នៅរសៀលថ្ងៃព្រហស្បតិ៍ ១រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២១ ខែមីនា ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតបូកសរុបលទ្ធផលការងារត្រួតពិនិត្យគ្រឿងញៀនឆ្នាំ២០១៨ និងលើកទិសដៅការងារឆ្នាំ២០១៩ និងកិច្ចប្រជុំបូកសរុបលទ្ធផលនៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៣ នាទីស្តីការក្រសួងមហាផ្ទៃ។
ឯកឧត្តមនាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ថា សមិទ្ធិផល និងស្នាដៃទាំងឡាយដែលលេចធ្លោគួរជាទីមោទនៈ គឺកើតចេញពីការខិតខំប្រឹងប្រែង និងការលះបង់កម្លាំងកាយចិត្តក្នុងការប្រយុទ្ធប្រឆាំងគ្រឿងញៀន ពិសេស ក្នុងរយៈពេល នៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ និងទី២ ពីសំណាក់ថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធគ្រប់ជាន់ថ្នាក់ ទាំងថ្នាក់ជាតិ និងថ្នាក់ក្រោមជាតិ ក្នុងការអនុវត្តយុទ្ធសាស្រ្តទាំង៥ និង វិធានការពហុវស័យនានា ប្រកបដោយស្មារតីទទួលខុសត្រូវខ្ពស់។ ឯកឧត្តមបន្តថា ដើម្បីបន្តអនុវត្តការងារប្រយុទ្ធប្រឆាំងគ្រឿងញៀនឱ្យកាន់តែមានប្រសិទ្ធភាព ក្នុងឆ្នាំ២០១៩នេះ អាជ្ញាធរជាតិប្រយុទ្ធប្រឆាំងគ្រឿងញៀនបានកំណត់នូវទិសដៅបន្ថែមមួយចំនួនដូចខាងក្រោម៖
១. បង្កើនប្រសិទ្ធភាពនៃការទប់ស្កាត់ជាអាទិភាពនូវការហូរចូលគ្រឿងញៀននៅតំបន់ព្រំដែនកម្ពុជា ឡាវ នៅតាមព្រលានយន្តហោះ និងបញ្ញើរប្រៃសណីយ៍ដោយការពង្រឹងការប្រមូលព័ត៌មានពីគ្រប់ប្រភព សំដៅវែកមុខពួកឧក្រឹដ្ឋជនទាំងក្នុងនិងក្រៅប្រទេស ឈានទៅ បង្រ្កាបបាននូវបណ្តាញជួញដូរគ្រឿងញៀនទាំងនោះ។
២. បង្កើនការអប់រំទៅលើគោលដៅប្រជាពលរដ្ឋទូទៅ អោយបានសកម្មនិងផុលផុសថែមទៀត ដោយចលនាឱ្យមានការចូលរួមពីគ្រប់សមាសភាពនៃសង្គម បញ្ជ្រាបខ្លឹមសារអប់រំស្តីពីបញ្ហាគ្រឿងញៀនទៅក្នុងគ្រប់វេទិការ និងព្រឹត្តការផ្សេងៗនៅភូមិសាស្ដ្រនៃដែនសមត្ថកិច្ចរបស់ខ្លួន។
