នាព្រឹកថ្ងៃអង្គារទី១២ ខែតុលា ឆ្នាំ២០២១នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងពិធីបើក សិក្ខាសាលាសមាហរណកម្មវិធីវិនិយោគបីឆ្នាំរំកិលក្រុង និងសង្កាត់ ឆ្នាំ២០២២-២០២៤ នៅថ្នាក់ក្រុង (ក្រុងស្វាយរៀង) តាមរយៈប្រព័ន្ធវីដេអូZoom។

សិក្ខាសាលានេះមានការអញ្ជើញចូលរួមពីលោកនាយករដ្ឋបាលសាលាខេត្ត លោក លោកស្រី ប្រធាន អនុប្រធានមន្ទីរ-អង្គភាពនានាក្នុងខេត្ត លោកប្រធានក្រុមប្រឹក្សាក្រុង គណៈអភិបាលក្រុង លោកនាយក នាយករងទីចាត់ការផែនការវិនិយោគសាលាខេត្ត លោកនាយក នាយករងរដ្ឋបាលសាលាក្រុង ការិយាល័យនានាចំណុះសាលាក្រុង លោក លោកស្រីចៅសង្កាត់ ស្មៀនសង្កាត់ទាំង៧ និងមន្ត្រីពាក់ព័ន្ធមួយចំនួន។

មានប្រសាសន៍ថ្លែងនៅក្នុងសិក្ខាសាលានេះ ឯកឧត្តមអភិបាលខេត្តបានសម្ដែងនូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងរបស់ឯកឧត្ដម លោក លោកស្រី និងអ្នកពាក់ព័ន្ធទាំងអស់ បើទោះបីជានៅក្នុងបរិបទជំងឺកូវីដ-១៩ ប៉ុន្តែក៏បានចូលរួមចំណែកយ៉ាងសកម្មតាំងពីដំណាក់កាលដំបូងរហូតដល់ដំណាក់កាលនៃការធ្វើសមាហរណកម្មនាពេលនេះ គឺក្នុងគោលបំណងស្វែងរកការគាំទ្រសកម្មភាពអភិវឌ្ឍន៍ជាអាទិភាពនានារបស់ខ្លួន សម្រាប់ឆ្នាំខាងមុខពីបណ្តាមន្ទីរ អង្គភាពជំនាញ អង្គការជាតិ-អន្តរជាតិ និងសប្បុរសជន ដើម្បីកិច្ចអភិវឌ្ឍន៍មូលដ្ឋានក្នុងបរិបទវិមជ្ឈការ និងវិសហមជ្ឈការ ដែលជាការប្រសូតិចេញពីឆន្ទៈ និងសំណូមពរ នៃផលប្រយោជន៍ពិតប្រាកដរបស់ប្រជាពលរដ្ឋ ក្នុងសង្គមប្រជាធិបតេយ្យ ដោយឈរលើគោលការណ៍ជាមូលដ្ឋាន នៃអភិបាលកិច្ចល្អ ដោយគិតគូរអំពីសេវាសាធារណៈ ដើម្បីបម្រើ ឬផ្តល់សេវាផ្សេងៗ ដល់ប្រជាពលរដ្ឋឱ្យកាន់តែល្អប្រសើរឡើង និងបង្ហាញពីឆន្ទៈចូលរួមក្នុងការកសាងអភិវឌ្ឍន៍មូលដ្ឋានផ្ទាល់របស់ខ្លួន បើកឱកាសជូនសាធារណជន អាចឃើញ ដឹងឮ នូវអ្វីដែលក្រុមប្រឹក្សាឃុំ សង្កាត់ បានធ្វើ និងបម្រុងនឹងធ្វើក្នុងស្មារតីទទួលខុសត្រូវ ចំពោះជោគវាសនាអនាគត រួមសុខ រួមទុក្ខជាមួយប្រជាពលរដ្ឋ និងប្រតិបត្តិការប្រកបដោយតម្លាភាព គណនេយ្យភាព ប្រសិទ្ធភាព និងភាពស័ក្តិសិទ្ធិ។

ឯកឧត្តមក៏បានសំណូមពរដល់ក្រុមប្រឹក្សាសង្កាត់ទាំងអស់ ត្រូវយកចិត្តទុកដាក់ក្ដាប់ឲ្យបាននូវធាតុចូលនានាដែលទទួលបានពីអង្គសិក្ខាសាលានៅថ្ងៃនេះ និងយកធាតុចូលទាំងនោះ សម្រាប់ធ្វើជាមូលដ្ឋាន ដើម្បីច្របាច់បញ្ចូលគ្នាឈានទៅកែសម្រួលបញ្ចប់ការរៀបចំកម្មវិធីវិនិយោគបីឆ្នាំរំកិលសង្កាត់ និងកិច្ចសន្យានានា រួចផ្ញើឯកសារទាំងនេះ ទៅទីចាត់ការផែនការ និងវិនិយោគសាលាខេត្ត និងមន្ទីរផែនការខេត្ត ឱ្យបានឆាប់បំផុតតាមដែលអាចធ្វើបាន ដោយមានមន្រ្តីការិយាល័យគាំទ្រឃុំ-សង្កាត់ ជាអ្នកជួយ និងចូលរួមទទួលខុសត្រូវ ជំរុញការអនុវត្តឱ្យកិច្ចការនេះប្រព្រឹត្តទៅបានល្អ និងទាន់ពេលវេលាតាមកាលកំណត់។

លទ្ធផល នៃអង្គសិក្ខាសាលា ៖ ឆ្នាំ២០២២ខាងមុខ គម្រោងវិនិយោគក្រុងស្វាយរៀង មានចំនួន ២៨គម្រោង មានការសន្យាគាំទ្រ ចំនួន ១៧គម្រោង ស្មើនឹង ៦០,៧១% ក្នុងនោះការសន្យាគាំទ្រក្នុងគម្រោង មានចំនួន ០៦គម្រោង ស្មើនឹង ៣៥,២៩% និងការសន្យាគាំទ្រក្រៅគម្រោង មានចំនួន ១១គម្រោង ស្មើនឹង ៦៤,៧១%។ ចំពោះគម្រោងវិនិយោគសង្កាត់ទាំង៧ ក្នុងក្រុង មានចំនួន ១៣៦គម្រោង មានការសន្យាគាំទ្រ ចំនួន ១០៧គម្រោង ស្មើនឹង ៧៨,៦៨% ក្នុងនោះការសន្យាគាំទ្រក្រៅគម្រោង មានចំនួន ៥៥គម្រោង ស្មើនឹង ៥១,៤០% និងការសន្យាគាំទ្រក្នុងគម្រោងមានចំនួន ៥២គម្រោង ស្មើនឹង ៤៨,៦០%៕

ប្រភព៖ រដ្ឋបាលខេត្តស្វាយរៀង