នៅទីស្តីការក្រសួងមហាផ្ទៃ នារសៀលថ្ងៃចន្ទ ទី២៩ ខែមិថុនា ឆ្នាំ២០២០ ក្រសួងមហាផ្ទៃ បានបន្តបើកកិច្ចប្រជុំពិនិត្យ ពិភាក្សាស្ដីពីកិច្ចសហប្រតិបត្តិការប្រមូលប្រាក់ពិន័យចរាចរណ៍តាមរយៈសេវាធនាគាអេឡិចត្រូនិករបស់ធនាគារជាដៃគូរបម្រើសេវាកម្មប្រតិបត្តិការចំណូល-ចំណាយថវិការដ្ឋ ក្រោមអធិបតីភាព ឯកឧត្តម សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ ដោយមានការចូលរួមពី រដ្ឋលេខាធិការ អនុរដ្ឋលេខាធិការ អគ្គនាយកដ្ឋានភស្តុភារ និងហិរញ្ញវត្ថុ អគ្គស្នងការដ្ឋាននគរបាលជាតិ នាយកដ្ឋាននានា ព្រមទាំងតំណាងរបស់ក្រុមហ៊ុនធនាគារឯកជនផងដែរ។

      ឯកឧត្តម សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ បានលើកឡើងថា ដោយអនុវត្តតាមអនុសាសន៍ដឹកនាំដ៏ខ្ពង់ខ្ពស់របស់សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដែលបានប្រគល់ភារកិច្ចឱ្យឯកឧត្តម ដើម្បីជួបពិភាក្សាជាមួយធនាគារឯកជន ទៅលើសំណើរបស់ធនាគារអេឡិចត្រូនិកចូលរួមក្នុងការប្រមូលនូវការផាកពិន័យចរាចរណ៍ ក្នុងន័យដើម្បីសម្រួលដល់ការប្រមូល ថ្លៃផាកពិន័យ ការបែងចែកភាគលាភនៃការផាកពិន័យរបស់នគរបាលចរាចរណ៍ ការប្រមូលសេវាធ្វើលិខិតឆ្លងដែនតាមរយៈកម្មវិធីឌីជីថល។

      ដើម្បីពិភាក្សាលើកិច្ចការនេះ សម្តេចក្រឡាហោម ស ខេង បានសម្រេចបង្កើតឱ្យមានក្រុមការងារមួយ ដែលមានឯកឧត្តម សក់ សេដ្ឋា ជាប្រធាន ឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ ជាអនុប្រធាន និងសមាជិកចំនួន៨រូបផ្សេងទៀត។

      ឯកឧត្តម សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ បានបន្ថែមទៀតថាក្នុងពេលនេះ ឯកឧត្តមចង់ឱ្យមានបទបង្ហាញ ដើម្បីឱ្យឯកឧត្តមទទួលបាននូវព័ត៌មានទាក់ទងសេវានានារបស់ធនាគារដៃគូរដែលចង់សហការ និងបំណងនៃការផ្តល់សេវា ប្រមូលនូវការផាកពិន័យចរាចរណ៍ ក្នុងន័យដើម្បីសម្រួលដល់ការប្រមូលថ្លៃផាកពិន័យ ការបែងចែកភាគលាភនៃការផាកពិន័យរបស់នគរបាលចរាចរណ៍ការប្រមូលសេវាធ្វើលិខិតឆ្លងដែន និងសេវានានា ដែលស្ថិតក្រោម សមត្ថកិច្ចរបស់ក្រសួងមហាផ្ទៃ៕

ដោយ៖ នាយកដ្ឋានព័ត៌មានវិទ្យា