សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍ថា ភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល គឺមានន័យសំដៅទៅលើការទំនាក់ទំនងដោយស្មោះត្រង់រវាងរាជរដ្ឋាភិបាល ជាមួយអង្គការសង្គមស៊ីវិលក្នុងការធ្វើសកម្មភាពអ្វីមួយ សម្រាប់បម្រើផលប្រយោជន៍សង្គម។ សម្តេចក្រឡាហោម មានប្រសាសន៍ដូចនេះ នៅក្នុងវេទិកា ស្តីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល លើកទី២ នៅទីស្តីការក្រសួងមហាផ្ទៃ នាព្រឹកថ្ងៃព្រហស្បតិ៍ ១២កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៧ ខែមករា ឆ្នាំ២០១៩នេះ។ សម្តេចក្រឡាហោមបន្តថា ជារួមមកការអនុវត្តការងារក្នុងលក្ខណភាពជាដៃគូ ហើយជោគជ័យដែលអាចទទួលទៅបានគឺអាស្រ័យទៅភាគីទាំងពីរ សហការរួមគ្នាក្នុងការបំពេញកិច្ចការ និងដោះស្រាយបញ្ហាជាមួយគ្នាដោយស្មោះត្រង់ដោយគ្មានលាក់លៀម។ សម្តេចបានបន្ថែមទៀតថា ភាគីដែលជាដៃគូនិងគ្នា ត្រូវមានការទុកចិត្តគ្នា គាំទ្រគ្នា គោរពគ្នាទៅវិញទៅមក និងត្រូវចេះអធ្យាស្រ័យគ្នាផងដែរ។ ជាងនេះទៅទៀតត្រូវរៀនសូត្រ និងចែករំលែកបទពិសោធន៍អោយគ្នាទៅមក ដើម្បីសម្រេចបាននូវគោលដៅរួមគ្នា។ ជាមួយគ្នានេះផងដែរ សម្តេចក្រឡាហោម ក៏បានស្នើដល់តំណាងដៃគូអភិវឌ្ឍន៍ អង្គការសង្គមស៊ីវិល បន្តផ្តល់ការគាំទ្រ និងចូលរួមជាមួយរាជរដ្ឋាភិបាលកម្ពុជា ក្នុងការលើកកម្ពស់លទ្ធិប្រជាធិបតេយ្យ និងការអភិវឌ្ឍសេដ្ឋកិច្ចជាតិឲ្យកាន់តែមានភាពរីកចម្រើន និងរុងរឿង ដូចបណ្តាប្រទេសនានាលើសកលលោក៕គឹមអាន
ដោយ៖នាយកដ្ឋានព័ត៌មានវិទ្យា