ព្រឹកថ្ងៃពុធ ២រោច ខែបុស្ស ឆ្នាំរកា ២៥៦១ ត្រូវនឹងថ្ងៃទី០៣ ខែមករា ឆ្នាំ២០១៨ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិដឹកនាំតម្រង់ទិសការងារអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម(គ.ជ.ដ.អ) បានអញ្ជើញជាអធិបតីដ៏ខ្ពង់ខ្ពស់ ក្នុងកិច្ចប្រជុំគណៈកម្មាធិការជាតិដឹកនាំតម្រង់ទិសការងារអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម លើកទី១។ កិច្ចប្រជុំនេះបានរៀបចំឡើងក្នុងគោលបំណង ជួបជុំថ្នាក់ដឹកនាំក្រសួងមហាផ្ទៃ ដើម្បីវិភាគបញ្ហា ស្វែងរកដំណោះស្រាយក្នុងកិច្ចអភិវឌ្ឍន៍មូលដ្ឋាន និងពិនិត្យមើលពីវឌ្ឍនភាពនៃការអនុវត្តការងារអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ធៀបទៅនិងផែនការយុទ្ធសាស្ត្រជាតិស្តីពីអត្តសញ្ញាណ ឆ្នាំ២០១៧-២០២៦ និងអនុសាសន៍របស់អង្គការសហប្រជាជាតិ ដើម្បីឆ្លើយតបទៅនឹងតម្រូវការរបស់ប្រទេសកម្ពុជាយើងផង និងសូចនាករនានានៃគោលដៅអភិវឌ្ឍប្រកមដោយចីរភាពរបស់អង្គការសសហប្រជាជាតិផងដែរ។
