នារសៀលថ្ងៃព្រហស្បតិ៍ ១២កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៧ ខែមករា ឆ្នាំ២០១៩ សម្តេចក្រឡាហោម ស ខេងឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ បានអនុញ្ញាតឲ្យនិស្សិតខ្មែរដែលទទួលបានអាហារូបករណ៍ពីរដ្ឋាភិបាលណូវែលហ្សេឡង់ទៅសិក្សានៅប្រទេសណូវែលហ្សេឡង់ចូលជួបសម្តែងការគួរសម និងទទួលយកអនុសាសន៍មួយចំនួនមុនចេញដំណើរទៅសិក្សានៅប្រទេសណូវែលហ្សេឡង់។
សម្តេចក្រឡាហោម ស ខេងបានផ្តល់អនុសាសន៍មួយចំនួនដល់ប្អូនៗដែលជានិស្សិតទាំងអស់ត្រូវខិតខំរៀនសូត្រ ដើម្បីឲ្យក្លាយជាទំពាំងស្នងឬស្សី និងក្រោយពេលបញ្ចប់ការសិក្សាត្រូវជួយបំរើសង្គមខ្មែរឲ្យកាន់តែរីកចម្រើនបន្ថែមទៀតនៅលើជំនាញដែលខ្លួនបានសិក្សាបន្ថែមនោះ។ សម្តេចក៏បានបញ្ជាក់ដល់និស្សិតទាំងនោះទៀតថា ត្រូវខិតខំសិក្សារៀនសូត្រយកចំណេះវិជ្ជាដែលយើងទទួលបាន និងត្រូវត្រឡប់មកជួយប្រទេសជាតិវិញបន្ទាប់ពីយើងត្រូវបានបញ្ចប់ការសិក្សាដោយជោគជ័យនោះ។ សម្តេចលើកទឹកចិត្តដល់ក្រុមនិសិត្សទាំងអស់ត្រូវ សាមគ្គីគ្នាទាំងក្រៅប្រទេស និងក្នុងប្រទេស ហើយត្រូវផ្សព្វផ្សាយនូវអ្វីដែលជាអរិយធ៌ម វប្បធ៌មល្អរបស់កម្ពុជា ទៅដល់បរទេសឲ្យគេបានដឹង៕គឹមអាន
ដោយ៖ នាយដ្ឋានព័ត៌មានវិទ្យា
