នាព្រឹកថ្ងៃសុក្រ ទី២២ ខែឧសភា ឆ្នាំ២០២០ នៅសាលប្រជុំអគារ(W) ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារ និងហិវញ្ញវត្ថុ បានអញ្ជើញជាអធិបតីភាពក្នុងកិច្ចប្រជុំឆ្លងផែនការសកម្មភាពសម្រាប់អនុវត្តឆ្នាំ២០២០ និងបូកសរុបលទ្ធផលការងារប្រចាំខែឧសភា និងលើកទិសដៅការងារខែមិថុនា ឆ្នាំ២០២០ របស់អគ្គនាយកដ្ឋានភស្តុភារ និងហិរញ្ញវត្ថុ ដោយមានការចូលរួមពី ឯកឧត្តម លោកជំទាវ ជាអគ្គនាយករង និងលោកប្រធាននាយកដ្ឋានជំនាញចំណុះអគ្គនាយកដ្ឋានភស្តុភារ និងហិរញ្ញវត្ថុផងដែរ។
ចំពោះផែនការសកម្មភាពដែលត្រូវបានដាក់ប្រជុំឆ្លងសម្រាប់អនុវត្តឆ្នាំ២០២០នាពេលនេះរួមមាន ៖ យុទ្ធសាស្រ្តចំនួន០៥ ចង្កោមសកម្មភាពចំនួន២០ និងសកម្មភាពចំនួន១០៣។ ដោយឡែក សម្រាប់របាយការណ៍ប្រចាំខែឧសភា និងលើកទិសដៅការងារខែមិថុនា ឆ្នាំ២០២០ ឯកឧត្តម នាយឧត្តម សេនីយ៍ អគ្គនាយកក៏បានសម្តែងនូវការកោតសរសើរចំពោះការខិតខំប្រឹងប្រែងអនុវត្តភារកិច្ចរបស់មន្រ្តីរាជការស៊ីវិល និងមន្ត្រីនគរបាលជាតិ ចំណុះអគ្គនាយកដ្ឋានភស្តុភារនងហិរញ្ញវត្ថុ ក្នុងការផ្តល់សេវាគាំទ្រដល់គ្រប់សកម្មភាពការងាររបស់បណ្តានាយកដ្ឋាន-អង្គភាពចំណុះក្រសួងមហាផ្ទៃទទួលបានលទ្ធផលល្អប្រសើរ ថ្វីត្បិតយើងជួបវិបត្តដោយសារជំងឺCOVID-19ក៏ដោយ។
ទន្ទឹមនោះ ឯកឧត្តម នាយឧត្តមសេនីយ៍ អគ្គនាយកក៏បានមានប្រសាសន៍ផ្តាំផ្ញើដល់ថ្នាក់ដឹកនាំគ្រប់នាយកដ្ឋាន-អង្គភាពជំនាញអោយខិតខំអនុវត្តភារកិច្ចជំនាញប្រកបដោយប្រសិទ្ធភាព ពិសេសនាយកដ្ឋានជំនាញទាំងពីរ រួមមាន៖ នាយកដ្ឋានផែនការសេដ្ឋកិច្ច និងហិរញ្ញវត្ថុ ផ្នែកសន្តិសុខសាធារណៈ និងនាយកដ្ឋានផែនការសេដ្ឋកិច្ច និងហិរញ្ញវត្ថុ ផ្នែករដ្ឋបាលទូទៅ ពន្លឿនក្នុងការអនុវត្តថវិកា៕
ប្រភព៖ អគ្គនាយកដ្ឋានភស្តុភារ និងហិវញ្ញវត្ថុ