នៅព្រឹកថ្ងៃទី ២១ ខែកញ្ញា ឆ្នាំ២០២២នេះ រដ្ឋបាលខេត្តកំពង់ចាម បើកកិច្ចប្រជុំដាក់ផែនការឱ្យអាជ្ញាធរគ្រប់លំដាប់ថ្នាក់រួមសហការគ្នា បង្ក្រាបល្បែងស៊ីសងគ្រប់ប្រភេទ ឱ្យអស់ពីមូលដ្ឋាន ក្រោមអធិបតីភាព ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និង ឯកឧត្តម វង្ស ប៊ុនវិសុទ្ធ ព្រះរាជអាជ្ញាអមសាលាដំបូងខេត្ត បានដឹកនាំកិច្ចប្រជុំណែនាំអំពីវិធានការបង្ក្រាបការលេងល្បែងស៊ីសងគ្រប់ប្រភេទ ក្នុងខេត្តកំពង់ចាម ដោយមានការចូលរួមពីឯកឧត្តម លោកជំទាវអភិបាលរងខេត្ត និងមន្ត្រីពាក់ព័ន្ធ អង្គភាពកងកម្លាំងប្រដាប់អាវុធទាំងបីប្រភេទ អភិបាលក្រុង ស្រុក ទាំង១០។
ឯកឧត្តម អភិបាលខេត្ត បានមានប្រសាសន៍ថា មកដល់ពេលនេះល្បែងស៊ីសងខុសច្បាប់គ្រប់ប្រភេទ ដាច់ខាតត្រូវតែបង្ក្រាបឲ្យអស់ពីមូលដ្ឋាន បូករួមទាំងការជួញដូរមនុស្ស ការសម្អាតលុយកខ្វក់ និងបទល្មើសគ្រឿងញៀន ដែលកើតមានត្រូវបង្ក្រាបឲ្យគ្រប់ជ្រុងជ្រោយ ។ ជាមួយគ្នានេះ សមត្ថកិច្ចត្រូវកំណត់ទីតាំង ដែលធ្លាប់ធ្វើអាជីវកម្មល្បែងស៊ីសងខុសច្បាប់ ត្រូវបន្តធ្វើកិច្ចសន្យា ឲ្យម្ចាស់ទីតាំងទាំងនោះទទួលខុសត្រូវ ចំពោះមុខអាជ្ញាធរ ដោយធានាថា មិនឲ្យមានការលេងល្បែងស៊ីសងខុសច្បាប់ ។
ឯកឧត្តម អភិបាលខេត្ត បានសំណូមពរសូមឲ្យមន្ត្រីមានសមត្ថកិច្ចទាំងអស់ ហាមពាក់ព័ន្ធជាមួយនឹងបទល្មើសល្បែងស៊ីសងគ្រប់ប្រភេទ ជាងនេះទៅទៀតសូមឱ្យមេបញ្ជាការកងកម្លាំងប្រដាប់អាវុធទាំងបីប្រភេទ ធ្វើការណែនាំបន្ថែមទៅមន្ត្រីរបស់ខ្លួន នៅឯមូលដ្ឋានកុំឱ្យពាក់ព័ន្ធ កុំនៅពីក្រោយ កុំអន្តរាគមន៍ និងកុំបិទបាំង។
ឯកឧត្តម អភិបាលខេត្ត ក៏បានណែនាំឲ្យគណៈបញ្ជាការឯកភាព ក្រុង ស្រុក បន្តសហការជាមួយស្ថាប័នអយ្យការសាលាដំបូងខេត្ត ដោយត្រូវដើរទន្ទឹមគ្នាទាំងនីតិបញ្ញត្តិ នីតិប្រតិបត្តិ និងតុលាការ រួមទាំងសារព័ត៌មាន ត្រូវបន្ត នូវកិច្ចសហការឈានទៅបង្ក្រាបឲ្យបានជោគជ័យ។
ព្រះរាជអាជ្ញាអមសាលាដំបូងខេត្តកំពង់ចាម ឯកឧត្តម វង្សប៊ុន វិសុទ្ធ បានលើកឡើងផងដែរថា ទាក់ទិនការចុះបង្ក្រាបល្បែងស៊ីសងគ្រប់ប្រភេទ សូមឱ្យសមត្ថកិច្ច ត្រូវផ្ដោតសំខាន់ទៅលើវត្ថុតាង នឹងត្រូវប្រមូលឧបករណ៍ ជាធាតុផ្សំ នៃល្បែងស៊ីសងនោះ ឲ្យបានគ្រប់គ្រាន់ ដើម្បីចងក្រងឯកសារ ចាត់ការទៅតាមនីតិវិធី៕
ប្រភព៖ រដ្ឋបាលខេត្តកំពង់ចាម