នារសៀលថ្ងៃព្រហស្បតិ៍ ១០កើត ខែមាឃ សំរឹទ្ធិស័ក ព.ស ២៥៦២ ត្រូវនឹងថ្ងៃទី១៤ ខែកុម្ភៈ ឆ្នាំ២០១៩ នៅទីស្តីការក្រសួងមហាផ្ទៃ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជាអធិបតីដ៏ខ្ពង់ខ្ពស់ ក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០១៨ និងលើកទិសដៅការងារ ឆ្នាំ២០១៩ របស់ក្រសួងមហាផ្ទៃ ដោយ មានការអញ្ជើញចូលរួមពី ថ្នាក់ដឹកនាំកំពូលៗរបស់រាជរដ្ឋាភិបាល និងមន្ត្រីរាជការគ្រប់ជាន់ថ្នាក់នៃក្រសួងមហាផ្ទៃ ព្រមជាមួយអភិបាលរាជធានី ខេត្ត ជាច្រើនផងដែរ។
យោងតាមកិច្ចពិភាក្សាដែលអង្គសន្និបាតបានបែងចែកតាមប្រធានបទក្នុងរយៈពេលមួយថ្ងៃកន្លងមក សម្រេចបានលទ្ធផលជាច្រើនរួមមាន៖ ការកសាងច្បាប់ និងលិខិតបទដ្ឋានគតិយុត្តិ, ការគ្រប់គ្រងដែនដី, ការងារគណបក្សនយោបាយ សមាគម និងអង្គការមិនមែនរដ្ឋាភិបាល, ការងារសន្តិសុខ សណ្ដាប់ធ្នាប់សាធារណៈ, ការងារប្រយុទ្ធប្រឆាំងអំពើជួញដូរមនុស្ស និងអំពើអាជីវកម្មផ្លូវភេទ, ការងារប្រយុទ្ធប្រឆាំងផលិតផលក្លែងក្លាយ, ការងារអត្តសញ្ញាណកម្ម, ការងារអន្តោប្រវេសន៍, ការងារពន្ធនាគារ, ការងារទទួលដោះស្រាយបណ្ដឹង ការចុះអធិការកិច្ច និងការចុះតាមដានសេចក្ដីជូនដំណឹង, ការងារសវនកម្មផ្ទៃក្នុង, ការងារបណ្ឌិត្យសភានគរបាលកម្ពុជា, ការងារភស្តុភារ និងហិរញ្ញវត្ថុ, ការងារទំនាក់ទំនងអន្តរជាតិ, និងការងារអភិវឌ្ឍន៍ធនធានមនុស្ស។
ព្រមជាមួយគ្នានោះដែរ ក្រសួងក៏បានកំណត់ចេញនូវទិសដៅយុទ្ធសាស្រ្តសំខាន់ៗចំនួន៤ សម្រាប់អនុវត្តក្នុងឆ្នាំ២០១៩នេះ រួមមាន៖ ទី១ បន្តខិតខំថែរក្សា ពង្រឹងសន្តិភាព ស្ថិរភាពនយោបាយ សន្តិសុខ សណ្ដាប់ធ្នាប់សាធារណៈ, ទី២ ជំរុញកម្មវិធីកំណែទម្រង់វិមជ្ឈការ និងវិសហមជ្ឈការ, ទី៣ខិតខំប្រមូលផ្ដុំបង្កើនប្រសិទ្ធភាពនៃការផ្ដល់សេវាសាធារណៈ និងខិតខំដោះស្រាយបញ្ហាប្រឈមនានាប្រកបដោយយុត្តិធម៌ តម្លាភាព ទាន់ពេលវេលា អត់ធ្មត់ខ្ពស់ បញ្ចៀសអំពើហិង្សា និងទី៤ ពង្រឹងការអនុវត្តច្បាប់ឲ្យបានម៉ឺងម៉ាត់ និងស្មើភាព។
សូមបញ្ជាក់ដែរថា ក្នុងពិធីបិទសន្និបាតនេះ សម្តេចអគ្គមហាសេនាបតីតេជោ ហ៊ុន សែន នឹងបំពាក់ឋានន្តរស័ក្តិថ្នាក់នាយឧត្តមសេនីយ៍ និងគ្រឿងឥស្សរិយយស ដល់មន្រ្តីនគរបាលជាតិ និងមន្ត្រីរដ្ឋបាលស៊ីវិលក្រសួងមហាផ្ទៃផងដែរ៕គឹមអាន
ដោយ៖ នាយកដ្ឋានព័ត៌មានវិទ្យា
