សម្តេចក្រឡាហោម ស ខេង បានមានប្រសាសន៍គូសបញ្ជាក់ថា បញ្ហាអន្តោប្រវេសន៍ ជាបញ្ហាដែលមិនមែនកើតមានតែនៅក្នុងព្រះរាជាណាចក្រកម្ពុជានោះឡើយ ជាក់ស្តែងនៅក្នុងពិភពលោក បញ្ហានេះបានកើតឡើងនៅស្ទើរគ្រប់ប្រទេស។ សម្តេចក្រឡាហោម បានលើកឡើងដូចនេះនៅក្នុងកិច្ចប្រជុំផ្សព្វផ្សាយលទ្ធផលការងារ ដកហូតឯកសាររដ្ឋបាលកម្ពុជា មិនប្រក្រតី ដែលជនបរទេសកាន់កាប់ប្រើប្រាស់ និងការទទួលពាក្យសុំប្រកាសទទួលស្គាល់ ជាជនបរទេសអន្តោប្រវេសន៍ និងប័ណ្ណស្នាក់នៅអចិន្ត្រៃយ៍ នាព្រឹកថ្ងៃពុធ ទី១៧ ខែកក្កដា ឆ្នាំ២០១៩ នៅទៅស្តីការក្រសួងមហាផ្ទៃ។ សម្តេចក្រឡាហោមបានបន្តថា បញ្ហាអន្តោប្រវេសន៍គឺទាក់ទិននឹងបញ្ហាប្រវត្តិសាស្រ្ត សេដ្ឋកិច្ច នយោបាយ ដែលជាទូទៅបញ្ហានេះមានការវិវត្តន៏ស្មុគស្មាញលំបាកដោះស្រាយហើយការដោះស្រាយតម្រូវឲ្យមានកិច្ចសហការពីភាគីពាក់ព័ន្ធ និងការចូលរួមគាំទ្រពីសាធារណជនក៏ដូចជា សាធារណមតិអន្តរជាតិផងដែរ។
សម្តេចក្រឡាហោម ស ខេង បានលើកឡើងបន្ថែមថា ចំពោះកម្ពុជាយើងបញ្ហាអន្តោប្រវេសន៍មិនមែនទើបតែកើតមាននៅក្នុងជំនាន់បច្ចុប្បន្ននោះទេ វត្តមានជនបរទេសដែលបានមកតាំងទីលំនៅក្នុងប្រទេសកម្ពុជាបានកើតមានតាំងពីជំនាន់អាណានិគមនិយមបារាំងមកម្ល៉េះ ដែលក្នុងនោះច្រើនជាងគេគឺចិននិងវៀតណាម។ សម្តេចក្រឡាហោមបន្តថា បន្ទាប់ពីការបោះឆ្នោតនាឆ្នាំ១៩៩៣ រដ្ឋាភិបាលដែលប្រសូតចេញពីការបោះឆ្នោតបានប្រកាន់យករបបគ្រប់គ្រងប្រទេសតាមគោលការណ៍នៃលទ្ធិប្រជាធិបតេយ្យសេរីពហុបក្ស ការលើកស្ទួយការគោរពសិទ្ធិមនុស្ស និងនីតិរដ្ឋដោយបានចាត់ទុកការងារគ្រប់គ្រងជនបរទេស ជាកិច្ចការអាទិភាពមួយក្នុងចំណោម កិច្ចការអាទិភាពនានាដែលត្រូវដោះស្រាយ ព្រមជាមួយគ្នានោះសេចក្តីព្រាងច្បាប់ស្ដីពីអន្តោប្រវេសន៍ ត្រូវបានរៀបចំ និងដាក់ជូនរដ្ឋសភាអនុម័ត ហើយត្រូវបានព្រះមហាក្សត្រឡាយព្រះហស្តលេខាប្រកាសដាក់ឲ្យប្រើប្រាស់ជាប្រញាប់កាលពីខែកញ្ញាឆ្នាំ១៩៩៤ ក្នុងគោលបំណងជំរុញឲ្យមានការដោះស្រាយបញ្ហាជនបរទេសអន្តោប្រវេសន្ត ដែលបានចូលមកតាំងទីលំនៅ នៅក្នុងព្រះរាជាណាចក្រកម្ពុជាឱ្យបានឆាប់ ប៉ុន្តែប្រសិទ្ធភាពនៃការអនុវត្តដោះស្រាយបញ្ហានេះត្រូវអូសបន្លាយ និងរាំងស្ទះដោយសារតែមូលហេតុនយោបាយ។
សម្តេចក្រឡាហោមបានបន្ថែមទៀតថា ក្រសួងមហាផ្ទៃបានយកចិត្តទុកដាក់ដឹកនាំប្រកបដោយការទទួលខុសត្រូវខ្ពស់ក្នុងនាមជាសេនាធិការជូនរាជរដ្ឋាភិបាលក្នុងការរៀបចំឯកសារបទដ្ឋានគតិយុត្តនានាជាច្រើន និងបានចាត់តាំងអនុវត្តការងារគ្រប់គ្រងជនបរទេសដែលចូល-ចេញ ស្នាក់នៅក្នុងព្រះរាជាណាចក្រកម្ពុជា ដោយទទួលបានលទ្ធផលនានាជាច្រើន ដើម្បីចូលរួមអនុវត្តគោលនយោបាយបើកចំហរជើងមេឃ សំដៅទាក់ទាញ អ្នកទេសចរ ពាណិជ្ជករ អ្នកវិនិយោគ និងក្នុងការរក្សាសន្តិសុខជាតិសណ្តាប់ធ្នាប់សាធារណៈ និងសុវត្ថិភាពសង្គមព្រមទាំងការចូលរួមអភិវឌ្ឍន៍សេដ្ឋកិច្ចសង្គម។ សម្តេចក្រឡាហោមបន្តទៀតថា ចំពោះការដោះស្រាយបញ្ហាជនបរទេសអន្តោប្រវេសន្ត ក្រសួងមហាផ្ទៃបានចាត់ចែងធ្វើជំរឿនស្ថិតិជនបរទេសចំនួន ៣ លើក គឺនៅក្នុងឆ្នាំ ១៩៩៥, ឆ្នាំ ២០០២, និងឆ្នាំ ២០១៥-១៦ សំដៅចាត់វិធានការដើម្បីគ្រប់គ្រងវិភាគវាយតម្លៃអំពីស្ថានភាពនៃជនបរទេសអន្តោប្រវេសន្ត និងបង្ការទប់ស្កាត់ការលួចជ្រៀតចូលថ្មីៗដែលខុសច្បាប់ចូលមកព្រះរាជាណាចក្រ កម្ពុជា៕ គឹមអាន
ដោយ៖ នាយកដ្ឋានព័ត៌មានវិទ្យា
