នៅទីស្ដីការក្រសួងមហាផ្ទៃ នាព្រឹកថ្ងៃទី២៣ ខែកុម្ភៈ ឆ្នាំ២០២១នេះ សម្តេចក្រឡាហោម ស ខេង ឧប នាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតីដ៏ខ្ពង់ខ្ពស់ដឹកនាំកិច្ចប្រជុំស្ដាប់របាយការណ៍ ការសាងសង់អាគារទីស្ដីការក្រសួងមហាផ្ទៃ អគ្គស្នងការដ្ឋាននគរបាលជាតិ អគ្គនាយកដ្ឋានអន្តោប្រវេសន៍ អគ្គនាយកដ្ឋានអត្តសញ្ញាណកម្ម និងមជ្ឈមណ្ឌលផ្ទុកទិន្នន័យដោយមានការអញ្ជើញចូលរួមពីសំណាក់ ឯកឧត្តមរដ្ឋលេខាធិការប្រចាំការ រដ្ឋលេខាធិការ អនុរដ្ឋលេខាធិការ អគ្គនាយក តំណាងអគ្គនាយក តំណាងអគ្គស្នង ការដ្ឋាននគរបាលជាតិ តំណាងក្រុមហ៊ុនសាងសង់ និងមន្រ្តីជាន់ខ្ពស់ពាក់ព័ន្ធមួយចំនួនទៀត។
សម្ដេចក្រឡាហោម ស ខេង មានប្រសាសន៍ ក្រើនរំលឹកដល់ក្រុមការងារសាងសង់ត្រូវធ្វើការដោយ ការយកចិត្តទុកដាក់ខ្ពស់ទៅលើគុណភាពសំណង់ សុវត្ថិភាព និងទាន់ពេលវេលា ធ្វើយ៉ាងណាឱ្យអាគារ ទីស្តីការក្រសួងមហាផ្ទៃនេះមានភាពរ៉ឹងម៉ាំ គង់វង្ស ហើយអាចក្លាយជាអាគារវប្បធម៌សម្រាប់កូនចៅ ជំនាន់ក្រោយផងដែរ។
សូមបញ្ជាក់ថា យោងតាមប្លង់ស្ថាបត្យកម្ម អគារថ្មីនៃទីស្តីការក្រសួងមហាផ្ទៃ អគារថ្មីនៃទីស្ដីការក្រសួង មហាផ្ទៃកម្ពស់៩ជាន់ បណ្ដោយជាង១៥០ម៉ែត្រ និងទទឹងជាង៨០ ម៉ែត្រ នៅក្នុងបរិវេណទីតាំងចាស់ តាមគម្រោងអគារថ្មីនេះ គ្រោងនឹងបញ្ចប់នៅមុន ខែសីហា ឆ្នាំ២០២៣៕
ដោយ៖ នាយកដ្ឋានព័ត៌មានវិទ្យា
