ក្រសួងមហាផ្ទៃ បានលើកយកប្រធានបទចំនួន៩ ដើម្បីមកពិភាក្សា ក្នុងគោលបំណងពង្រឹងប្រសិទ្ធភាពការងារនាពេលខាងមុខ
នារសៀលថ្ងៃពុធ ៩កើត ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៣ ខែកុម្ភៈ ឆ្នាំ ២០១៩ ក្រោយពិធីបើកសន្និបាតត្រួតពិនិត្យលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ អង្គសន្និបាតបានបែងចែកក្រុមការងារ និងបានលើកយកប្រធានបទចំនួន៩ ដើម្បីមកពិភាក្សា និងស្វែងរកធាតុចូល ក្នុងគោលបំណងពង្រឹងប្រសិទ្ធភាពការងារនាពេលខាងមុខ ដែលប្រធានបទទាំង៩នោះរួមមាន៖
- ១-ការគ្រប់គ្រង ចាត់ចែងមុខងារដែលបានផ្ទេរ ការគ្រប់គ្រងប្រើប្រាស់មន្រ្តីរដ្ឋបាលថ្នាក់ក្រោមជាតិ មានការលំបាក ភាពងាយស្រួលយ៉ាងណា? ការគ្រប់គ្រងមន្រ្តីរាជការស៊ីវិលក្រសួងមហាផ្ទៃ ដែលបំពេញការងារនៅសាលារាជធានី ខេត្ត ក្រុង ស្រុក ខណ្ឌ និងឃុំ សង្កាត់ មានចំណុចសកម្ម អសកម្មយ៉ាងណាខ្លះ?
- ២-ការផ្តល់សេវាតាមអង្គភាពច្រកចេញចូលតែមួយនៅរាជធានី ខេត្ត ក្រុង ស្រុក ខណ្ឌ និងការដោះស្រាយបណ្តឹងតាមរយៈការិយាល័យប្រជាពលរដ្ឋនៅថ្នាក់រដ្ឋបាលទាំងនេះ
- ៣-ការដោះស្រាយសំណើរ សំណូមពរ បញ្ហាប្រឈមនៅមូលដ្ឋាន និងការដោះស្រាយទំនាស់ក្រៅប្រព័ន្ធតុលាការពិសេសទំនាស់ដីធ្លី ព្រមទាំងវិធានការក្នុងការគ្រប់គ្រងធនធានធម្មជាតិ និងបរិស្ថាន។
- ៤-ជំរុញការផ្តល់ការងារផ្តល់អត្តសញ្ញាណកម្មជូនប្រជាពលរដ្ឋ មានភាពងាយស្រួល និងបញ្ហាប្រឈមអ្វីខ្លះ?
- ៥-ការពង្រឹងការអនុវត្តច្បាប់ចរាចរណ៍ផ្លូវគោក និងវិធានការកាត់បន្ថយគ្រោះថ្នាក់ចរាចរណ៍ វិធានការបង្ការ ទប់ស្កាត់ បង្ក្រាបអំពើភេរវកម្ម ចលនាបដិវត្តន៍ពណ៌ ប្រឆាំងបទល្មើសនានា
- ៦-ប្រសិទ្ធភាពនៃយន្តការ និងការចាត់តាំងអនុវត្តការងារត្រួតពិនិត្យគ្រឿងញៀននៅថ្នាក់ក្រោមជាតិ ពិសេសក្នុងការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៣ របស់រាជរដ្ឋាភិបាល
- ៧-ការគ្រប់គ្រងជនបរទេសគ្រប់ប្រភេទ ពិសេសជនបរទេសអន្តោប្រវេសន្ត និងហត្ថពលករបរទេស
- ៨-ការគ្រប់គ្រងជនជាប់ឃុំ ដើម្បីធានាសន្តិសុខ សុវត្ថិភាព សុខភាព មនុស្សធម៌ អប់រំកែប្រែ ឈានទៅធ្វើសមាហរណកម្មក្នុងសង្គមវិញ មានភាពងាយស្រួល និងមានបញ្ហាប្រឈមអ្វីខ្លះ?
- ៩-ការគ្រប់គ្រងដឹកនាំ និងអនុវត្តតួនាទី ភារកិច្ច និងមុខងារនៃរដ្ឋបាលក្រុង ស្រុក នាពេលបច្ចុប្បន្ន និងវិធានការនានា សម្របសម្រួលក្នុងការអនុវត្តគោលការណ៍កែសម្រួលរចនាសម័្ពន្ធ និងប្រព័ន្ធគ្រប់គ្រងនៅថ្នាក់ស្រុកក្រុង នាពេលខាងមុខ៕គឹមអាន
ដោយ៖ នាយកដ្ឋានព័ត៌មានវិទ្យា
