សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងលោកជំទាវ តាងនាមថ្នាក់ដឹកនាំ មន្រ្តីរាជការស៉ីវិល មន្ត្រីនគរបាលជាតិ មន្ត្រីពន្ធនាគារ នៃក្រសួងមហាផ្ទៃ បានផ្ញើសាររំលែកមរណទុក្ខជូនលោកជំទាវ ឈរ ណារី ព្រមទាំងក្រុមគ្រួសារ ចំពោះមរណភាពឯកឧត្តម ត្រាំ អ៉ីវ តឹក ទេសរដ្ឋមន្ត្រីទទួលបន្ទុកបេសកកម្មពិសេស ត្រូវជាស្វាមី ដែលបានទទួលមរណភាពកាលពីថ្ងៃអង្គារ ទី០១ ខែមិថុនា ឆ្នាំ២០២១ ក្នុងជន្មាយុ ៧៣ឆ្នាំ ដោយរោគាពាធ។

មរណភាពរបស់ឯកឧត្តម ត្រាំ អ៉ីវ តឹក ទេសរដ្ឋមន្ត្រីទទួលបន្ទុកបេសកកម្មពិសេស គឺការបាត់បង់ដ៏ធំធេងនូវស្វាមី និងឪពុក ជាទីគោរពស្រលាញ់ដ៏ជ្រាលជ្រៅជាទីបំផុត និងជាការបាត់បង់នូវធនធានមនុស្សជាបញ្ញវន្តប្រកបដោយគុណវុឌ្ឍិ និងជាឥស្សរជនជាន់ខ្ពស់ដ៏ឆ្នើមមួយរូបរបស់រាជរដ្ឋាភិបាកកម្ពុជា ដែលក្នុងរយៈពេលកន្លងមក ឯកឧត្តមតែងតែខិតខំយកអស់កម្លាំងកាយចិត្ត ប្រាជ្ញាស្មារតី ចូលរួមចំណែកយ៉ាងសកម្ម ក្នុងបុព្វហេតុ កសាង ស្តារ និងអភិវឌ្ឍសង្គមជាតិ ជាពិសេសក្នុងវិស័យសាធារណៈការដឹកជញ្ជូន និងទូរគមនាគមន៍។

សម្ដេចក្រឡាហោម ស ខេង និងលោកជំទាវ ព្រមទាំងថ្នាក់ដឹកនាំ និងមន្ត្រីរាជការ នៃក្រសួងមហាផ្ទៃទាំងអស់ សូមចូលរួមរំលែកទុក្ខព្រួយដ៏ក្រៀមក្រំនេះ និងសូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្តម ត្រាំ អ៉ីវតឹក បានទៅកាន់ឋានបរមសុខ ក្នុងសុគតិភពកុំបីឃ្លៀងឃ្លាតឡើយ៕

ដោយ ៖ នាយកដ្ឋានព័ត៌មានវិទ្យា