៣. ពង្រឹងវិធានការព្យាបាល សមត្ថភាព គុណភាព និងប្រសិទ្ធភាព ស្តារនីតិសម្បទា និងសមាហរណកម្ម ដោយចាត់ចែង អនុវត្តឱ្យបានពេញលេញតាមស្មារតីអនុក្រឹត្យស្តីពីការរៀបចំនិងការប្រព្រឹត្តទៅរបស់គណៈកម្មការព្យាបាលនិងស្តារនីតិសម្បទាអ្នកញៀនគ្រឿងញៀន ដោយជម្រុញឱ្យដំណើរការឱ្យបានសកម្មនូវការព្យាបាលតាមសហគមន៍ ។ ពង្រឹងសមត្ថភាពមណ្ឌលបណ្តោះអាសន្នរបស់រដ្ឋដោយពង្រឹងផែ្នកវេជ្ជសាស្រ្ត បណ្តុះបណ្តាលវិជ្ជាជីវៈ និងសមាហរណកម្ម ដោយធានាកាត់បន្ថយការលាប់ឡើងវិញ និងបង្កើតយន្តការជាក់លាក់សម្រាប់ការធ្វើសមាហរណកម្មនិងការថែទាំបន្តនៅតាមឃុំ សង្កាត់ ។ ការបង្កើតប្រព័ន្ធគ្រប់គ្រងទិន្នន័យអ្នកញៀនគ្រឿងញៀនឱ្យបានច្បាស់លាស់តាមបច្ចេកវិទ្យាទំនើបនាពេលបច្ចុប្បន្ន និងសហការជាមួយដៃគូពាក់ព័ន្ធដើម្បីស្រាវជ្រាវរកវិធីសាស្រ្តព្យាបាលអ្នកញៀនគ្រឿងញៀនឱ្យកាន់តែល្អប្រសើរឡើង ។
៤. ពង្រឹងយន្តការ សេនាធិការ ដើម្បីអនុវត្តការដឹកនាំពហុវិស័យក្នុងការប្រយុទ្ធប្រឆាំង គ្រឿងញៀននៅថ្នាក់ស្រុក ខណ្ឌ ឃុំ សង្កាត់ គោលដៅ ដើម្បីឱ្យការងារប្រយុទ្ធប្រឆាំងគ្រឿងញៀនទទួលបានលទ្ធផលល្អប្រសើរនិងមាននិរន្តរភាពទាំងការងារតាមដានបូកសរុបរាយការណ៍ ។ល។
៥. ពង្រឹងកិច្ចសហប្រតិបត្តិការអន្តរជាតិជាមួយប្រទេសនានាក្នុងសកលលោក ក្នុង តំបន់ និងប្រទេសជាប់ព្រំដែន តាមគ្រប់យន្តការ ទ្វេភាគី ត្រីភាគី ពហុភាគី ដើម្បីទប់ស្កាត់ការ ចរាចរ និងការប្រើប្រាស់គ្រឿងញៀននៅតាមព្រំដែននិងការកសាងភូមិបៃតងនៅតាមព្រំដែន។ ជាមួយនេះ ត្រូវបន្តសហការជាមួយអង្គការដៃគូជាតិនិងអន្តរជាតិដើម្បីគាំទ្រការងារប្រយុទ្ធ ប្រឆាំងគ្រឿងញៀនៅកម្ពុជា ។
៦. អនុវត្តគោលនយោបាយនិងលើកទឹកចិត្តដល់អង្គភាព បុគ្គល មានស្នាដៃពិតប្រាកដ ដោយបង្កើតឱ្យមានគណៈកម្មការនៅតាមក្រសួងស្ថាប័ននិងអង្គភាពនិមួយៗដើម្បីទទួលរ៉ាប់រង ការងារនេះ ។
៧. អំពាវនាវដល់ផ្នែកពាក់ព័ន្ធទាំងអស់ដើម្បីរួមចំណែកដល់ការអនុវត្ត យុទ្ធនាការប្រយុទ្ធប្រឆាំងគ្រឿងញៀនលើកទី៤ និងទិសដៅការងាររបស់អាជ្ញាធរជាតិប្រយុទ្ធប្រ ឆាំងគ្រឿងញៀនឆ្នាំ២០១៩ ដើម្បីនាំមកនូវលទ្ធផលកាន់តែល្អប្រសើរ ធានាបាននូវសន្តិសុខ សណ្តាប់ធ្នាប់សាធារណៈ ថែរក្សានូវសុខុមាលភាព និងធនធានមនុស្សរបស់កម្ពុជាយើង។
