កំពង់ឆ្នាំង៖ នាថ្ងៃអង្គារទី៥ ខែតុលា ឆ្នាំ២០២១ ឯកឧត្តម ឡុង ឈុនឡៃ ប្រធានក្រុមប្រឹក្សាខេត្តកំពង់ឆ្នាំង រួមដំណើដោយឯកឧត្តម សមាជិកក្រុមប្រឹក្សាខេត្ត ព្រមទាំង លោកអភិបាលស្រុកទឹកផុស បានអញ្ជើញនាំយកអំណោយរបស់ឯកឧត្តម ស៊ុន សុវណ្ណារិទ្ធិ អភិបាល នៃគណៈអភិបាលខេត្តកំពង់ឆ្នាំង ចែកជូនប្រជាពលរដ្ឋដែលកំពុងធ្វើចត្តាឡីស័កនៅតាមផ្ទះចំនួន ៣០គ្រួសារ រស់នៅក្នុងឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង។
ក្នុងឱកាសនៃការចុះចែកសម្ភារនោះដែរ ឯកឧត្តម ឡុង ឈុនឡៃ បានធ្វើការណែនាំដល់បងប្អូនប្រជាពលរដ្ឋដែលត្រូវធ្វើចត្តាឡីស័ក ទាំងអស់ត្រូវមានអនាម័យជាប់ជាប្រចាំជាពិសេសត្រូវអនុវត្តតាមគោលការណ៍របស់រាជរដ្ឋាភិបាលគឺ ៣ការពារ និង៣កុំ និងអនុវត្តតាមការណែនាំរបស់ក្រសួងសុខាភិបាលឱ្យបានត្រឹមត្រូវ។
អំណោយដែលបានចែកជូនដោយក្នុងមួយគ្រួសារទទួលបាន៖ អង្ករចំនួន ២៥kg មីមួយកេះ ត្រីខមួយយួរ ម៉ាស់មួយប្រអប់។ ឯកឧត្តម បានជួបសំណេះសំណាល ជាមួយសមាជិកសមាជិកា គណបក្សឃុំអភិវឌ្ឍន៍ និងបានផ្តល់អង្ករ មី ត្រីខ ម៉ាស់ ដល់គណបក្សឃុំដើម្បីប្រើប្រាស់ផងដែរ។
បន្ទាប់មក ឯកឧត្តម ឡុង ឈុនឡៃ និងឯកឧត្តម សមាជិកក្រុមប្រឹក្សាខេត្ត បាននាំយកនូវបច្ច័យមួយចំនួន ប្រគេនដល់ព្រះចៅអធិកាវត្តវារីផាសុខារាម ហៅវត្តទឹកជុំ និងថ្វាយបង្គំព្រះសពលោកឳ សាន្ត ព្រមទាំងសួសុខទុកដល់ព្រះសង្ឃផងដែរ៕
ប្រភព៖ រដ្ឋបាលខេត្តកំពង់ឆ្នាំង