ក្នុងពិធីបើកសន្និបាតត្រួតពិនិត្យលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ នាព្រឹកថ្ងៃពុធ ៩កើត ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៣ ខែកុម្ភៈ ឆ្នាំ ២០១៩ នៅទីស្តីការក្រសួងមហាផ្ទៃ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ បានលើកឡើងថា មន្ត្រីអាជ្ញាធរពាក់ព័ន្ធទាំងអស់ ត្រូវចេញមុខដោះស្រាយ ឬបកស្រាយនូវរាល់ការពិតភ្លាមៗជូនប្រជាពលរដ្ឋ នៅពេលមានបញ្ហាណាមួយប៉ះពាល់ដល់អង្គភាព មិនត្រូវចំណាយពេលរង់ចាំចំណាត់ការពីថ្នាក់ក្រសួងនោះឡើយ។ សម្តេចក្រឡាហោម បន្តថា បច្ចុប្បន្នប្រព័ន្ធផ្សព្វផ្សាយមានច្រើនរួមមាន៖ ទូរទស្សន៍ វិទ្យុ កាសែត និងព័ត៌មានអនឡាញជាដើម ដូច្នេះ ថ្នាក់ដឹកនាំ និងមន្ត្រីពាក់ព័ន្ធទាំងអស់ត្រូវធ្វើយ៉ាងណា ពិនិត្យតាមដានព័ត៌មានទាំងអស់តាមរយៈបណ្តាញផ្សព្វផ្សាយនោះ ក្នុងករណីមានព័ត៌មានណាមួយដែលប៉ះពាល់ដល់អង្គភាព ឬទាក់ទងនឹងដែនសមត្ថកិច្ចរបស់ខ្លួន ត្រូវប្រជុំពិភាក្សាគ្នា និងធ្វើការតាមដាន ស៊ើបអង្កេតរកដើមចមនូវបញ្ហាទាំងនោះ ដើម្បីធ្វើការបកស្រាយជូនប្រជាពលរដ្ឋបានភ្លាមៗ ទាន់ពេលវេលា និងត្រឹមត្រូវ ខណៈក្នុងរយៈកាលកន្លងមកស្ថាប័នរដ្ឋ និងរដ្ឋបាលខេត្តមួយចំនួន នៅមានការយឺតយ៉ាវក្នុងការបកស្រាយឆ្លើយតបទៅប្រជាពលរដ្ឋ ក៏ដូចជាដោះស្រាយបញ្ហាជាដើម៕គឹមអាន-យ៉ាមី
ដោយ៖ នាយកដ្ឋានព័ត៌មានវិទ្យា