សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ បានមានប្រសាសន៍ថា ក្នុងរយៈពេលមួយឆ្នាំកន្លងមក ក្រសួងមហាផ្ទៃ នៅតែរក្សាបាននូវកិត្យានុភាពការងារប្រកបដោយប្រសិទ្ធភាព និងសម្រេចបានសមិទ្ធផលជាច្រើន ដែលកម្ពុជានៅតែបន្តរក្សាបាននូវសុខសន្តិភាព និងការពារអធិបតេយ្យភាពជាតិបូរណភាពទឹកដីបានយ៉ាងគត់មត់ ខឿនសន្តិសុខជាតិនៅតែរក្សាបានយ៉ាងល្អប្រសើរ ខណៈដែលប្រទេសមួយចំនួនក្នុងតំបន់ និងពិភពលោក ទទួលរងនូវភាពអសន្តិសុខក្រោមសម្ពាធនៃការប្រកួតប្រជែង យោធា នយោបាយ និងសេដ្ឋកិច្ឋរបស់ប្រទេសមហាអំណាចធំៗ។
សម្តេចក្រឡាហោម មានប្រសាសន៍បែបនេះក្នុងពិធីបើកសន្និបាតត្រួតពិនិត្យលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ នាព្រឹកថ្ងៃពុធ ៩កើត ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៣ ខែកុម្ភៈ ឆ្នាំ ២០១៩ នៅទីស្តីការក្រសួងមហាផ្ទៃ។ សម្តេចក្រឡាហោមបន្តថា សាមគ្គីភាព ឯកភាពផ្ទៃក្នុងជាតិ ត្រូវបានរក្សាការពារយ៉ាងរឹងមាំ និងកម្លាំងប្រដាប់អាវុធខុសច្បាប់ ក៏ដូចជាសកម្មភាពប៉ុនប៉ងបង្កចលាចលវឹកវរនានាក្នុងសង្គម ត្រូវបានរាំងខ្ទប់បានទាន់ពេលវេលា ជាក់ស្តែងក្រសួងមហាផ្ទៃ បង្រ្កាបបាននូវបទល្មើសព្រហ្មទណ្ឌជាច្រើន ដែលភាគច្រើនជាបទល្មើសមជ្ឈិម ដោយអាជ្ញាធរសមត្ថកិច្ច ខិតខំប្រឹងប្រែងអនុវត្តន៍ បង្ក្រាបបានជាង ៨៧% ដែលជាចំនួនមួយខ្ពស់គួរអោយកត់សម្គាល់ផងដែរ។ សម្តេចបានបន្ថែមទៀតថា ការអនុវត្តយុទ្ធនាការប្រយុទ្ធប្រឆាំងគ្រឿងញៀន សម្រេចបានលទ្ធផលល្អកាន់តែប្រសើរ ទាំងការងារផ្សព្វផ្សាយអប់រំ ការងារអនុវត្តច្បាប់ ការងារព្យាបាល និងការស្តារនីតិសម្បទាអ្នកញៀនគ្រឿងញៀន កិច្ចសហប្រតិបត្តិការរវាងក្រសួង ស្ថាប័នជាតិ អន្តរជាតិ និងការពង្រឹងយន្តការត្រួតពិនិត្យគ្រឿងញៀនទាំងនៅថ្នាក់ជាតិ និងថ្នាក់ក្រោមជាតិ។
សម្តេចក្រឡាហោម បានលើកឡើងបន្ថែមទៀតថា ក្រសួងបានដោះស្រាយនូវបញ្ហាជាច្រើនលើការងារអត្តសញ្ញាណកម្ម ដែលបានដំណើរការប្រកបដោយប្រសិទ្ធភាពខ្ពស់ ហើយឆ្លើយតបបានតាមតម្រូវការ ព្រមទាំងដោះស្រាយបាននូវសំណូមពរ និងបញ្ហាប្រឈមជាច្រើនរបស់ប្រជាពលរដ្ឋ។ ជាងនេះទៅទៀត ការផ្តល់សេវារដ្ឋបាលតាមរយៈការិយាល័យច្រកចេញចូលតែមួយក៏មានលទ្ធផលល្អជាច្រើនផងដែរ ដោយនៅក្នុងឆ្នាំ២០១៨ រាជរដ្ឋាភិបាលបានដាក់ឲ្យដំណើរការអង្គភាពច្រកចេញចូលតែមួយនៅថ្នាក់រាជធានី ខេត្តទាំង២៥ និងការិយាល័យចក្រចេញចូលតែមួយនៅស្រុកគោលដៅចំនួន ៦បន្ថែមទៀត ដើម្បីឆ្លើយតបទៅនឹងតម្រូវការចំបាច់នៃការផ្តល់សេវាជូនប្រជាពលរដ្ឋ៕គឹមអាន-យ៉ាមី
ដោយ៖ នាយកដ្ឋានព័ត៌មានវិទ្យា