សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងលោកជំទាវ ព្រមទាំងថ្នាក់ដឹកនាំ មន្ត្រីរាជការស៊ីវិល និងនគរបាលជាតិ នៃក្រសួងមហាផ្ទៃ នៅថ្ងៃទី១២ ខែកញ្ញា ឆ្នាំ២០១៩នេះ បានផ្ញើសារលិខិត ចូលរួមរំលែកមរណៈទុក្ខ ជាមួយលោកជំទាវ ខាំ ភៀន ដោយឯកឧត្តមនាយឧត្តមសេនីយ៍ ប៊ូ ថង អតីតសមាជិកព្រឹទ្ធសភា ដែលត្រូវជាស្វាម៊ី បានទទួលមរណភាព នៅយប់ថ្ងៃទី១២ ខែកញ្ញា ឆ្នាំ២០១៩ វេលាម៉ោង ០១:២០នាទីរំលងអធ្រាត្រ ក្នុងជន្មាយុ ៨២ឆ្នាំ ដោយរោគាពាធ។
សារលិខិតសម្តេចក្រឡាហោម បានសរសេរថា៖ «មរណភាពរបស់ ឯកឧត្តម នាយឧត្តមសេនីយ៍ ប៊ូ ថង គឺជាការបាត់បង់ស្វាមី ឪពុក និងជីតាជាទីគោរពស្រឡាញ់ដ៏ជ្រាលជ្រៅ និងប្រកបដោយព្រហ្មវិហារធម៌ដ៏ថ្លៃថ្លាបំផុតរបស់លោកជំទាវ និងក្រុមគ្រួសារ ហើយក៏ជាការបាត់បង់នូវឥស្សរជនជាន់ខ្ពស់របស់ជាតិនិងជាកុលបុត្រខ្មែរដ៏ឆ្នើមមួយរូប ដែលក្នុងឆាកជីវិតរបស់ឯកឧត្តមបានលះបង់កម្លាំងកាយ និងប្រាជ្ញាស្មារតី ក្នុងចលនាតស៑ូយ៉ាងប្តូរផ្តាច់ដើម្បីបុព្វហេតុជាតិមាតុភូមិ និងប្រជាជន ប្រកបដោយឆន្ទះ និងមនសិកាស្នេហាជាតិដ៏ក្លាហានមុះមុត ការលះបង់ និងស្នាដៃដ៏គួរឲ្យស្ងប់ស្ងែងយ៉ាងច្រើនអនេករបស់ ឯកឧត្តម នាយឧត្តមសេនីយ៍ ប៊ូ ថង មានតម្លៃមិនអាចកាត់ថ្លៃបាននៅក្នុងដំណើរការកសាងសង្គមជាតិ និងការការពារ បានយ៉ាងរឹងមាំនូវអធិបតេយ្យ និងបូរណៈភាពជាតិទឹកដី ដែលរួមចំណែកនាំមកនូវវិបុលភាពសំរាប់ព្រះរាជាណាចក្រកម្ពុជាដូចបច្ចុប្បន្ន»។
តាងនាមថ្នាក់ដឹកនាំ មន្ត្រីរាជការស៊ីវិល និងនគរបាលជាតិ នៃក្រសួងមហាផ្ទៃ សម្តេច និងភរិយា សូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្តម នាយឧត្តមសេនីយ៍ ប៊ូ ថង បានសោយសុខក្នុងសុគតិភពកុំបីឃ្លៀងឃ្លាតឡើយ៕
ខាងក្រោមនេះជាសារលិខិតសម្តេចក្រឡាហោម ស ខេង៖