ព្រមជាមួយគ្នានោះដែរ សម្តេចក្រឡាហោម ស ខេង បានមានប្រសាសន៍ណែនាំ និង ជម្រុញឱ្យមន្រ្តីពាក់ព័ន្ធ អាជ្ញាធរ រាជធានី\ខេត្ត និងសមត្ថកិច្ចគ្រប់ផ្នែក គ្រប់ជំនាញ និងប្រជាពលរដ្ឋ បន្តយកចិត្តទុកចូលរួមពង្រឹងយន្តការ ទប់ស្កាត់ បង្ការ និងបង្រ្កាបឱ្យបានចំពោះគ្រឿងញៀនខុសច្បាប់នៅគ្រប់ទីតាំងក្នុងមូលដ្ឋាន សំដៅរួមគ្នាលុបបំបាត់ ការជួញដូ និងការ ធ្វើចរាចរគ្រឿងញៀននៅកម្ពុជា។ ជាមួយគ្នានោះ សម្តេចក្រឡាហោម ក៏បានក្រើនរំលឹកដល់មន្រ្តីមានសមត្ថកិច្ចពាក់ព័ន្ធទាំងអស់ចៀសអោយឆ្ងាយចំពោះការអន្តរាគមន៍ ទៅលើគ្រប់រូបភាពចំពោះបទល្មើសគ្រឿងញៀន និងជ្រៀតជ្រែកការងារជំនាញរបស់មន្រ្តីមានសមត្ថកិច្ច ដែលទង្វើទាំងអស់នោះវានឹងធ្វើឱ្យខូចដល់ប្រព័ន្ធយុត្តិធម៌របស់យើង។ លើសពីនេះត្រូវការពារដាច់ខាត មិនត្រូវឱ្យគ្រឿងញៀនចូលដល់ក្នុងសាលារៀនដែលវានឹងធ្វើអោយប៉ះពាល់យ៉ាងធ្ងន់ធ្ងរដល់យុវជនផងដែរ។
គួរបញ្ជាក់ផងដែរថា ក្នុងឆ្នាំ២០១៨លទ្ធផលបង្កា្របបទល្មើសគ្រឿងញៀន សរុបបាន ៨.០០២ករណី (ធៀបនឹងឆ្នាំ២០១៧ មាន៨.១៧៣ករណី) ថយចុះ១៧១ករណី ស្មើនឹង២,១០% ក្នុងនោះ ករណីជួញដូររក្សាទុក ៤.៩៧២ករណី ករណីប្រើប្រាស់២.៩៨២ករណីកែច្នៃ២ករណី និងដាំដុះ៤៦ករណី។ ជនសង្ស័យ ឃាត់ខ្លួនបាន១៦.២១៦នាក់/ស្រី ១.៣៣៣នាក់ (ធៀបជាមួយឆ្នាំ២០១៧ មាន១៧.៨០០នាក់) ថយចុះ ១.៥៨៤នាក់ ស្មើនឹង៨.៩១% ក្នុងនោះជនសង្ស័យក្នុង៖ ករណីជួញដូរ រក្សាទុក ៨.៩៩២នាក់ (ស្រី៩០៦នាក់) ករណីប្រើប្រាស់គ្រឿងញៀន ៧.២០៩នាក់ (ស្រី៤២៥នាក់) ករណីកែច្នៃ៤នាក់ (ភេទប្រុស) និងករណីដាំដុះ ៧នាក់(ស្រី៤នាក់) ដែលរួមមានជនជាតិខ្មែរ ១៥.៨៨៥នាក់ (ស្រី១.២៩៥នាក់) និងជនបរទេស ៣៣១នាក់(ស្រី៥០នាក់) ស្មើនឹង២៥ជនជាតិ។ គ្រឿងញៀនសរុបយកបាន ៥៣៦.៣៥៤,៤៤គីឡូក្រាម ក្នុងនោះ៖ មេតំហ្វេតាមីនក្រាមម្សៅ( ICE) =៣០៦.៦៣០,៨៣គីឡូក្រាម មេតំហ្វេតាមីនគ្រាប់ (WY) = ៦៩២៦,៣០គីឡូក្រាម អិចស្តាស៊ី=១៧៩.៧៦០,៤២គីឡូក្រាម ហេរ៉ូអ៊ីន=១.៣២៨,៦២គីឡូក្រាម កូកាអ៊ីន=៥.៣៧៩,៧៥គីឡូក្រាម និងកេតាមីន=៣៦.៣២៨,៥២គីឡូក្រាម៕ គឹមអាន
ដោយ៖ នាយកដ្ឋានព័ត៌មានវិទ្យា