរបស់រាជរដ្ឋាភិបាល អាណត្តិទី៦ នៃរដ្ឋសភា បានកំណត់ និងការប្ដេជ្ញាចិត្តច្បាស់លាស់ទៅលើការយកចិត្តទុកដាក់បំរើសេវាសាធារណៈ ជូនប្រជាពលរដ្ឋ ឲ្យបានល្អប្រសើរ ដូច្នេះមន្ត្រីទាំងអស់ ត្រូវខិតខំកែប្រែឥរិយាបទ និងប្ដេជ្ញាចិត្ត ជូនប្រជាពលរដ្ឋនៅក្នុងមូលដ្ឋាននីមួយៗ ឲ្យបានល្អប្រសើរ ថែមទៀត ដែលជាការឆ្លើយតបទៅនឹងការគាំទ្រ របស់ម្ចាស់ឆ្នោត ចំពោះ រាជរដ្ឋាភិបាលកម្ពុជា។ ឯកឧត្តមបានបញ្ជាក់ដែរថា ដើម្បីធានាទៅដល់ការកៀងគរកប្រភពចំណូលជូនរដ្ឋ និងការធានា ទៅដល់ការបំរើសេវាសាធារណៈ ជូនប្រជាពលរដ្ឋបានល្អប្រសើរ សូមអោយអាជ្ញាធរមូលដ្ឋាននីមួយៗ ត្រូវតែដឹងអំពីអត្រា នៃការបង់ពន្ធ ឲ្យបានច្បាស់លាស់។ ជាងនេះទៅទៀត សូមឲ្យអភិបាលក្រុង ស្រុក នីមួយៗ ត្រូវធ្វើការផ្សព្វផ្សាយឲ្យបានទូលំទូលាយ ដល់មេឃុំ ចៅសង្កាត់ ស្មៀន និងមេភូមិ ដើម្បី ឲ្យពួកគាត់បានដឹងអំពីអត្រាតម្លៃដី នៅតាមភូមិសាស្ត្រ និងតំបន់នីមួយៗ ជាមុន ដើម្បី ជាមូលដ្ឋាន ក្នុងការពន្យល់ ទៅដល់ប្រជាពលរដ្ឋយើង ដើម្បី ឲ្យពួកគាត់បានចូលរួមបង់ពន្ធ ទៅតាមកាតព្វកិច្ច ដូចអ្វីដែលច្បាប់បានកំណត់។ ឯកឧត្តមអភិបាលសង្កត់ធ្ងន់ដែរថា ជាចាំបាច់យើងត្រូវខិតខំធ្វើយ៉ាងណា កាត់បន្ថយនូវការចំណាយក្រៅសេវា ដែលធ្វើឲ្យអ្នកបង់ពន្ធ កាន់តែមានបន្ទុកខ្ពស់ តាមរយៈ ការបង់ពន្ធលើសពីអត្រាពន្ធបានកំណត់ ធ្វើឲ្យប្រជាពលរដ្ឋមានការថ្នាំងថ្នាក់ និងសតិអារម្មណ៍ មកលើអង្គភាពជំនាញ និងអាជ្ញាធរ ក្នុងមូលដ្ឋាននោះ ជាអ្នកអនុវត្តផ្ទាល់ ផងដែរ ។
សូមបញ្ជាក់ថា ក្នុងរយៈពេល ៩ខែ ឆ្នាំ២០១៨នេះ សាខាបានប្រមូលចំណូលពន្ធប្រថាប់ត្រាបង់ចូលថវិកាសរុបចំនួន ១.៩០៥.៨២៨.៥៧៥រៀល ស្មើនឹង ៧៧,៦៣% នៃផែនការ ធៀបទៅនឹងឆ្នាំ២០១៧ មានការកើនឡើង ៩,០៣%។ ការកើនឡើងនេះ ដោយការជួយឧបត្ថម្ភគាំទ្រពីសំណាក់ឯកឧត្ដមអភិបាលខេត្ត អាជ្ញាធរមូលដ្ឋានក្រុង ស្រុក ឃុំ សង្កាត់ និងមន្ទីរ អង្គភាពពាក់ព័ន្ធ បានជួយជម្រុញ ឲ្យម្ចាស់អចលនទ្រព្យ មកធ្វើការប្រកាសបង់ពន្ធប្រថាប់ត្រា ផ្ទេរសិទ្ធិ បានត្រឹមត្រូវ ស្របតាមច្បាប់កំណត់ផងដែរ៕ គឹមអាន
ប្រភព៖ រដ្ឋបាលខេត្តកំពង់ចាម