សម្តេចក្រឡាហោម ស ខេង លើកឡើងថា ក្រសួងមហាផ្ទៃ នៅតែបន្ត និងពង្រឹងការដកហូតឯកសារមិនប្រក្រតីដែលជនបរទេសកំពុងកាន់កាប់ ដែលគិតត្រឹមថ្ងៃទី១៧ ខែកក្កដា ឆ្នាំ២០១៩ ប៉ូលិសអន្តោប្រវេសន៍ បានដកហូតឯកសាររដ្ឋបាលកម្ពុជា ចំនួន ៣៧៤៤១ ច្បាប់ ស្មើនឹង ២០០៩៣ គ្រួសារ ដោយមានមនុស្ស ៦៩៨៧១ នាក់ ក្នុងនោះមាន ១០សញ្ជាតិ ដែលភាគច្រើនជាជនជាតិវៀតណាម ហើយឯកសារមិនប្រក្រតីទាំងនោះរួមមាន៖ អត្តសញ្ញាណប័ណ្ណសញ្ជាតិខ្មែរ សៀវភៅស្នាក់នៅ និងសៀវភៅគ្រួសារ ជាដើម។ សម្តេចក្រឡាហោម បានមានប្រសាសន៍បែបនេះក្នុងឱកាស អញ្ជើញជាអធិបតី ក្នុងកិច្ចប្រជុំផ្សព្វផ្សាយលទ្ធផលការងារ ដកហូតឯកសាររដ្ឋបាលកម្ពុជា មិនប្រក្រតី ដែលជនបរទេសកាន់កាប់ប្រើប្រាស់ និងការទទួលពាក្យសុំប្រកាសទទួលស្គាល់ ជាជនបរទេសអន្តោប្រវេសន៍ និងប័ណ្ណស្នាក់នៅអចិន្ត្រៃយ៍ នាព្រឹកថ្ងៃពុធ ទី១៧ ខែកក្កដា ឆ្នាំ២០១៩ នៅទៅស្តីការក្រសួងមហាផ្ទៃ។
សម្តេចក្រឡាហោម មានប្រសាសន៍ថា “បើយើងមិនដកហូតឯកសាររដ្ឋបាលមិនប្រក្រតីទាំងនេះទេ នោះជនបរទេសជិត ៧ម៉ឺននាក់នេះ នឹងទទួលបានសញ្ជាតិខ្មែរ ដោយស្វយប្រវត្តិ។ នេះជាកំហុសរបស់ថ្នាក់ដឹកនាំ និងមន្ត្រីជំនាញ ក្នុងការផ្តល់លិខិតឯកសាររដ្ឋបាល មិនប្រក្រតីទាំងនោះ ដល់ជនបរទេស។ រីឯជនបរទេស ដែលប្រើប្រាស់ឯកសារមិនត្រឹមត្រូវទាំងនោះ ក៏ប្រឈមនឹងការទទួលទោសតាមច្បាប់។ ម្យ៉ាងទៀត នៅពេលនេះ បើយើងមិនធ្វើ នោះយើងនឹងខុស ហើយកំហុសនេះ នៅស្ថិតស្ថិរ និងជាកំហុសប្រវត្តិសាស្ត្រ”។
ព្រមជាមួយគ្នានោះដែរ សម្តេចក្រឡាហោម ស ខេង ក៏បានប្រកាសថា អគ្គនាយកដ្ឋានអន្តោប្រវេសន៍ បានទទួលពាក្យសុំប្រកាសទទួលស្គាល់ ជាជនបរទេសអន្តោប្រវេសន៍ចំនួន ៧១៩៩១ ឯកសារ ដោយមានមនុស្ស ៣២៧៣៥ គ្រួសារនិងប័ណ្ណស្នាក់នៅអចិន្ត្រៃយ៍ នៅកម្ពុជា ចំនួន ៦២៥៣១ ឯកសារ ដោយមានមនុស្ស ២៨៥៧១ គ្រួសារ ដែលក្នុងនោះមាន ១១សញ្ជាតិ៕ គឹមអាន
ដោយ៖ នាយកដ្ឋានព័ត៌មានវិទ្យា
