នារសៀលថ្ងៃអាទិត្យ ៤កើត ខែកត្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១១ ខែវិច្ឆិកា ឆ្នាំ២០១៨ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ អញ្ជើញចូលរួមព្រះរាជពិធីពន្លត់ភ្លើងជ័យ ក្រោមព្រះរាជធិបតីដ៏ខ្ពង់ខ្ពស់បំផុត ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី នៅវិមានឯករាជ្យ ក្នុងរាជធានីភ្នំពេញ ដែលភ្លើងជ័យនេះ ព្រះករុណា ព្រះមហាក្សត្រ ប្រទានដុតបំភ្លឺ ក្នុងព្រះរាជពិធីរំលឹកខួប ៦៥ឆ្នាំ នៃទិវាបុណ្យឯករាជ្យជាតិនា ថ្ងៃទី០៩ ខែវិច្ឆិកា កន្លងទៅនេះ ដោយត្រូវបានរក្សាទុករយៈពេល ៣ ថ្ងៃមកហើយ ដោយមានកងកម្លាំង ៤ រូប ឈរប្រចាំការ យាមនៅទិសទាំង ៤ នៅកណ្តាលវិមានឯករាជ្យ ទាំងយប់ទាំងថ្ងៃ គឺ២៤ម៉ោង ក្នុង ១ថ្ងៃ។
សូមបញ្ជាក់ដែរថា កម្ពុជាបានរៀបចំពិធីអបអរសាទររំលឹកខួប ៦៥ឆ្នាំ នៃទិវាបុណ្យឯករាជ្យជាតិ ០៩ខែវិច្ឆិកា ឆ្នាំ២០១៨នេះ មានលក្ខណទ្រង់ទ្រាយធំខុសពីឆ្នាំមុនៗ និងមានមិទ្ទិញមហាជននៅមុខព្រះបរមរាជវាំង ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី។ ក្នុងមិទ្ទិញអបអរទិវាបុណ្យឯករាជ្យជាតិ ខួបលើកទី៦៥ឆ្នាំនេះដែរ ចំពោះព្រះភក្ត្រព្រះមហាក្សត្រ មន្ត្រីរាជការ កងកម្លាំងប្រដាប់អាវុធ និងមហាជន ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានបង្ហាញជំហរយ៉ាងមុតមាំ ក្នុងការការពារឯករាជ្យភាពជាតិ ប្រឆាំងការជ្រៀតជ្រែកពីសំណាក់បរទេស ដោយបន្តអនុវត្តតាមព្រះរាជបូជនីយកិច្ចដ៏ឧត្តុងឧត្តមរបស់សម្តេច ព្រះបរមរតនកោដ្ឋ នរោត្តម សីហនុ៕គឹមអាន